លោកដូណាល់ ត្រាំដូរចិត្ត មកទទួលស្គាល់គោលការណ៍ចិនតែមួយវិញ
ប្រធានាធិបតីអាមេរិក លោកដូណាល់ ត្រាំ នៅថ្ងៃព្រហស្បតិ៍ម្សិលមិញ បាននិយាយប្រាប់លោកប្រធានាធិបតីស៊ី ជីនពីង ថា អាមេរិកនឹងទទួលស្គាល់គោលការណ៍ចិនតែមួយ។ តាមសេតវិមាន ប្រមុខដឹកនាំកំពូលចិន និងអាមេរិកបានពិភាក្សាគ្នាតាមទូរស័ព្ទជាលើកទី១ ចាប់តាំងពីលោកដូណាល់ ត្រាំ បានចូលកាន់តំណែងជាប្រធានាធិបតីថ្មីរបស់អាមេរិក។
ចុះផ្សាយនៅថ្ងៃ៖
លោកប្រធានាធិបតីដូណាល់ ត្រាំចង់រំងាប់កំហឹងរបស់ចិន នៅក្នុងរឿងតៃវ៉ាន់។ ទីក្រុងប៉េកាំង បានខឹងឆេះដុំ បន្ទាប់ពីលោកដូណាល់ ត្រាំបាននិយាយទូរស័ព្ទជាមួយលោកស្រីប្រធានាធិបតីតៃវ៉ាន់ ដែលនេះជាលើកទី១ ចាប់តាំងអាមេរិកបានយល់ព្រមទទួលស្គាល់គោលការណ៍ចិន តែមួយ។ នៅក្នុងបទសម្ភាសន៍ជាមួយទូរទស្សន៍អាមេរិកាំង កាលពីខែធ្នូ លោកដូណាល់ ត្រាំ នៅបាននិយាយទៀតថា លោកដូចជាគ្មានហេតុផលអ្វីដែលត្រូវគោរពគោលការណ៍ចិនតែមួយនោះទេ។
សំដីរបស់ម្ចាស់សេតវិមានបានបង្កឲ្យមានមតិប្រឆាំងខ្លាំងពីរដ្ឋាភិបាលចិន រហូតធ្វើឲ្យគេបារម្ភថា នៅក្រោមការដឹកនាំរបស់លោកដូណាល់ ត្រាំ ចិន និងអាមេរិក នឹងអាចតានតឹងខ្លាំងនឹងគ្នា។
ប៉ុន្តែ នៅក្នុងកិច្ចសន្ទនាតាមទូរស័ព្ទ នៅថ្ងៃម្សិលមិញ ជាមួយប្រធានាធិបតីចិន លោកស៊ី ជីនពីង លោកដូណាល់ ត្រាំ បែរជាមកនិយាយផ្អែមវិញ សម្រាលភាពតានតឹង ដោយថា លោកបានដូរចិត្ត ហើយនិងថា លោកនឹងទទួលស្គាល់គោលការណ៍ចិនតែមួយ។ សេចក្តីប្រកាសព័ត៌មានរបស់សេតវិមាន បានបង្ហាញថា ទៅតាមការសុំរបស់ប្រធានាធិបតីចិន លោកដូណាល់ ត្រាំ សុខចិត្តទទួលស្គាល់ គោលការណ៍ចិនតែមួយ ដែលអាមេរិកបានអនុវត្ត តាំងពីឆ្នាំ ១៩៧៩។
នៅក្នុងកិច្ចសន្ទនាតាមទូរស័ព្ទ ប្រមុខដឹកនាំចិន និងអាមេរិកបាននិយាយថា នៅពេលណាដែលបញ្ហាចិនតែមួយ ត្រូវបានដោះស្រាយ នោះទំនាក់ទំនងរបស់ប្រទេសទាំងពីរនឹងល្អធម្មតាឡើងវិញ។ តៃវ៉ាន់ជាសំណុំរឿងរសើបសម្រាប់ប្រទេសចិន ដែលបានចាត់ទុកតៃវ៉ាន់ ជាដីកោះមួយរបស់ខ្លួន។ លោកJames Zimmerman អតីតប្រធានសភាពាណិជ្ជកម្មអាមេរិកនៅចិន បានវាយតម្លៃថា លោកដូណាល់ ត្រាំ មិនគួរលើកសើរើពីរឿងចិនតែមួយទាល់តែសោះ។ សម្រាប់អតីតប្រធានសភា ពាណិជ្ជកម្មអាមេរិក នៅចិន មានមធ្យោបាយច្រើនណាស់ដើម្បីចរចា ជាមួយចិន។ ប៉ុន្តែ បើសិនគេយកការគំរាមដែលប៉ះពាល់ដល់មូលដ្ឋានគ្រឹះរបស់ចិន ដូចជារឿងកោះតៃវ៉ាន់ជាដើមនោះ នោះ គេនឹងមិនបានអ្វីពីចិនសោះឡើយ។ ផ្ទុយទៅវិញ គេមានតែបង្កបញ្ហា ប្រឈមមុខកាន់តែខ្លាំងជាមួយចិន ដែលជាមហាអំណាចសេដ្ឋកិច្ចទី២ ក្នុងពិភពលោក។
តាមអតីតប្រធានសភាពាណិជ្ជកម្មអាមេរិកនៅចិន ដោយប្រែក្រឡាស់សំដី លឿន យ៉ាងដូច្នេះ នៅទីបំផុត លោកដូណាល់ ត្រាំ បានបង្ហាញឲ្យពិភពលោកឃើញថា លោក តាមពិតគ្រាន់តែជាខ្លាក្រដាស ដែលបានត្រឹមតែគំរាម ប៉ុន្តែ នៅទីបំផុត គ្មានសមត្ថភាព និងមធ្យោបាយដើម្បី ជំនះឧបសគ្គ បញ្ហាដែលលោកជាអ្នកបង្កឡើងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ