តើចិនគួរប្រើធម៌ក្តៅទេ ប្រឈមនឹងអាមេរិករបស់លោក ដូណាល់ ត្រាំ?
ចុះផ្សាយនៅថ្ងៃ៖
ស្តាប់ - ០៤:២៩
ភាពតានតឹងបង្កឡើងដោយសំដីវាយប្រហារគ្នាទៅវិញទៅមក រវាងអាមេរិកនិងចិនចេះតែកើតមានឡើងរាល់ថ្ងៃ។ ថ្ងៃចន្ទកន្លងទៅ អាមេរិកបានព្រមានចិនពីជម្លោះដែនទឹកនៅសមុទ្រចិនខាងត្បូង និងការដោះដូរពាណិជ្ជកម្មរវាងប្រទេសទាំង២។ ចិនក៏ឆ្លើយបកទៅវិញថា ត្រៀមការពារសិទ្ធិរបស់ខ្លួននៅសមុទ្រចិនដែរ។ យោងតាមអ្នកជំនាញ ប្រឈមនឹងសហរដ្ឋអាមេរិករបស់លោកដូណាល់ ត្រាំ ចិនមានលទ្ធភាពគ្រប់គ្រាន់ ដើម្បីប្រឈមរឺក៏តបតទៅលោកត្រាំបាន។
ប្រធានាធិបតីអាមេរិក ដូណាល់ ត្រាំ មិនចេះនៅស្ងៀមទេ ក្នុងការទិតៀន វាយប្រហារពាក្យ សំដីជាមួយចិន គឺតាំងពីលោកមិនទាន់ឡើងកាន់អំណាចម្ល៉េះ។ ថ្ងៃចន្ទកន្លងទៅ ប៉ុន្មានថ្ងៃប៉ុណ្ណោះ ក្រោយលោកត្រាំឡើងកាន់អំណាច សេតវិមានបានព្រមានចិនពីជម្លោះដែនទឹកនៅសមុទ្រចិនខាងត្បូង ដោយហ៊ានប្រើពាក្យថា ប្រជុំកោះនៅទីនោះមិនស្ថិតក្នុងទឹកដីចិនទេ តែស្ថិតក្នុងដែនទឹកអន្តរជាតិ ហើយអាមេរិកនឹងការពារប្រយោជន៍អន្តរជាតិនៅទីនោះ ដើម្បីកុំអោយប្រទេសផ្សេងមកបំផ្លាញ។
ក្នុងន័យនេះ គេមើលឃើញថា សេតវិមាន ចង់ចោទចិនថា ចិនចង់បំផ្លាញប្រយោជន៍នៅទីនោះ។ តាំងពីលោកត្រាំមិនទាន់ឡើងកាន់អំណាចម្ល៉េះ លោករ៉ិច ធីលឡឺសាន់ នៅខាងបក្សសាធារណរដ្ឋដែលគេរំពឹងរួចហើយថា អាចនឹងកាន់កាប់ក្រសួងការបរទេសអាមេរិក បានព្រមានចិនពីសកម្មភាពសាងសង់នៅតាមដែនកោះ នៅសមុទ្រចិនខាងត្បូង។ អាមេរិកទូន្មានចិនអោយបញ្ឈប់សកម្មភាពទាំងនេះទៅវិញ។ អាមេរិកមិនចង់អោយចិនចូលទៅកាន់តំបន់ជម្លោះស្រួលៗទៀតទេ។ ការព្រមានរិះគន់ ការគំរាមពីសំណាក់អាមេរិក ចេះតែមានរាល់ថ្ងៃ។ មិនដឹងថា ចិនស្រគៀត្រចៀកយ៉ាងណាទេ !
ចិនប្រហែលកំពុងចោទសួរថា តើត្រូវឆ្លើយតបទៅអាមេរិកយ៉ាងដូចម្តេច បើអាមេរិកពេលនេះ ដូចជាចេះតែចង់មកជិះកចិនរហូតយ៉ាងនេះ? កាលពីអាណត្តិលោកអូបាម៉ា អាមេរិករិះគន់ចិន អាមេរិកក៏ផ្គើនចិនផ្នែកយោធាដែរ តែអាមេរិករបស់អូបាម៉ាព្យាយាមដោះស្រាយជម្លោះដែនទឹក នៅសមុទ្រចិន តាមបែបការទូត។ អាមេរិករបស់ដូណាល់ ត្រាំវិញ ដូចជាកាន់តែខ្លាំងដៃជាងមុន។ បើតាមសារព័ត៌មានរដ្ឋចិន អាមេរិកនិងចិនអាចនឹងប្រឈមផ្នែកយោធាដាក់គ្នាទៀតផង អោយតែអាមេរិកគំរាមយ៉ាងនេះចុះ! ចិនមិនភ្លេចដែរទេថា តាំងពីលោកត្រាំ នៅមិនទាន់ជាប់ឆ្នោត លោកបានចោទថា ចិនលួចការងារប្រជាជនអាមេរិក លួចលុយអាមេរិក រកស៊ីមិនស្មោះត្រង់ ហើយថែមទាំងគំរាមយកពន្ធលើទំនិញចិន៤៥ភាគរយទៀតផង។
ថ្ងៃច័ន្ទកន្លងទៅ អាមេរិកបានព្រមានពីពាណិជ្ជកម្មជាមួយចិនថែមទៀត។ អាមេរិកអាចនឹងហ៊ានរហូតដំឡើងពន្ធទំនិញនាំពីចិនឆាប់ៗនេះផងក៏ថាបាន។ ព្រោះថា លោកត្រាំដូចជាមនុស្សម៉ាត់ណា ម៉ាត់ហ្នឹង។ មុនជាប់ឆ្នោត លោកបានសន្យាដកអាមេរិកចេញពីកិច្ចព្រមព្រៀងពាណិជ្ជកម្មសេរីអន្តរប៉ាស៊ីហ្វិក ហៅកាត់ថា TTP។ សប្តាហ៍នេះ ចូលកាន់អំណាចមិនបានស្រួលបួលផង លោកក៏ចុះហត្ថលេខាលើក្រិត្យដកអាមេរិកពីកិច្ចព្រមព្រៀងនេះ ដូចសន្យាមែន។
ដើម្បីតបតនឹងអាមេរិករបស់លោកត្រាំ បើនិយាយពីរឿងពាណិជ្ជកម្មអន្តរជាតិ ប្រហែលមិនជាបញ្ហាទេ ព្រោះចិនពូកែរកស៊ីតាំងពីដើមមក។ អាមេរិកដកខ្លួនពីកិច្ចព្រមព្រៀងផ្សេងៗ ជាឱកាសសម្រាប់ចិនទៅវិញទេ ដើម្បីដាក់ឥទ្ធិពលលើពាណិជ្ជកម្មអន្តរជាតិ។ ពេលនេះ មើលទៅប្រទេសមួយចំនួនក៏មិនពេញចិត្តនឹងលោកត្រាំប៉ុន្មានដែរ។ ដូច្នេះ ប្រទេសទាំងនោះ អាចនឹងបើកចំហរពាណិជ្ជកម្មជាមួយចិនកាន់តែទូលាយទៅវិញទេ។
បើនិយាយពីផ្នែកយោធា ចិនក៏មិនខ្លាចបញ្ចេញសាច់ដុំដាក់លោកត្រាំដែរ។ អ្នកជំនាញនានាគិតថា ចិនអាចតបតទៅអាមេរិកវិញបាន។ កងទ័ពចិនទើបប្រកាសថា ដាក់អោយដំណើរការនាវាពិឃាត ស៊ីនីង Xining។ នាវាពិឃាតមួយនេះមានសមត្ថភាពកំទេចនាវាមុជទឹក រឺយន្តហោះចំបាំងបាន។ ចិនក៏មានមីស៊ីលប្រឆាំងនាវារបស់ខ្លួនផងដែរ។ បច្ចុប្បន្ន ចិនកំពុងធ្វើការសាកល្បងមីស៊ីលអន្តរទ្វីប ប្រភេទ DF-41 ដែលអាចបាញ់បានរយៈចំងាយ១ម៉ឺន៤ពាន់គីឡូម៉ែត្រ ហើយអាចផ្ទុកក្បាលគ្រាប់នុយក្លេអ៊ែរដល់ទៅ១២ទៀតផង។ តែចិនមាននាវាផ្ទុកយន្តហោះតែមួយគ្រឿងប៉ុណ្ណោះ ខណៈអាមេរិកមានដល់ទៅជាង១០គ្រឿង។ នាវាចិនមួយនេះគឺនាវា Liaoning ម៉ូដែលជំនាន់សហភាពសូវៀត។ តែពេលនេះ ចិនក៏កំពុងសង់នាវាផ្ទុកយន្តហោះម៉ូដែលជាតិចិនមួយគ្រឿងដែរ។
ត្បិតថា កងទ័ពចិនខានធ្វើសង្គ្រាមតាំងតែឆ្នាំ១៩៧៩មក តាំងពីចប់សង្គ្រាមចិន-វៀតណាមមក ក៏គេគិតថា ចិនប្រហែលពិចារណាវែងឆ្ងាយ មិនប្រើធម៌ក្តៅ រហូតវាយប្រហារយោធាជាមួយអាមេរិកទេ។ ជាក់ស្តែង ប្រធានាធិបតីចិន ស៊ី ជីនពីង ថ្មីៗនេះ ក៏ទើបតែអំពាវនាវអោយឈប់មានអាវុធប្រល័យលោកក្នុងពិភពលោកទៀត។ ដូច្នេះ ចិនមិនប្រើធម៌ក្តៅទេ ព្រោះសង្គ្រាមរវាងមហាអំណាចអាមេរិក-ចិន បើផ្ទុះឡើងនោះ មានតែធ្វើអោយដុនដាបមនុស្សជាតិទៅវិញទេ។ សមត្ថភាពយោធាចិនពេលនេះ ក៏គ្រប់គ្រាន់នឹងកំញ៉ើញអាមេរិកខ្លះដែរហើយ។
ម្យ៉ាងទៀត មើលទៅបុគ្គលិកលក្ខណៈរបស់លោកដូណាល់ ត្រាំ ចិនអាចនឹងប្រៀបធៀបលោកត្រាំទៅនឹង កូនក្មេងម្នាក់ផងក៏ថាបាន។ ព្រោះថា លោកត្រាំបានធ្វើផ្ទុយទាំងស្រុងទៅនឹងលោកអូបាម៉ាអាណត្តិមុន ដោយកំពុងពន្លិចចោលទៅវិញនូវលទ្ធផលការងាររបស់បក្សប្រជាធិបតេយ្យអាណត្តិមុន។ អាចថា ប្រហែលលោកត្រាំវាយប្រហារលទ្ធផលការងាររបស់អូបាម៉ា ដើម្បីយកចិត្តរុស្ស៊ីផងក៏មិនដឹង។
ចិនមិនមានបញ្ហាអ្វីជាមួយរុស្ស៊ីទេ។ ទៅថ្ងៃមុខ រុស្ស៊ីប្រហែលជាអាចពន្យល់លោកត្រាំ អោយបន្ទន់ឥរិយាបថជាមួយចិនបន្តិចវិញក៏ថា បាន កុំអោយអាមេរិកធ្វើអ្វីទាំងទទឹងទិសដូច្នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ