ទស្សនកិច្ចលើកដំបូងរបស់រដ្ឋមន្រ្តីការពារជាតិអាមេរិកនៅអាស៊ី
ប្រធានមន្ទីរបញ្ចកោនអាមេរិក លោក James Mattis ចេញទៅបំពេញទស្សនកិច្ច ជាលើកដំបូង ទៅនិយាយធានាប្រទេសសម្ព័ន្ធមិត្តរបស់អាមេរិក នៅអាស៊ី។ តាមសេចក្តីប្រកាសព័ត៌មានរបស់ក្រសួងការពារជាតិអាមេរិក លោកJames Mattis ត្រូវទៅដល់ទីក្រុងសេអ៊ូល នៅថ្ងៃព្រហស្បតិ៍ទី ២កុម្ភៈ មុននឹងធ្វើដំណើរបន្តទៅប្រទេសជប៉ុន នៅថ្ងៃសុក្រស្អែក។
ចុះផ្សាយនៅថ្ងៃ៖ កែប្រែថ្ងៃទី៖
លោក James Mattisជាមន្រ្តីជាន់ខ្ពស់ដំបូងគេ របស់រដ្ឋបាលលោកដូណាល់ ត្រាំ ដែលចេញដំណើរទៅធ្វើទស្សនកិច្ចនៅបរទេស ដោយចាប់ផ្តើមមុនគេ នៅកូរ៉េខាងត្បូង និងជប៉ុនដេលជាសម្ព័ន្ធមិត្តយុទ្ធសាស្រ្តរបស់អាមេរិក នៅអាស៊ី។ តាមសេចក្តីប្រកាសព័ត៌មានរបស់មន្ទីរបញ្ចកោន រដ្ឋមន្រ្តីការពារជាតិអាមេរិកទៅអាស៊ី ដើម្បីរឹតចំណងជាមួយជប៉ុន និងកូរ៉េខាងត្បូង សម្ព័ន្ធមិត្តចីរកាលរបស់អាមេរិក ហើយនិងពង្រឹងបន្ថែមសហប្រតិបត្តិការយោធារបស់ប្រទេសទាំង៣។
ជប៉ុន និងកូរ៉េខាងត្បូង សម្ព័ន្ធមិត្តចាស់ឆ្នាំរបស់អាមេរិក ធ្លាប់មានក្តីបារម្ភ នៅពេលលឺបេក្ខជនប្រធានាធិបតីលោកដូណាល់ ត្រាំ និយាយសន្យាជាសាធារណៈថា លោកនឹងដកទ័ពអាមេរិកចេញពីកូរ៉េខាងត្បូង និងជប៉ុន បើសិនប្រទេសទាំងពីរមិនព្រមជួយចេញលុយថ្លៃចំណាយយោធាអាមេរិកទេនោះ។ លោកដូណាល់ ត្រាំ នៅបានរិះគន់ផងដែរ អង្គការអូតង់ ថា ហួសសម័យ និងជាបន្ទុកថវិកាធ្ងន់ សម្រាប់អាមេរិក។
នៅក្រោយជាប់ឆ្នោត លោកដូណាល់ ត្រាំបានផ្លាស់ប្តូរជំហររបស់ខ្លួនវិញ ដោយបាននិយាយបញ្ជាក់ទៅនាយករដ្ឋមន្រ្តីជប៉ុន លោកស៊្ហីនហ្សូ អាបេ និងប្រធានាធិបតីកូរ៉េខាងត្បូង ពីការសន្យារបស់អាមេរិក ដើម្បីជួយការពារសម្ព័ន្ធមិត្តទាំងពីរ។
ខុសពីប្រធានាធិបតីលោកដូណាល់ ត្រាំ លោក James Mattisមិនសូវមាត់កច្រើននោះទេ។ ប៉ុន្តែ រាល់លើក លោកតែងបញ្ជាក់ពីសារៈសំខាន់ មិនអាចកាត់ថ្លៃបាន នៃប្រទេសសម្ព័ន្ធភាពអាមេរិក មិនថា អូតង់ ឬកូរ៉េខាងត្បូង និងជប៉ុន។
តាមអ្នកទទួលខុសត្រូវម្នាក់របស់ក្រសួងការពារជាតិអាមេរិក នៅកូរ៉េខាងត្បូង និងនៅជប៉ុន លោក James Mattisនឹងស្តាប់ច្រើនជាងនិយាយ។ ជាមួយសមភាគីជប៉ុន និងកូរ៉េខាងត្បូងរដ្ឋមន្រ្តីការពារជាតិអាមេរិកនឹងពិភាក្សាពីការគំរាមកំហែងរបស់កូរ៉េខាងជើង ដែលកំពុងចង់បាញ់សាកល្បងមីស៊ីលដែលអាចបំពាក់ដោយក្បាលគ្រាប់នុយក្លេអ៊ែរ។
ធ្លាប់ជាអតីតមេបញ្ជាការកងទ័ពអាមេរិក នៅក្នុងសមរភូមិប្រយុទ្ធ ក្នុងប្រទេសអាហ្វហ្កានីស្ថាន និងអ៊ីរ៉ាក់ លោក James Mattisត្រូវបានគេចាត់ទុកជាមេដឹកនាំយោធាដែលដាច់ណាត់ និងប្រសិទ្ធិភាព។ លោក James Mattis នៅធ្លាប់បាននិយាយផ្ទុយពីលោកដូណាល់ ត្រាំ ដែលចង់ឲ្យឡើងវិញ ការធ្វើទារុណកម្មដើម្បីប្រឆាំងនឹងក្រុមភេរវជន។ លោកដូណាល់ ត្រាំ បានតមពាក្យសំដីទៅវិញ បន្ទាប់ពីលោក James Mattis បាននិយាយថា លោកមិនឃើញថា ការធ្វើទារុណកម្មមានប្រយោជន៍នោះទេ។ នេះអាចបញ្ជាក់ថា លោកប្រធានាធិបតីអាមេរិក អាចជឿស្តាប់ រដ្ឋមន្រ្តីការពារជាតិរបស់ខ្លួន ដែលធ្លាប់មានបទពិសោធន៍ធ្វើសង្រ្គាម គឺខុសពីលោកដែលមានបទពិសោធន៍ត្រឹម ជាមហាសេដ្ឋី ធ្វើជំនួញអចលនទ្រព្យ និងពិធីករទូរទស្សន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ