អាមេរិក ជប៉ុន និងកូរ៉េខាងត្បូងបើកកិច្ចប្រជុំត្រីភាគីដើម្បីនិយាយពីបញ្ហាកូរ៉េខាងជើង
នៅថ្ងៃអង្គារ ទី១៣ ធ្នូនេះ មន្រ្តីជាន់ខ្ពស់អាមេរិក ជប៉ុន និងកូរ៉េខាងត្បូងដែលស្គាល់ច្បាស់ពីនយោបាយនុយក្លេអ៊ែរកូរ៉េខាងជើងបានរួមប្រជុំគ្នាក្នុងទីក្រុងសេអ៊ូល កូរ៉េខាងត្បូង។ កម្មវត្ថុនៃកិច្ចប្រជុំ គឺដើម្បីជជែកលើបញ្ហានុយក្លេអ៊ែរកូរ៉េខាងជើងដ៏ចម្រូងចម្រាស និងស្មុគស្មាញ។ តែអ្វីជាការកត់សម្គាល់ កិច្ចប្រជុំត្រីភាគីលើកបានធ្វើឡើងនៅក្នុងបរិបទនយោបាយមិនទៀងទាត់នៅកូរ៉េខាងត្បូងជាមួយនឹងការទម្លាក់លោកស្រីប្រធានាធិបតីប៉ាក់ គុនហេ និងនយោបាយស្រពិចស្រពិលនៅអាមេរិកជាមួយលោកប្រធានាធិបតីថ្មីដូណាល់ ត្រាំ។
ចុះផ្សាយនៅថ្ងៃ៖
ស្តាប់ - ០១:៥៨
ជាទូទៅ អាមេរិក ជប៉ុន និងកូរ៉េខាងត្បូងបានផ្លាស់វេនគ្នាធ្វើជាម្ចាស់រៀបចំកិច្ចប្រជុំត្រីភាគី ហើយដែលឆ្នាំ ២០១៦ នេះ ជាវេនកូរ៉េខាងត្បូង។ តែអ្វីជាការកត់សម្គាល់ កិច្ចប្រជុំត្រីភាគីរៀបចំក្នុងទីក្រុងសេអ៊ូលថ្ងៃនេះ គឺជាកិច្ចប្រជុំលើកទី១ តាំងពីកូរ៉េខាងត្បូងបានធ្លាក់ក្នុងវិបត្តិនយោបាយ និងរឿងអាស្រូវពុករលួយទាក់ទងនឹងលោកស្រីប្រធានាធិបតីប៉ាក់ គុនហេដែលទើបត្រូវបានសភាបោះឆ្នោតទម្លាក់កាលពីសប្តាហ៍កន្លងទៅ។ កម្មវត្ថុអាទិភាពមួយក្នុងចំណោមកម្មវត្ថុអាទិភាពផ្សេងទៀតនៃកិច្ចប្រជុំត្រីភាគី គឺស្វែងរកកុងសង់ស៊ុសរួមស្តីពីអាកប្បកិរិយាគំរាមកំហែងនុយក្លេអ៊ែរពីសំណាក់របបក្រុងព្យុងយ៉ាង។
តែជាមួយនឹងស្ថានការណ៍នយោបាយមិនជាក់ច្បាស់នៅកូរ៉េខាងត្បូងសព្វថ្ងៃ កុងសង់ស៊ុសរួមមួយប្រឆាំងនឹងកូរ៉េខាងជើងប្រហែលជាពិបាករកឃើញបន្តិច។ លោកស្រីប៉ាក់ គុនហេដែលធ្លាប់បានប្រកាន់ជំហរតឹងរ៉ឹងទល់នឹងក្រុងព្យុងយ៉ាងក៏បានត្រឡប់មកប្រកាន់ជំហរដូចអាមេរិកដែលបន្តប្រើយុទ្ធសាស្រ្តអត់ធ្មត់ដោយបដិសេធមិនព្រមចរចាជាមួយកូរ៉េខាងជើងទេ ដរាបណារបបក្រុងព្យុងយ៉ាងមិនបង្ហាញពីឆន្ទៈបោះបង់កម្មវិធីនុយក្លេអ៊ែររបស់ខ្លួនចោលនោះ។ បន្ទាប់ពីសភា ការទម្លាក់លោកស្រីប៉ាក់ គុនហេក៏ត្រូវមានការសម្រេចចិត្តចុងក្រោយពីតុលាការធម្មនុញ្ញនាពេលខាងមុខដែរ។
ដោយឡែក កិច្ចប្រជុំត្រីភាគីអាមេរិក ជប៉ុន និងកូរ៉េខាងត្បូងស្តីពីបញ្ហានុយក្លេអ៊ែរកូរ៉េខាងជើងថ្ងៃនេះក៏ជាលើកដំបូងដែរ តាំងពីការបោះឆ្នោតអាមេរិក និងការជាប់ឆ្នោតរបស់លោកដូណាល់ ត្រាំដែលត្រូវចូលកាន់តំណែងជាផ្លូវការនៅថ្ងៃទី២០ មករាខាងមុខ។ អ្វីដែលបន្តស្រពិចស្រពិល គឺនយោបាយការបរទេសរបស់លោកត្រាំជាមួយនឹងឧបទ្វីបកូរ៉េ និយាយជារួម និងជាមួយកូរ៉េខាងជើង និយាយដោយឡែក។ យ៉ាងណាក៏ដោយពេលនេះ កិច្ចប្រជុំបានឯកភាពគ្នាក្នុងការបន្តកិច្ចសហប្រតិបត្តិការរួមគ្នា និងការបន្តដាក់សម្ពាធលើកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ