ជំនួបកំពូលអាមេរិក កូរ៉េខាងត្បូង និងជប៉ុននៅក្រុងឡាអេ ប្រឈមនឹងការផ្គើនបាញ់មីស៊ីលរបស់កូរ៉េខាងជើង
នៅក្រុងឡាអេ ល្ងាចថ្ងៃអង្គារម្សិលមិញ ប្រធានាធិបតីអាមេរិក បារ៉ាក់ អូបាម៉ា បានរៀបចំជំនួបកំពូលលើកទី១ ជាមួយនាយករដ្ឋមន្ត្រីជប៉ុន ស្ហ៊ីនសូ អាបេ និងប្រធានាធិបតីកូរ៉េខាងត្បូង ប៉ាក់ គុនហឺ ដើម្បីបង្ហាញពីការគាំទ្រឥតលក្ខខណ្ឌរបស់អាមេរិកចំពោះជប៉ុននិងកូរ៉េខាងត្បូង ប្រឈមនឹងការគំរាមនុយក្លេអ៊ែរពីសំណាក់កូរ៉េខាងជើង។ ជាការផ្គើននឹងជំនួបកំពូលនេះ នៅព្រឹកថ្ងៃពុធនេះ កូរ៉េខាងជើងបានបាញ់មីស៊ីលពីរដើម សំដៅទៅសមុទ្រជប៉ុន។ ក្រសួងការបរទេសអាមេរិកបានទាមទារអោយក្រុងព្យុងយ៉ាងចេះគ្រប់គ្រងខ្លួនឯង និងបញ្ឈប់រាល់សកម្មភាពផ្គើនបន្ថែម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
នៅល្ងាចថ្ងៃអង្គារម្សិលមិញ នៅគេហដ្ឋានរបស់ឯកអគ្គរដ្ឋទូតអាមេរិក នៅក្រុងឡាអេ ប្រទេសហូឡង់ លោកបារ៉ាក់ អូបាម៉ា បានរៀបចំជំនួបកំពូលជាមួយនាយករដ្ឋមន្ត្រីជប៉ុន ស្ហ៊ីនសូ អាបេ និងប្រធានាធិបតីកូរ៉េខាងត្បូង ប៉ាក់ គុនហឺ។ ប្រធានាធិបតីអាមេរិកបានសន្យាគាំទ្រឥតលក្ខខណ្ឌដល់ជប៉ុន និងកូរ៉េខាងត្បូង ដែលជាសម្ព័ន្ធមិត្តរបស់អាមេរិក និងជាទីកន្លែងយុទ្ធសាស្ត្រអាមេរិកនៅអាស៊ី។
សម្រាប់ប្រធានាធិបតីអូបាម៉ា ជំនួបកំពូលត្រីភាគីនេះ ជាសារតបតទៅនឹងការគំរាមកំហែងនុយក្លេអ៊ែររបស់កូរ៉េខាងជើង។ ប្រធានាធិបតីកូរ៉េខាងត្បូងប៉ាក់ គុនហឺបានគូសបញ្ជាក់ឡើងវិញដែរពីភាពចាំបាច់នៃជំនួបអាមេរិក កូរ៉េខាងត្បូងនិងជប៉ុន ដែលជាការរួបរួមគ្នាប្រឆាំងនឹងកូរ៉េខាងជើង។ ជំនួបកំពូលត្រីភាគីនេះ ជាជំនួបលើកទី១ហើយ សម្រាប់ប្រទេសទាំង៣ ចាប់តាំងពីលោក អូបាម៉ា លោកអាបេ និងលោកស្រីគុនហឺ បានឡើងកាន់អំណាច បានជាងមួយឆ្នាំមក។ អាមេរិកព្យាយាមអោយមានជំនួបនេះឡើងដើម្បីអោយមេដឹកនាំជប៉ុននិងកូរ៉េខាងត្បូងបានជួបមុខគ្នាផ្ទាល់ និងផ្សះផ្សាទំនាក់ទំនងរវាងគ្នាឡើងវិញ។ ទំនាក់ទំនងរវាងប្រទេសទាំង២ ក្នុងរយៈពេលចុងក្រោយនេះ បានធ្លាក់ចុះដុនដាបយ៉ាងខ្លាំង។ កូរ៉េខាងត្បូងបន្ទោសនាយករដ្ឋមន្ត្រីជប៉ុន ដែលបានចុះទៅវិហារយ៉ាស៊ូគូនី កាលពីចុងខែធ្នូ ឆ្នាំ២០១៣កន្លងទៅ រំលឹកវិញ្ញាណក្ខន្ធជនជាតិជប៉ុនដែលតស៊ូក្នុងសង្គ្រាមលោក។ បញ្ហាគឺថា នៅវិហារយ៉ាស៊ូគូនី ក៏មានចារឈ្មោះឧក្រិដ្ឋជនសង្គ្រាម១៤នាក់ផងដែរ នេះជាការមាក់ងាយចំពោះកូរ៉េខាងត្បូង។ លើសពីនេះ កូរ៉េខាងត្បូងក៏ខឹងសម្បារនឹងជប៉ុនដែលចង់សើរើកកាយរឿងស្ត្រីទាសករផ្លូវភេទផងដែរ។ សម្រាប់អាមេរិក ជម្លោះការទូតរវាងជប៉ុននិងកូរ៉េខាងត្បូងមិនបានផ្តល់ផលចំណេញអ្វីទេ ប្រឈមនឹងកូរ៉េខាងជើងដែលសំបូរទៅដោយមីស៊ីលរាប់រយដើមនោះ។
នៅថ្ងៃពុធនេះ ដើម្បីផ្គើនមេដឹកនាំអាមេរិក កូរ៉េខាងត្បូង និងជប៉ុន ដែលបានជួបគ្នានៅក្រុងឡាអេនោះ កូរ៉េខាងជើងបានបាញ់មីស៊ីល២ដើម ឆ្ពោះទៅសមុទ្រជប៉ុន។ មីស៊ីលទាំង២ត្រូវគេចាត់ទុកថា ជាមីស៊ីលរយៈចំងាយមធ្យមអាចបាញ់បានចំងាយពី១ពាន់ទៅ១ពាន់៥រយគីឡូម៉ែត្រ ហើយអាចបាញ់រហូតដល់ទឹកដីរុស្ស៊ី និងចិនទៀតផង។
យោងតាមអ្នកជំនាញ កូរ៉េខាងជើងបាញ់ប្រថុយបាញ់មីស៊ីលបែបនេះ គឺដើម្បីទាក់ទាញចំណាប់អារម្មណ៍ពីសហគមន៍អន្តរជាតិ ដើម្បីអោយកិច្ចចរចា៦ភាគី មានប្រទេសកូរ៉េទាំង២ រុស្ស៊ី ជប៉ុន ចិន និងអាមេរិក ដែលបានផ្អាកនៅឆ្នាំ២០០៨នោះ អាចចាប់ដំណើរការឡើងវិញ។ កិច្ចចរចានេះមានទិសដៅអោយកូរ៉េខាងជើងបញ្ឈប់កម្មវិធីនុយក្លេអ៊ែរ ជាការផ្តោះប្តូរនឹងជំនួយសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ