អាមេរិក៖លោកអូបាម៉ាផ្តើមបំពេញទស្សនកិច្ចលើកទី១១ និងលើកចុងក្រោយនៅអាស៊ី
នៅសហរដ្ឋអាមេរិក លោកប្រធានាធិបតីបារ៉ាក់ អូបាម៉ាផ្តើមបំពេញទស្សនកិច្ចមួយជុំទ្វីបអាស៊ីលើកទី១១ និងជាលើកចុងក្រោយ។ ប្រទេសអាស៊ីដែលលោកអូបាម៉ាទៅមុនគេ គឺចិនដើម្បីចូលរួមនៅក្នុងជំនួបកំពូលនៃក្រុមប្រទេស G២០ ដែលត្រៀមរៀបចំនៅថ្ងៃទី៤ និងទី៥ កញ្ញា។ បន្ទាប់មក លោកអូបាម៉ានឹងបន្តដំណើរទៅកាន់ប្រទេសឡាវដើម្បីចូលរួមជំនួបកំពូលអាស៊ាន រួមជាមួយប្រទេសដៃគូពីថ្ងៃទី ៦ ដល់ថ្ងៃទី៨ ក្នុងទីក្រុងវៀងចន្ទន៍។ តើកម្មវិធី និងប្រធានបទនៃទស្សនកិច្ចរបស់លោកអូបាម៉ាមានអ្វីខ្លះ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
យន្តហោះ Air Force One របស់លោកប្រធានាធីបតីអាមេរិកអូបាម៉ាបានចាកចេញពីទីក្រុងវ៉ាស៊ីនតោនក្នុងថ្ងៃពុធ ទី៣១ សីហា។ បន្ទាប់ពីចុះចតរយៈពេលខ្លីក្នុងរដ្ឋនេវ៉ាដា លោកអូបាម៉ាបន្តដំណើរទៅកាន់រដ្ឋហាវ៉ៃដើម្បីចូលរួមនៅក្នុងសមាជពិភពលោកនៃសហភាពអន្តរជាតិដើម្បីអភិរក្សធម្មជាតិ។ បន្ទាប់មកទៀត លោកអូបាម៉ាបន្តដំណើរទៅកាន់ទីប្រជុំកោះ Midway ស្ថិតនៅកណ្តាលមហាសមុទ្រប៉ាស៊ីហ្វិកដែលជាមហាជង្រុកមច្ឆាសមុទ្រធម្មជាតិដ៏សម្បូរបែប។
គឺនៅចុងសប្តាហ៍នេះដែលទស្សនកិច្ចមួយជុំទ្វីបអាស៊ីរបស់លោកអូបាម៉ាបានចាប់ផ្តើម។ ចិនជាប្រទេសអាស៊ីដែលលោកអូបាម៉ាដាក់ជើងជាន់មុនគេដើម្បីចូលរួមនៅក្នុងជំនួបកំពូល G២០ រយៈពេល ២ថ្ងៃ ពីថ្ងៃទី៤ ដល់ថ្ងៃទី៥ កញ្ញា។ នាឱកាសជំនួបកំពូល G២០ ក្នុងប្រទេសចិន លោកប្រធានាធិបតីអាមេរិកអូបាម៉ាគ្រោងជួបជាលក្ខណៈជាទ្វេភាគីជាមួយសមភាគីចិនលោកស៊ី ជិនពីង និងសមភាគីតួកគីលោកអ៊ែរដូហ្កាន។
មានប្រធានបទធំៗជាច្រើនដែលនឹងអាចមាននៅក្នុងជំនួបរវាងលោកអូបាម៉ា និងលោកស៊ី ជីនពីង ដូចយ៉ាងបញ្ហាសេដ្ឋកិច្ចពិភពលោក អំពើភេរវនិយម និងសំណុំរឿងអន្តរជាតិផ្សេងៗ ពិសេសជម្លោះសមុទ្រចិនខាងត្បូងដែលចិនកំពុងប្រឈមមុខទល់នឹងបណ្តាប្រទេសអាស៊ីមួយចំនួនក្នុងតំបន់។ ចំណែកជាមួយលោកប្រធានាធិបតីតួកគី លោកអូបាម៉ានឹងលើកទៅជជែកជាមួយលោកអ៊ែរដូហ្កានអំពីវិបត្តិនយោបាយនៅក្នុងប្រទេសស៊ីរី។
បន្ទាប់មកនៅក្រោយការបិទបញ្ចប់ជំនួបកំពូល G២០ ក្នុងថ្ងៃទី៥ កញ្ញាដដែល លោកអូបាម៉ានឹងបន្តដំណើរទៅកាន់ប្រទេសអាស៊ីក្បែរខាងមួយទៀត គឺឡាវដើម្បីចូលរួមនៅក្នុងជំនួបកំពូលអាស៊ាន រួមជាមួយប្រទេសដៃគូរយៈពេល ៣ថ្ងៃពីថ្ងៃទី៦ ដល់ថ្ងៃទី៨ កញ្ញាក្នុងទីក្រុងវៀងចន្ទន៍។ នាឱកាសជំនួបកំពូលអាស៊ានក្នុងទឹកដីឡាវ លោកអូបាម៉ាគ្រោងនឹងជួបជាមួយសមភាគីហ្វីលីពីនលោកឌុយទែរតេដែលគេស្គាល់ជាប្រធានាធិបតីចូរចិត្តប្រើសម្តីថ្លោស និងធ្លាប់គំរាមផ្តាច់ទំនាក់ទំនងជាមួយអាមេរិក។
សូមជម្រាបជូនថា តាំងពីក្រោយបិទបញ្ចប់សង្រ្គាមអាមេរិកនៅវៀតណាមជាង ៥០ឆ្នាំមក នេះជាលើកទី១ ដែលមានប្រធានាធិបតីអាមេរិកម្នាក់ដាក់ជើងជាន់ប្រទេសកុម្មុយនិស្តដ៏ក្រីក្រមួយនៅអាស៊ីអាគ្នេយ៍។ សម្រាប់លោកអូបាម៉ាដែលនឹងត្រូវអស់អាណត្តិនៅ ៥ខែខាងមុខ និងដែលនយោបាយការបរទេសបានផ្តោតសំខាន់លើអាស៊ី នេះជាដំណើរទស្សនកិច្ចលើកទី១១ និងជាលើកចុងក្រោយក្នុងរយៈពេលនៃការកាន់តំណែងប្រធានាធបតីចំនួន ៨ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ