ដ្រូនគំរាមកំហែង កាន់តែខ្លាំង សន្តិសុខអាកាសចរណ៍ស៊ីវិល
ចុះផ្សាយនៅថ្ងៃ៖
ស្តាប់ - ០៣:៤៧
យន្តហោះគ្មានមនុស្សបើក ដ្រូន បានក្លាយជាយានយន្តកាន់តែពេញនិយមឡើងៗ មិនថានៅក្នុងបម្រើបម្រាស់យោធា ឬស៊ីវិលទេ។ ប៉ុន្តែមានកាន់តែច្រើន ការគំរាមកំហែងមានកាន់ខ្ពស់។ ពីមុនគេខាងដ្រូនស៊ើបការណ៍ តែពេលនេះ ដ្រូន គឺជាការគំរាមកំហែងយ៉ាងពិតៗ និងកាន់តែខ្លាំងឡើង ដល់សុវត្ថិភាពហោះហើរ នៃយន្តហោះស៊ីវិល ដែលគួរតែមានគ្រប់គ្រងឱ្យបានតឹងរឹង។ នេះបើតាមការគូសបញ្ជាក់របស់សមាគមដឹកជញ្ជូនផ្លូវអាកាសអន្តរជាតិ នាឱកាសបើកពិព័រណ៍អាកាសចរណ៍ នៅសិង្ហបុរី។
ដ្រូន យន្តហោះគ្មានមនុស្សបើក បានក្លាយជាយានយន្តដ៏ពេញនិយម សម្រាប់ពិភពលោកសម័យអ៊ីនធ័រនែត។ ទីផ្សារលក់ដ្រូនសន្យាថានឹងស្គាល់ការរីកលូតលាស់ខ្លាំង កើនឡើងមួយទ្វេជាមួយរយនៅឆ្នាំ២០២០។ នេះមិនមែនជាក្តីស្រមៃទេ គឺជាទស្សនវិស័យដ៏ភ្លឺស្វាង ដែលនឹងក្លាយជាការពិត។
ពីមុនមកយើងធ្លាប់និយាយច្រើនអំពីដ្រូនយោធា សម្រាប់ចេញល្បាត ចេញស៊ើបការណ៍សម្ងាត់ ឬចេញធ្វើសង្គ្រាម នៅតាមទីតាំងភូមិសាស្ត្រមួយចំនួន ដែលគេគិតថាមានគ្រោះថ្នាក់ខ្លាំង។
បន្ទាប់មកដ្រូន បានបង្កឱ្យមានការព្រួយបារម្ភយ៉ាងខ្លាំង ព្រោះតាមរយៈដ្រូននេះ ជនឧក្រិដ្ឋ ភេរវជន អាចបង្ហោះដើម្បីស៊ើបការណ៍សម្ងាត់ផ្សេងៗ។ ដូចករណីនៅប្រទេសបារាំង កាលពីប៉ុន្មានខែមុន ដែលមានការបង្ហោះដ្រូន លើមជ្ឈមណ្ឌលនុយក្លេអ៊ែរ លើមូលដ្ឋានយោធា។ អាជ្ញាធរឈឺល្បាលយ៉ាងខ្លាំង និងបានប្រើគ្រប់មធ្យោបាយដើម្បីទប់ស្កាត់ការបង្ហោះដ្រូនបែបអនាធិបតេយ្យ ដោយខ្លាចក្រែងជាស្នាដៃរបស់ពួកភេរវជន ត្រៀមវាយប្រហារភេរវកម្មជាយថហេតុណាមួយ។
នៅថ្ងៃនេះ ក្តីព្រួយបារម្ភធំមួយទៀត បាននិងកំពុងផ្ទុះឡើងក្នុងរង្វង់ពិភពអ្នកអាកាសចរណ៍ស៊ីវិល។ តើដ្រូននិងយន្តហោះមានអ្វីប្រកួតប្រជែងគ្នាគួរឱ្យព្រួយបារម្ភទៅ ? មិនមែនជាប្រកួតប្រជែងទីផ្សារទេ តែជាគ្រោះថ្នាក់ចរាចរណ៍លើអាកាស។ និយាយបែបនេះ គឺគួរឱ្យចម្លែកបន្តិច ប៉ុន្តែសម្រាប់សមាគមអាកាសចរណ៍ស៊ីវិលអន្តរជាតិ ការគំរាមកំហែងរបស់ដ្រូន មានកើនឡើងជាលំដាប់។ យានយន្តដ៏តូចមួយនេះ អាចនឹងបង្កផលវិបាកដ៏ធ្ងន់ធ្ងរខ្លាំង ប្រសិនបើអាជ្ញាធរប្រទេសនីមួយៗមិនប្រុងប្រយ័ត្នចាត់វិធានការសមស្របទេ។
ក្នុងខណៈដែលវិស័យសន្តិសុខអេឡិចត្រូនិក សន្តិសុខតាមអ៊ីនធ័រនែត កាន់តែស្វាហាប់ខ្លាំង តម្រូវការផ្នែកដ្រូនស៊ីវិលក៏បានកើនឡើងខ្លាំង។ ភ្នាក់ងារសន្តិសុខ ក្រុមហ៊ុនរកស៊ី កសិករ កសិដ្ឋាន បានផ្តើមចាប់អារម្មណ៍ជាបណ្តើរៗលើយានយន្តគ្មានមនុស្សបើកមួយនេះ សម្រាប់ជួយធ្វើជាឆ្មាំ ជាមធ្យោបាយដឹកជញ្ចូន។ មានគំនិតផ្តួចផ្តើមរួចទៅហើយ ដែលអ្នកលក់ភីហ្សា ចង់ប្រើដ្រូនដើម្បីដឹកភីហ្សាទៅឱ្យអតិថិជនដល់ផ្ទះ ដោយមិនបាច់ប្រើមនុស្ស។ នេះជាគំនិតល្អ គួរឱ្យសរសើរ ប៉ុន្តែគេមិនត្រូវបណ្តោយឱ្យការលូតលាស់ឥតឈប់នៃបច្ចេកវិទ្យា ក្លាយជាឧបសគ្គនៃសន្តិសុខអាកាសចរណ៍ឡើយ។
សមាគមអាកាសចរណ៍ស៊ីវិលអន្តរជាតិ បានអំពាវនាវឱ្យអាជ្ញាធរ រួសរាន់បង្កើត និងដាក់ច្បាប់ ឱ្យបានច្បាស់លាស់ក្នុងបម្រើបម្រាស់ដ្រូន។ ថ្វីបើសមាគមគ្មានស្ថិតិជាក់ស្តែងអំពីចំនួនដ្រូនប្រើប្រាស់នៅលើពិភពលោកមែន ប៉ុន្តែអ្នកជំនាញបានសង្កេតឃើញការគំរាមកំហែង យ៉ាងពិតៗ។ អ្នកបើកបរយន្តហោះតែងផ្តល់ព័ត៌មានកាន់ញយឡើងៗថាបានជួបដ្រូនលើអាកាស។
ដ្រូនដែលបង្កគ្រោះថ្នាក់ខ្លាំង គឺដ្រូនហោះក្នុងរយៈកម្ពស់ទាប ក្បែរអាកាសយានដ្ឋាន ដែលរំខានសុវត្ថិភាពខ្លាំងដល់យន្តហោះដឹកអ្នកដំណើរពេលចុះចត និងពេលហោះឡើង។ ម្យ៉ាងទៀត ការបញ្ជាដ្រូននេះអាចនឹងធ្វើឱ្យឆ្លង ដល់ប្រព័ន្ធត្រួតពិនិត្យអាកាសចរណ៍ផង។ បើតាមមជ្ឈមណ្ឌលសិក្សាដ្រូនអាមេរិក មានគ្រោះថ្នាក់ចំនួន ៩២១ករណីបានកើតឡើងដោយដ្រូន ក្នុងរយៈពេលពីរឆ្នាំ២០១៣-២០១៥ ក្នុងនោះ ៣៦វ៉ិះជួបគ្រោះថ្នាក់បុកយន្តហោះ តែសំណាងល្អ អ្នកបើកអាចបញ្ចៀសបានទាន់ពេលវេលា។
ក្នុងចំណោមសមាជិក១៩១ប្រទេសនៃអង្គការអាកាសចរណ៍ស៊ីវិល មានតែ៦៣ប្រទេសប៉ុណ្ណោះ បានអនុម័តច្បាប់និងវិធានប្រើប្រាស់ដ្រូន ៩កំពុងពិចារណាច្បាប់ និង៥ប្រទេសបានហាមប្រាមទាំងស្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ