ទីផ្សារហិរញ្ញវត្ថុចិនដាំក្បាល បណ្តាលមកពីការចុះផ្សាយព័ត៌មានរបស់អ្នកកាសែត ?!
ចុះផ្សាយនៅថ្ងៃ៖
ស្តាប់ - ០៤:១៣
ពេញមួយសប្តាហ៍មុន ទីផ្សារភាគហ៊ុនដាំក្បាលចុះ យ៉ាងគំហុក មិនធ្លាប់មាន បង្កបង្កើតជាក្តីព្រួយបារម្ភពេញពិភពលោក។ ភាពជ្រួលច្របល់ ដែលបើតាមអ្នកវិភាគគឺបណ្តាលមកពីចរន្តស្លន់ស្លោនៃភាពមិនទុកចិត្តគ្នា។ ពេលនេះទីផ្សារហិរញ្ញវត្ថុហាក់បានស្គាល់លំនឹងបន្តិចឡើងវិញ ប៉ុន្តែអាជ្ញាធរប៉េកាំង មិនបញ្ចប់បញ្ហាត្រឹមណេះទេ ! អ្នកធ្វើព្យុះភ្លៀង ត្រូវទទួលទណ្ឌកម្ម ! អ្នកកាសែតសេដ្ឋកិច្ចម្នាក់ ត្រូវបានចាប់ខ្លួន ពីបទផ្សព្វផ្សាយព័ត៌មានមិនពិត រហូតបង្កឱ្យមានជ្រួលច្របល់ និងបាត់សណ្តាប់ធ្នាប់ លើទីផ្សារភាគហ៊ុន។
សេដ្ឋកិច្ចដើរថយក្រោយ សេដ្ឋកិច្ចបន្ថយល្បឿន កំណើនសេដ្ឋកិច្ចទាប កំណើនសេដ្ឋកិច្ចតិចជាងការព្យាករណ៍ តិចជាងការពិត … ទីផ្សារហិរញ្ញវត្ថុចិន គ្មានទំនុកចិត្ត ដាំក្បាលចុះយ៉ាងខ្លាំងមិនធ្លាប់មាន កាលពីសប្តាហ៍មុន នេះបើតាម អ្នកជំនាញសេដ្ឋកិច្ច អ្នកឯកទេសហិរញ្ញវត្ថុ និងអ្នកវិភាគផ្សេងៗ។ ប៉ុន្តែសម្រាប់អាជ្ញាធរចិន មានភ្លើងទើបមានផ្សែង ! មានអ្នកពន្យុះទើបមានភ័យ ! ទំនងដោយឈរលើទស្សនៈនេះហើយ ទើបអាជ្ញាធរចិនត្រូវការស្វែងរកមុខបុគ្គលដែលជាអ្នកទទួលខុសត្រូវ សាបព្រោះ ធ្វើព្យុះធ្វើភ្លៀង បំប៉ោង បំភ័យព័ត៌មាន រហូតកើតមានភាពវឹកវរហិរញ្ញវត្ថុឡើង។ អាជ្ញាធរប៉េកាំង បានវែករកឃើញមុខអ្នកបង្កហេតុជាច្រើននាក់ ក្នុងនោះមានម្នាក់ជាអ្នកកាសែត។ លោក វង់ សៀលូ Wang Xiaolu អ្នកកាសែតសេដ្ឋកិច្ចម្នាក់របស់ទស្សនាវដ្តីCaijing ត្រូវបានចាប់ខ្លួនយកទៅឃុំឃាំង ពីបទបានផលិតនិងផ្សព្វផ្សាយព័ត៌មានមិនពិត។
លោក វង់ បានចុះផ្សាយអត្ថបទមួយ កាលពីខែកក្កដា អះអាងថា អាជ្ញាធរគ្រប់គ្រងអចលនាទ្រព្យកំពុងសិក្សាអំពីលទ្ធភាពដើរចេញពីមូលនិធិសាធារណៈរបស់ទីផ្សារភាគហ៊ុន។ ការព្រលយព័ត៌មានមុនហេតុការណ៍នេះ ក្នុងខណៈដែលអាជ្ញាធរប៉េកាំងចេញធ្វើអន្តរាគមន៍ទិញភាគហ៊ុនពីស្ថាប័នសាធារណៈ ដើម្បីរក្សាលំនឹងកំណត់សញ្ញាទីផ្សារផង ដូចជាជំរុញធ្វើឱ្យវិនិយោគិនចាប់ជ្រួលច្របល់ឡើង។ អត្ថបទនោះត្រូវបានគណៈកម្មការហិរញ្ញវត្ថុ ច្រានចោលភ្លាម និងចាត់ទុកថាគ្មានទំនួលខុសត្រូវ។
ក្នុងខ្សែអាត់វីដេអូ ចាក់ផ្សាយក្នុងកញ្ចក់ទូរទស្សន៍ជាតិចិន កាលពីថ្ងៃចន្ទ លោក វង់ សៀលូ Wang Xiaolu បានសម្តែងការសោកស្តាយ និងសុំទោស ដែលចុះផ្សាយអត្ថបទ ដោយខ្វះការពិចារណា បង្កជាភាពស្លន់ស្លោ និងគ្មានសណ្តាប់ធ្នាប់លើទីផ្សារហិរញ្ញវត្ថុ។ “ខ្ញុំបានដឹងរឿងរ៉ាវតាមរយៈកិច្ចសន្ទនាឯកជន ហើយខ្ញុំខ្ចប់តែងជាព័ត៌មាន ដោយគ្មានមូលដ្ឋានច្បាស់លាស់សោះ" ! ជាពាក្យសារភាព ដែលធ្វើឡើងទាំងពុំទាន់មានបទចោទប្រកាន់ ឬ មានសវនការជំនុំជម្រះក្តីអ្វីទាំងអស់។ ប៉ុន្តែនេះជាប្រពៃណីរបស់របបកុម្មុយនិស្តប៉េកាំង ដែលតុលាការស្ថិតក្រោមអំណាចនយោបាយ។
ទោះបីជា អ្នកកាសែតវ៉ង់ បានទទួលសារភាព ទាំងអស់ ! សារភាពថាផ្សព្វផ្សាយមិនពិត បង្កជាភាពស្លន់ស្លោ ដែលធ្វើទំនុកចិត្តធ្លាក់ចុះ និងបង្កការខាតបង់ច្រើនដល់ជាតិ ដល់អ្នកវិនិយោគ ក៏ដោយ ក៏ប៉ុន្តែទស្សនាវដ្តី Caijing ដែលជាកាសែតជាប់ឈ្មោះល្បីខាងធ្វើអង្កេតជាក់លាក់គួរជាទីទុកចិត្ត បានចេញផ្សាយសេចក្តីថ្លែងការណ៍មួយ នៅក្នុងទំព័រវិបសៃត៍របស់ខ្លួនការពារអ្នកកាសែតវ៉ង់ ថាទស្សនាវដ្តីការពារសិទ្ធិអ្នកកាសែត ក្នុងការបំពេញការងារស្របតាមច្បាប់។
ក្រៅអំពីអ្នកកាសែត វង់ ក៏មានមន្ត្រី ក្នុងស្ថាប័នត្រួតពិនិត្យទីផ្សារហិរញ្ញវត្ថុ និង អ្នកទទួលខុសត្រូវជាន់ខ្ពស់ដ៏សំខាន់បួននាក់ ក្នុងផ្នែកគួកជេ ត្រូវចាប់ខ្លួន។ លោក លីវ ស្ហូហ្វាន់ Liu Shufan អ្នកទទួលខុសត្រូវគណៈកម្មការត្រូតពិនិត្យហិរញ្ញវត្ថុ ក៏ទំនងជាបានធ្វើការសារភាពរួចហើយ តាមប្រព័ន្ធឃោសនាព័ត៌មានរដ្ឋ ដែលឱ្យមានរឿងរាវរសើបៗ និងសំខាន់ៗ តែងពាំពាក្យសារភាពរបស់ជនជាប់សង្ស័យទៅបង្ហាញសាធារណជន។ ក្នុងករណីលោក លីវ ស្ហួហ្វាន់នេះ អាជ្ញាធរចិនចោទប្រកាន់ថា បានប្រព្រឹត្ត បទល្មើសភាគហ៊ុនអំពើពុករលួយ ក្លែងបន្លំត្រា ដោយបានបន្លំលិខិតលែងលះ និងលិខិតបង់ពន្ធ ក្លែងក្លាយឱ្យស្រីកំណាន់ចិត្ត។
១៩៧នាក់ផ្សេងទៀត ក៏ត្រូវទទួលរងទណ្ឌកម្ម ដែរ នៅពេលប៉ូលិសចិនបើកយុទ្ធនាការពិសេសប្រឆាំងនឹងពាក្យចចាមអារាមក្នុងប្រព័ន្ធវិបសៃត៍ទាក់ទងនឹងទីផ្សារភាគហ៊ុនចិន។ តើជាទណ្ឌកម្មប៉ុណ្ណា ? គ្មានព័ត៌មានលម្អិតត្រូវទម្លាយចេញមកទេ តែបើតាមសារព័ត៌មានចិនថ្មី រាល់ការបញ្ចេញមតិនិយាយប៉ះពាល់ដល់ពាក្យថាភាគហ៊ុន ដល់គ្រោះថ្នាក់ផ្ទុះឃ្លាំងនៅក្រុងកំពង់ផែធានជីន ឬការប្រារព្ធខួប៧០ឆ្នាំនៃការបញ្ចប់សង្គ្រាមលោកលើកទីពីរ សុទ្ធតែត្រូវចាត់ទុកជាបទល្មើសឧក្រិដ្ឋទាំងអស់។
ការចាប់ខ្លួនអ្នកកាសែត ក្រោមលេសបង្កភាពវឹកវរក្នុងទីផ្សារហិរញ្ញវត្ថុ គឺគ្រាន់តែជាមធ្យោបាយមួយសម្រាប់ប៉េកាំងរឹតបន្តឹងបន្ថែមការគ្រប់គ្រង និងត្រួតពិនិត្យលំហូរព័ត៌មានតែប៉ុណ្ណោះ។ ហេតុដូច្នេះហើយ បានជាគណៈកម្មាធិការការពារអ្នកកាសែត ដែលមានទីស្នាក់ការនៅសហរដ្ឋអាមេរិក បានថ្កោលទោសការចាប់ខ្លួនអ្នកកាសែតវង់ ព្រោះយល់ថាអាជ្ញាធរក្រុងប៉េកាំងរសើបជ្រុល ! ភាគហ៊ុនក្រឡាប់ចុះឡើង អាចប៉ះពាល់ដល់ប្រយោជន៍សេដ្ឋកិច្ចជាតិ ប៉ុន្តែមិនមែនជាហេតុផលសម្រាប់មកចាប់ខ្លួនអ្នកកាសែត ដែលតាមដានសរសេរព័ត៌មានទាក់ទងនឹងវិបត្តិនេះ បញ្ចូលកន្លែងឃុំឃាំងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ