ថៃចង់ទាមទារឲ្យបារាំងប្រគល់ជនជាតិថៃបីនាក់ ដែលជាប់ចោទពីបទមើលងាយព្រះចេស្តាមហាក្សត្រ
រដ្ឋាភិបាលយោធាថៃ បានស្នើទៅកាន់ រដ្ឋាភិបាលបារាំង ថាចង់ធ្វើបត្យាប័ន ដើម្បីឲ្យរដ្ឋាភិបាលបារាំង ប្រគល់មនុស្ស៣នាក់ ត្រឡប់មកឲ្យថៃវិញ។ ជនទាំងបីនាក់ដែល បានទទួលសិទ្ធិស្នាក់នៅជាជនភៀសខ្លួន នៅក្នុងទឹកដីបារាំង ត្រូវបានតុលាការថៃ ចោទពីបទមើលប្រមាថ ព្រះចេស្តារបស់ស្ថាប័នព្រះមហាក្សត្រថៃ។ ក្នុងអំឡុង ពេលជាងមួយឆ្នាំមកនេះ រដ្ឋាភិបាលយោធាថៃ បានបញ្ចេញសាច់ដុំ តាមប្រមាញ់ បណ្តាញមនុស្ស ដែលហានរិះគន់ ស្ថាប័នព្រះមហាក្សត្រ ដោយ ឥតរើសមុខ ដែលជួនកាល ការផ្តន្ទាទោស មានកំរិតធ្ងន់ធ្ងរ ជ្រុលហួសហេតុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
លោកអគ្គបញ្ជាការ ផៃប៊ូន ឃុំឆាយា រដ្ឋមន្រ្តីក្រសួងយុត្តិធម៌ ថៃ បានធ្វើការស្នើសុំ តាមរយៈឯកអគ្គរដ្ឋទូតបារាំង ប្រចាំក្រុងបាងកកថា ថៃប្រាថ្នាចង់អនុវត្តនីតិវិធី ធ្វើបត្យាប័ន ដើម្បីសុំឲ្យរដ្ឋាភិបាលបារាំង ប្រគល់មនុស្ស៣នាក់ ដែលកំពុងតែរស់នៅលើទឹកដីបារំាង។ មនុស្សទាំងបីនាក់នោះ ទីមួយឈ្មោះ សារ៉ាន់ ឆួយឆាយ ទីពីរ ចារ៉ាន់ ឌីទាភីឆៃ និងទីបី គឺឈ្មោះ ស៊ុមសាក់ ជាមទីរ៉ាក់សាគុន។ អ្នកទាំងបីនាក់នេះ ត្រូវបានតុលការថៃ ចោទប្រកាន់ពីបទ មើលងាយស្ថាប័នព្រះមហាក្សត្រ ដែលទោសនេះអាចត្រូវជាប់គុក ចំនួន១៥ឆ្នាំ។
ទោះបីជាយ៉ាងណា ស្ថានទូតបារាំងប្រចាំព្រះរាជាណាចក្រថៃ មិនបានធ្វើអត្ថាធិប្បាយអ្វីទាំងអស់។ គួររំលឹកផងដែរថា កាលពីខែមិថុនកន្លងទៅ រដ្ឋាភិបាលថៃ បានស្នើសុំធ្វើបត្យាប័នដូចគ្នាដែរ ទៅកាន់រដ្ឋាភិបាលណូវ៉ែលហ្សេឡង់ ដើម្បីទាមទារឲ្យប្រគល់ជនជាតិថៃម្នាក់ តែត្រូវបានណូវ៉ែលហ្សេឡង់បដិសេធ។
គួរបញ្ជាក់ថា ចាប់តាំងពីបានកាន់កាប់អំណាច ដោយកម្លាំងយោធា រដ្ឋាភិបាលថៃ បានដេញតាមប្រមាញ់ បុគ្គលណា ដែលហ៊ានរិះគន់ ព្រះមហាក្សត្រ នឹងក្រុមគ្រួសារព្រះញាតិវង្ស ជាពិសេសនៅតាមបណ្តាញសង្គម ដូចជាហ្វេសប៊ុក ជាដើម។ រដ្ឋាភិបាលយោថា ថែមទាំងបានតាក់តែងច្បាប់ថ្មី ដោយបានកំណត់ទោសយ៉ាងធ្ងន់ទៀតផង។
គ្រាន់តែពាក់កណ្តាលឆ្នាំ២០១៥នេះ មានករណីចោទប្រកាន់ពីបទមើលងាយព្រះចេស្តាព្រះមហាក្សត្រ ចំនួន ៥៦ករណី នៅចំពោះមុខតុលាការ បើប្រៀបធៀបទៅឆ្នាំ២០១៤ ដែលមានត្រឹមតែ២ករណីប៉ុណ្ណោះ។ ការផ្តន្ទាទោស ដែលត្រូវបានអង្គការសិទ្ធិមនុស្សនានា រិះគន់ ព្រោះវាមានលក្ខណៈធ្ងន់ធ្ងរជ្រុលហួសហេតុ ហើយវាប្រាសចាសទាំងស្រុង ពីគោលការណ៏សិទ្ធិសេរីភាព ក្នុងការបញ្ចេញមតិរបស់មនុស្សទាំងពួង។
ជាក់ស្តែង កាលពីខែមិថុនា ជនជាតិថៃម្នាក់ ដែលមានជំងឺវិកលចរិក ត្រូវបានគេចាប់ដាក់គុក៣ឆ្នាំ បន្ទាប់ពីជននេះ បានជេរប្រមាថក្រុមគ្រួសារស្តេចថៃ។ ហើយកាលពីខែ មីនា បុរសម្នាក់ត្រូវបានកាត់ទោស ឲ្យជាប់គុក២៥ឆ្នាំ ដោយគ្រាន់តែបានសរសេសារ ដែលមានលក្ខណៈរិះគន់ស្ថាប័នព្រះមហាក្សត្រ នៅលើទំព័រហ្វេសប៊ុក។ គិតៗទៅ ស្ថាប័នព្រះមហាក្សត្រថៃ ប្រហែលជាស្អុយរលួយ ដង្កូវចោះខ្លាំងណាស់ហើយ បានជារដ្ឋាភិបាលយោធាខំប្រឹងបិទបាំង ខ្លាំងដល់ម្លឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ