អាមេរិក និងអសប ថ្កោលទោសថៃ ដែលចាប់បញ្ជូនជនជាតិអ៊ុយហ្គួរទៅឲ្យប្រទេសចិន
រដ្ឋាភិបាលថៃ កាលពីថ្ងៃសុក្រ ទី ១០កក្កដា បានប្រកាសបិទទ្វារ ជាបណ្តោះអាសន្ន ស្ថានទូត និងកុងស៊ុលរបស់ខ្លួន ប្រចាំ នៅតួកគី។ កាលពីយប់ថ្ងៃពុធ ក្រុមបាតុករតួកគីប្រឆាំងចិន បានលើកគ្នា ទៅដុត វាយបំផ្លាញ កុងស៊ុលថៃ នៅក្រុងអ៊ីស្តង់ប៊ូល បន្ទាប់ពីអាជ្ញាធរថៃ បានប្រកាសថា ខ្លួនបានបញ្ជូនជនជាតិអ៊ុយហ្គួរ ១០០នាក់ទៅ ឲ្យប្រទេសចិន កាលពីថ្ងៃពុធ។ ចំណាត់ការរបស់រដ្ឋាភិបាលថៃ បានទទួលការថ្កោលទោស រិះគន់ពីអង្គការសហប្រជាជាតិ និងសហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
អ្នកនាំពាក្យរបស់រដ្ឋាភិបាលថៃ បាននិយាយកាលពីថ្ងៃសុក្រថា ស្ថានទូត និងកុងស៊ុលត្រូវបិទជាបណ្តោះអាសន្ន និងរង់ចាំមើលស្ថានការណ៍វិវឌ្ឍ ទៅមុខ នៅក្នុងប្រទេសតួកគី។ យ៉ាងណាក៏ដោយ រដ្ឋាភិបាលថៃ បានអំពាវនាវឲ្យប្រជាជនរបស់ខ្លួន ប្រុងប្រយ័ត្នខ្លួនជានិច្ច ក្នុងពេលធ្វើដំណើរ នៅប្រទេសតួកគី។
កាលពីថ្ងៃ យប់ថ្ងៃពុធ បាតុករតួកគី បានលើកគ្នាទៅដុត វាយបំផ្លាញកុងស៊ុល ថៃ នៅទីក្រុងអ៊ីស្តង់ប៊ូល បន្ទាប់ពីពួកគេបានដំណឹងថា រដ្ឋាភិបាលថៃ បានបញ្ជូនជនជាតិអ៊ុយហ្គួរ និយាយភាសាតួកគី ទៅប្រទេសចិន។ នៅតួកគី ប្រជាជន ធ្វើបាតុកម្មប្រឆាំងចិន ដែលគេចោទថា បានបិទសិទ្ធិ សេរីភាព ខាងសាសនា និងវប្បធម៌ ទៅលើប្រជាជនអ៊ុយហ្គួរ នៅខេត្តស៊ីនជាំង។
នៅថ្ងៃព្រហស្បតិ៍ ជាលើកទី១ អ្នកនាំពាក្យរដ្ឋាភិបាល ថៃ បាននិយាយថា គេបានបញ្ជូនជនជាតិអ៊ុយហ្គួរ ១០០នាក់ទៅប្រទេសចិន។ ចិនដែលបើតាមអ្នកនាំពាក្យ រដ្ឋាភិបាល បានធានាថា ជនជាតិអ៊ុយហ្គួរនឹងត្រូវដោះលែង បើសិនគេមិនរកឃើញមានកំហុស។ ចំណាត់ការរបស់របបសឹកថៃ បានទទួលការរិះគន់ និងថ្កោសទោស ពីអង្គការសិទ្ធិមនុស្ស អង្គការសហប្រជាជាតិ និងជាពិសេស សហរដ្ឋអាមេរិក ដែលបានសំដែងការខកចិត្ត នឹងរដ្ឋាភិបាលថៃ។ នៅក្នុងសេចក្តីថ្លែងការណ៍របស់ក្រសួងការបរទេសអាមេរិក គេបានសរសេរថា អាមេរិកថ្កោលទោស ថៃ ដែលបានចាប់បញ្ជូនទាំងបង្ខំ ជនជាតិអ៊ុយហ្គួរទៅប្រទេសចិន ជាទី ដែលពួកគេនឹងប្រឈមនឹងការធ្វើបាប ពីអាជ្ញាធរ។
អ្នកនាំពាក្យរបស់អង្គការសហប្រជាជាតិ ទទួលបន្ទុក ផ្នែកសិទ្ធិមនុស្ស និយាយថា ការបញ្ជូនជនជាតិអ៊ុយហ្គួរ ដោយបង្ខំ គឺខុសនឹងច្បាប់អន្តរជាតិ ដែលបានហាមមិនឲ្យគេចាប់បញ្ជូនមនុស្សមួយក្រុមទៅកន្លែងមួយ ដែលពួកគេអាចប្រឈមនឹងការរំលោភសិទ្ធិមនុស្ស។ នៅថ្ងៃសុក្រ អ្នកនាំពាក្យ រដ្ឋាភិបាលថៃ និយាយថា មន្រ្តីជាន់ខ្ពស់នឹងធ្វើដំណើរទៅប្រទេសចិន នៅសប្តាហ៍ខាងមុខ ដើម្បី ផ្ទៀងផ្ទាត់ តាមដានមើលជនជាតិអ៊ុយហ្គួរ ដែលទើបត្រូវគេបញ្ជូនទៅប្រទេសចិន។
កន្លងមក ជនជាតិអ៊ុយហ្គួរ ជាច្រើនរយនាក់ ដែលបានលួចចាកចេញពីការគាបសង្កត់របស់អាជ្ញាធរចិន នៅខេត្តស៊ីនជាំង បានធ្វើដំណើរឆ្លងកាត់អាស៊ីខាងត្បូង សំដៅ ប្រទេសតួកគី។ ប៉ុន្តែ ក្រោមសម្ពាធរបស់ទីក្រុងប៉េកាំង ថៃ កម្ពុជា ម៉ាឡេស៊ី និងប៉ាគីស្ថានបានចាប់បញ្ជូន ពួកគេ ទៅ ឲ្យប្រទេសចិនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ