បស្ចឹមលោកពង្រឹងទណ្ឌកម្ម ឯចិនពង្រឹងកិច្ចសហប្រតិបត្តិការជាមួយរុស្ស៊ី
ក្នុងខណៈដែលក្រុមប្រទេសលោកខាងលិច ជាពិសេសបណ្តាប្រទេសនៅអឺរ៉ុប កំពុងគិតគូរពង្រឹងទណ្ឌកម្មសេដ្ឋកិច្ចនិងការទូត ប្រឆាំងរុស្ស៊ី ព្រោះសំណុំរឿងអ៊ុយក្រែន ប្រទេសចិនវិញ បានប្រកាសនៅថ្ងៃអាទិត្យនេះ សន្យាបង្កើនកិច្ចសហប្រតិបត្តិការជាមួយម៉ូស្គូ។ សម្រាប់ប៉េកាំង ការពង្រឹងកិច្ចសហប្រតិបត្តិការជាមួយរុស្ស៊ី គឺជា “ការចាំបាច់” របស់ប្រទេសទាំងពីរ។ នេះបើតាមប្រសាសន៍របស់លោករដ្ឋមន្ត្រីការបរទេសចិន ក្នុងសន្និសិទកាសែត នាឱកាសប្រជុំសភាប្រជាជនប្រចាំ នៅទីក្រុងប៉េកាំង។
ចុះផ្សាយនៅថ្ងៃ៖
ពាក្យថា "ចាំបាច់" បានគ្រលាស់ចេញពីមាត់រដ្ឋមន្ត្រីការបរទេសចិន ជាច្រើនលើកច្រើនសា ក្នុងសន្និសីទកាសែតថ្ងៃនេះ មិនថាក្នុងទំនាក់ទំនងជាមួយរុស្ស៊ី ឬសំណុំរឿងនៅសមុទ្ទចិនខាងត្បូងទេ។
កិច្ចសហប្រតិបត្តិការ ចិននិងរុស្ស៊ី ជាកិច្ចសហប្រតិបត្តិការដែលត្រូវកាល ដែលចាំបាច់ សម្រាប់ភាគីទាំងសងខាង ព្រោះបានផ្តល់ប្រយោជន៍ល្អ ដល់គ្នាទៅវិញទៅមក ! នេះបើយើងប្រើតាមភាសារបស់រដ្ឋមន្ត្រីការបរទេសចិន លោក វ៉ង់ យី (Wang Yi)។ ពាក្យថាចាំបាច់ ជាបឋមគឺការផ្តល់លទ្ធផលផ្នែកសេដ្ឋកិច្ច។ ចិននិងរុស្ស៊ី ចង់ធ្វើការរួមគ្នាដើម្បីបង្កើនទំហំផ្តោះប្តូរពាណិជ្ជកម្ម ឱ្យលើស ១០០ពាន់លានដុល្លារ (ឆ្នាំ២០១៤ បានឡើងដល់៩៤,៥ពាន់លានដុល្លាររួចហើយ)។
ម្យ៉ាងទៀត ប៉េកាំងនិងម៉ូស្គូ ត្រូវតែបន្តពង្រឹងពង្រីកកិច្ចសហប្រតិបត្តិការទ្វេភាគី ចាំបាច់ ផ្នែកយុទ្ធសាស្ត្រ។ សម្រាប់ថ្នាក់ដឹកនាំចិន ចិននិងរុស្ស៊ីមានតួនាទី ជាអ្នករក្សាសន្តិភាពនិងសន្តិសុខពិភពលោក។ ដូច្នេះ ក្នុងនាមជាប្រទេសដែលមានប្រពៃណីធ្លាប់គាំទ្ររុស្ស៊ី នៅអង្គការសហប្រជាជាតិ នៅក្រុមប្រឹក្សាសន្តិសុខ (ជាសមាជិកអចិន្ត្រៃយ៍ដូចគ្នា) ចិនត្រូវធ្វើខ្លួនជាមិត្តល្អ ចេះជួយគ្នាក្នុងគ្រាក្រ!
រុស្ស៊ីរងទណ្ឌកម្មពីបស្ចឹមលោក ព្រោះវិបត្តិអ៊ុយក្រែនផង តម្លៃប្រេងឆៅបានធ្លាក់ដាំក្បាលចុះទៀត សេដ្ឋកិច្ចរុស្ស៊ី ត្រូវរងគ្រោះខ្លាំង។ ប៉ុន្តែទំនាក់ទំនងចិនរុស្ស៊ី ទាំងផ្នែកពាណិជ្ជកម្ម និងហិរញ្ញវត្ថុបានប្រសើរឡើងជានិច្ច ! ចិនស្វែងរកប្រភពថាមពលបំរុង និងលាតសន្ធឹងទីផ្សារ ឱ្យកាន់តែទូលាយ។ គ្រាន់តែមួយឆ្នាំកន្លងទៅសោះ ចិននិងរុស្ស៊ី បានចុះហត្ថលេខាលើកិច្ចព្រមព្រៀង ដល់ទៅជាង៣០ ក្នុងវិស័យប្រេង ទូរគមនាគមន៍ ឬសាងសង់ផ្លូវដែក។ កិច្ចព្រមព្រៀងឧស្ម័នទំហំ ៤០០ពាន់លានដុល្លារដែលចរចាអស់ពេលជាង១០ឆ្នាំ ក៏ទើបសម្រេចចុះហត្ថលេខាកាលពីខែឧសភាឆ្នាំទៅ … ក្នុងមួយឆ្នាំ២០១៤ ប្រធានាធិបតីចិននិងរុស្ស៊ី បានជួបគ្នាមិនតិចជាង៥ដងទេ។ សឹងនិយាយបានថា នៅពេលដែលទំនាក់ទំនងជាមួយបស្ចឹមលោក សហរដ្ឋអាមេរិក តានតឹង មិនថាដោយមូលហេតុនយោបាយឬសេដ្ឋកិច្ច តែងតែបានបង្ខិត ចិននិងរុស្ស៊ី ឱ្យចូលជិតគ្នាកាន់តែកៀក។
អតីតគូសត្រូវនឹងគ្នា ក្នុងសម័យសង្គ្រាមត្រជាក់ ដឹងថាត្រូវការគ្នាទៅវិញទៅមក ជាចាំបាច់ បើចង់ ក្លាយជាដៃគូយុទ្ធសាស្ត្រ មានឥទ្ធិពលក៏កាន់ខ្ទរខ្ទារលើឆាកអន្តរជាតិ។
ភាពចាំបាច់ នៃការអភិវឌ្ឍន៍តំបន់ប្រជុំកោះនៅសមុទ្ទចិនខាងត្បូង
ចិនទាមទារចង់គ្រប់គ្រង ៩០%នៃដែនទឹកនៅសមុទ្ទចិនខាងត្បូង តែវៀតណាម ហ្វីលីពីន ម៉ាឡេស៊ី ព្រុយណេ និងតៃវ៉ាន់ ក៏ចង់បានចំណែកគ្រប់គងតំបន់ដែនទឹកដែលប្រកបដោយធនធានធម្មជាតិ និងរ៉ែឧស្ម័នក្រោមដី ព្រមទាំងជាផ្លូវចរាចរណ៍នាវាអន្តរជាតិ នេះដែរ។
បើបានរូបភាពផ្កាយរណប ចិន បានផ្តើម ការដ្ឋាននិងបង្កើនសកម្មភាពសាងសង់ មួយជាប្រាំ នៅតាមកូនកោះត្រង់តំបន់ប្រជុំកោះស្ព្រាតលី។ ចិនបានទទួលស្គាល់ថាមានស្ថាបនាហេដ្ឋារចនាសម្ព័ន្ធនេះ មែន ព្រោះជា ការចាំបាច់! នេះបើតាមសម្តីរបស់លោក វ៉ង់ យី រដ្ឋមន្ត្រីការបរទេសចិន ដែលអះអាងថា ជាការងារដែលគ្មានប៉ះពាល់ដល់ភាគី ឬប្រទេសផ្សេងទេ។ ចិនមិនដូចជាប្រទេសខ្លះ (ប្រទេសដែលមានពាក់ព័ន្ធក្នុងជម្លោះ) ដែលសាងសង់ដោយខុសច្បាប់លើដីរបស់គេឡើយ ដូច្នេះចិនមិនទទួលយកសេចក្តីថ្លែងការណ៍គ្មានមូលដ្ឋានទេ។
នយោបាយដាច់ខាតរបស់ចិនទាក់ទងនឹងជម្លោះដែនទឹកនេះ បានធ្វើឱ្យសហរដ្ឋអាមេរិក ជប៉ុន ក៏ដូចជាបណ្តាប្រទេសផ្សេងទៀតក្នុងតំបន់មានជម្លោះជាមួយចិនព្រួយបារម្ភ អំពីមហិច្ឆតារបស់ប៉េកាំង ចេញច្បាប់តែម្នាក់ឯង មិនខ្វល់នឹងច្បាប់អន្តរជាតិ។ ប្រទេសខ្លះបានស្វែងរកការពារពីសហរដ្ឋអាមេរិកផង បើទោះជាធ្លាប់ជាសត្រូវចាស់ក៏ដោយ។ ប៉ុន្តែ សម្រាប់ចិនវិញ ចិនមិនចង់ឃើញអាមេរិកលូកលាន់ច្រើននៅអាស៊ីទេ។ នយោបាយផ្តល់អាទិភាពដល់តំបន់អាស៊ី របស់លោកអូបាម៉ា ត្រូវបានចិនយល់ជាការគំរាមកំហែងចិនផ្ទាល់។ ហេតុដូច្នេះហើយបានចិនចាំបាច់ត្រូវសហការជាមួយរុស្ស៊ី ដើម្បីបង្ហាញកម្លាំងរួម។ ធ្វើសមយុទ្ធរួមជាមួយរុស្ស៊ី ក្នុងសមុទ្ទចិនខាងត្បូង បង្កើនកញ្ចប់ថវិកាយោធាជារៀងរាល់ឆ្នាំ។ ព្រោះអ្វី ? ព្រោះតែចិនចង់តាំងខ្លាំងជាអ្នកមានសិទ្ធិ មានអំណាចម្នាក់ នៅប៉ាស៊ីហ្វិក។
បើតាមប្រសាសន៍លោកវ៉ង់ ចិនចង់ធ្វើឱ្យប្រព័ន្ធអន្តរជាតិបានប្រសើរឡើង ចង់ឱ្យប្រទេសកំពុងមានសេដ្ឋកិច្ចលូតលាស់ខ្លាំងក៏មានពាក្យ មានអំណាចច្រើនជាងមុន មិនមែនសម្រេចតែលើក្រុមមហាអំណាចមួយក្តាប់តូចឡើយ។ ចិនបានប្រៀបប្រដូចសណ្តាប់ធ្នាប់ពិភពលោក និងប្រព័ន្ធអង្គការសហប្រជាជាតិ នៅនឹងនាវាដ៏ធំមួយ ដែលមានផ្ទុកអ្នកដំណើរជាង១៩០ប្រទេស។ ចិនមិនចង់ជាន់ឱ្យផ្អៀងក្រឡាប់ទូកទេ តែចិនចង់សហការជាមួយអ្នកដំណើរផ្សេងទៀត ដើម្បីឱ្យនាវាអាចរំកិលទៅមុខបានដោយសុវត្ថិភាព និងដោយត្រូវទិសល្អ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ