តើចិននិងរុស្ស៊ីអាចនឹងឈានទៅបង្កើតសម្ព័ន្ធភាពនឹងគ្នាឬ?
ចុះផ្សាយនៅថ្ងៃ៖
ស្តាប់ - ០៣:៣៦
នៅក្នុងមួយរយៈកាលចុងក្រោយនេះ គេសង្កេតឃើញថា ទំនាក់ទំនង រវាងចិន និងរុស្ស៊ីមានភាពល្អូកល្អឺនគួរឲ្យកត់សម្គាល់។ ភាពល្អូកល្អឺនដែលឆ្លុះបញ្ចាំងតាមរយៈការចុះកិច្ចសន្យាផ្គត់ផ្គង់ឧស្ម័នធម្មជាតិ ការធ្វើសមយុទ្ធទ័ពជើងទឹករួមគ្នា និងការគាំទ្រគ្នាទៅវិញទៅមក នៅក្នុងក្រុមប្រឹក្សាសន្តិសុខអ.ស.ប។ តើទំនាក់ទំនងល្អូកល្អឺននេះអាចនឹងធ្វើឲ្យចិន និងរុស្ស៊ី អាចឈានទៅដល់ការបង្កើតជាសម្ព័ន្ធភាពនឹងគ្នាដែរឬទេ?
ចិន និងរុស្ស៊ី អតីតគូសត្រូវ នៅក្នុងសង្រ្គាមត្រជាក់ បានចេញសេចក្តីថ្លែងការណ៍រួមមួយ កាលពីពេលថ្មីៗនេះ ដែលមានខ្លឹមសារជារួមថា ទំនាក់ទំនងទ្វេភាគី រវាងចិន និងរុស្ស៊ី បានឈានដល់ដំណាក់កាលថ្មីមួយហើយ គឺទំនាក់ទំនងដៃគូជាយុទ្ធសាស្រ្ត ដែលនឹងអាចជួយឲ្យប្រទេសទាំងពីរបង្កើនឥទ្ធិពលនៅលើឆាកអន្តរជាតិ។
កាលពីចុងខែឧសភាកន្លងទៅនេះ នៅក្នុងអំឡុងដំណើរទស្សនកិច្ចរបស់លោកប្រធានាធិបតីរុស្ស៊ី វ៉្លាឌីមៀរ ពូទីន នៅក្នុងប្រទេសចិន ប្រទេសទាំងពីរបានចុះកិច្ចសន្យាផ្គត់ផ្គង់ឧស្ម័នធម្មជាតិរុស្ស៊ីទៅឲ្យចិន សម្រាប់រយៈពេល ៣០ឆ្នាំ ក្នុងទំហំទឹកប្រាក់រហូតដល់ទៅ ៤០០ពាន់លានដុល្លារ។
ក្នុងពេលជាមួយគ្នា ចិន និងរុស្ស៊ី បានបើកធ្វើសមយុទ្ធទ័ពជើងទឹករួមគ្នា នៅក្នុងសមុទ្រចិនខាងកើត ក្បែរតំបន់ប្រជុំកោះជាប់ជម្លោះជាមួយជប៉ុន ដែលជាការបង្ហាញឲ្យឃើញពីជំហរគាំទ្ររបស់រុស្ស៊ី ចំពោះចិន នៅក្នុងជម្លោះដែនសមុទ្រជាមួយប្រទេសជិតខាង។ នៅឯទីក្រុងញូវយ៉កឯណោះវិញ ចិនក៏បានបង្ហាញនូវការគាំទ្រចំពោះរុស្ស៊ីវិញដែរ នៅក្នុងក្រុមប្រឹក្សាសន្តិសុខអ.ស.ប តាមរយៈការបោះឆ្នោតវ៉េតូជាច្រើនលើក ទៅលើសេចក្តីសម្រេច ស្តីពីវិបត្តិស៊ីរី ស្នើឡើងដោយប្រទេសលោកខាងលិច។
នៅចំពោះមុខការវិវឌ្ឍយ៉ាងលឿននៃទំនាក់ទំនងចិន-រុស្ស៊ីនេះ អ្នកខ្លះបានចោទជាសំណួរថា តើមានកត្តាអ្វីដែលជំរុញឲ្យប្រទេសទាំងពីរចាប់ផ្តើមមានទំនាក់ទំនងល្អូកល្អឺននឹងគ្នាខ្លាំងបែបនេះ ហើយថា តើប្រទេសទាំងពីរអាចនឹងឈានទៅដល់ការបង្កើតសម្ព័ន្ធភាពជាផ្លូវការនឹងគ្នាដែរឬក៏យ៉ាងណា?
គេអាចមើលឃើញនូវមូលហេតុសំខាន់ពីរ ដែលជំរុញឲ្យចិន និងរុស្ស៊ីខិតខំរឹតបន្តឹងទំនាក់ទំនងនឹងគ្នា នៅក្នុងពេលបច្ចុប្បន្ននេះ។
មូលហេតុទីមួយ គឺភាពតានតឹងយ៉ាងខ្លាំងមិនធ្លាប់មាន រវាងរុស្ស៊ី និងប្រទេសលោកខាងលិច ជុំវិញវិបត្តិនៅអ៊ុយក្រែន។ ការចុះកិច្ចសន្យាផ្គត់ផ្គង់ឧស្ម័នទៅឲ្យចិនអាចធ្វើឲ្យរុស្ស៊ីកាត់បន្ថយការពឹងផ្អែកទៅលើទីផ្សារ នៅអឺរ៉ុប ក្នុងករណីមានទណ្ឌកម្មពីលោកខាងលិច ដោយសារតែវិបត្តិអ៊ុយក្រែន។ កិច្ចសន្យានេះក៏ផ្តល់ផលប្រយោជន៍យ៉ាងច្រើនផងដែរចំពោះចិន ដែលកំពុងតែត្រូវការឧស្ម័នធម្មជាតិ។
មូលហេតុទីពីរ ដែលជំរុញឲ្យចិន និងរុស្ស៊ីមានទំនាក់ទំនងល្អូកល្អឺននឹងគ្នានៅពេលនេះ គឺផលប្រយោជន៍ជាយុទ្ធសាស្រ្តរួមគ្នា សម្រាប់រយៈពេលវែង។ ផលប្រយោជន៍ជាយុទ្ធសាស្រ្តនេះ គឺការទប់ទល់នឹងឥទ្ធិពលរបស់អាមេរិក។ នៅក្នុងពេលដែលរុស្ស៊ីកំពុងប្រឈមមុខដាក់គ្នាជាមួយអាមេរិក និងសម្ព័ន្ធមិត្ត ជុំវិញវិបត្តិអ៊ុយក្រែន ចិនវិញក៏កំពុងតែមិនសប្បាយចិត្តនឹងអាមេរិកដែរ ចាប់តាំងពីលោកអូបាម៉ាមានគម្រោងបង្កើនឥទ្ធិពល និងវត្តមានកងទ័ព នៅក្នុងតំបន់អាស៊ីប៉ាស៊ីហ្វិក ដែលចិនយល់ថា ជាយុទ្ធសាស្រ្ត ដើម្បីប្រឆាំងចិន។ ជម្លោះដែនសមុទ្រ រវាងចិន និងបណ្តាប្រទេសជិតខាង ដែលទទួលបានការគាំទ្រពីសហរដ្ឋអាមេរិក ក៏តែងតែធ្វើឲ្យចិន និងអាមេរិក ប៉ះទង្គិចពាក្យសម្តីគ្នាជារឿយៗផងដែរ។
ការប្រឈមមុខនឹងគូប្រជែងរួមគ្នានេះហើយ ដែលធ្វើឲ្យអ្នកខ្លះយល់ថា ទំនាក់ទំនង រវាងចិន និងរុស្ស៊ីអាចនឹងវិវឌ្ឍរហូតទៅដល់ការបង្កើតជាសម្ព័ន្ធភាពជាផ្លូវការ ដើម្បីរួមកម្លាំងគ្នាទប់ទល់នឹងអាមេរិក។
ក៏ប៉ុន្តែ គេក៏មិនត្រូវភ្លេចដែរថា ថ្វីដ្បិតតែចិន និងរុស្ស៊ីមានគូប្រជែងរួមគ្នាក៏ពិតមែន គឺសហរដ្ឋអាមេរិក តែចិន និងរុស្ស៊ី ក៏នៅតែជាគូប្រជែងនឹងគ្នាដ៏ធំនៅឡើយដែរ។ រហូតមកទល់នឹងពេលនេះ ចិន និងរុស្ស៊ី ដែលជាអតីតគូសត្រូវនៅក្នុងសង្រ្គាមត្រជាក់ នៅតែមិនទុកចិត្តគ្នា ហើយលើសពីនេះទៅទៀត ប្រទេសទាំងពីរកំពុងតែប្រជែងដណ្តើមឥទ្ធិពលគ្នា នៅក្នុងតំបន់អាស៊ីកណ្តាល។ ប្រទេសនៅក្នុងតំបន់អាស៊ីកណ្តាល គឺជាប្រទេសសម្បូរទៅដោយធនធានធម្មជាតិ ដែលចិនត្រូវការ ក៏ប៉ុន្តែ ជាប្រទេសអតីតសហភាពសូវៀត ដែលរុស្ស៊ីតែងតែចាត់ទុកថាជាដែនឥទ្ធិពលផ្តាច់មុខរបស់ខ្លួន។
ការមិនទុកចិត្តគ្នា និងការមានផលប្រយោជន៍យុទ្ធសាស្រ្តប្រឆាំងគ្នានេះហើយ ដែលអាចជាឧបសគ្គ ពិបាកនឹងឲ្យចិន និងរុស្ស៊ី ឈានទៅបង្កើតសម្ព័ន្ធភាពផ្លូវការនឹងគ្នាមួយបាន។ ក៏ប៉ុន្តែ នេះក៏មិនមែនមានន័យថា ចិន និងរុស្ស៊ី ប្រាកដជាគ្មានផ្លូវនឹងបង្កើតសម្ព័ន្ធភាពនឹងគ្នានោះដែរ ហើយប្រសិនបើមានប្រទេសណាមួយដែលអាចជំរុញឲ្យប្រទេសទាំងពីរនេះបង្កើតសម្ព័ន្ធភាពជាផ្លូវការនឹងគ្នានោះ គឺសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ