កូរ៉េខាងជើងតាំងបង្ហាញគ្រាប់មីស៊ីលខ្នាតវែងរបស់ខ្លួនក្នុងក្បួនព្យុហយាត្រាយោធា
នៅក្នុងឱកាសព្យុហយាត្រាកងយោធាយ៉ាងអធឹកអធមមួយនៅថ្ងៃសៅរ៍នេះដើម្បីប្រារព្ធខួបទី៦០ឆ្នាំនៃការបញ្ចប់សង្គ្រាមកូរ៉េ ប្រទេសកូរ៉េខាងជើងបានដាក់តាំងបង្ហាញគ្រាប់មីស៊ីលខ្នាតវែងរបស់ខ្លួនសម្ញែងឲ្យគេឃើញផងដែរ។ ពិធីនេះត្រូវបានប្រារព្ធឡើងក្រោមក្រសែភ្នែករបស់ លោក គឹម ជុងអ៊ុន មេដឹកនាំវ័យក្មេងនៃទីក្រុងព្យុងយ៉ាង និងអ្នកកាសែតអន្តរជាតិមួយចំនួនដែលត្រូវបានអញ្ជើញឲ្យចូលរួម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
គ្រាប់មីស៊ីលដែលសណ្តោងដោយរ៉ឺម៉កត្រូវបានគេអូសឆ្លងកាត់ទីលាន Kim Il-Sung នៃទីក្រុងព្យុងយ៉ាងដោយមានការចូលរួមក្បួនព្យុហយាត្រាពីសំណាក់កងយោធារាប់ពាន់នាក់ ។ នៅពេលដែលលោក គឹម ជុងអ៊ុន បានឆ្លងកាត់ពីមុខពួកគេ បណ្តាជនកូរ៉េខាងជើងដែលបានចូលរួមក្នុងពិធីនោះបានស្រែកស្រុះគ្នាថា«ពួកយើងប្តូរជីវិតដើម្បីការពារ គឹម ជុងអ៊ុន»។
ក្រៅពីគ្រាប់មីស៊ីលខ្នាតវែង ក៏មានដែរប្រភេទគ្រាប់មីស៊ីលផ្សេងទៀត និងគ្រឿងសព្វាវុធធុនធ្ងន់ជាច្រើនដូចជា រថក្រោះ និងជើងសម្រាប់បាញ់គ្រាប់រ៉ូកែត ព្រមទាំងកាំភ្លើងធំជាច្រើនប្រភេទទៀតក៏ត្រូវបានតាំងបង្ហាញផងដែរខណៈដែលឯយន្តហោះប្រដេញ និងឧទ្ធម្ភាចក្រជាច្រើនបានហោះប្រដេញនៅលើអាកាស។
លោក គឹម ជុងអ៊ុន ក្នុងសម្លៀកបំពាក់ម៉ៅនិយមបានដើរតាមកម្រាលព្រំពណ៌ក្រហមឡើងលើវេទិកាក្រោមការស្វាគមន៍ និងសំឡេងភ្លេងត្រែទ័ពយ៉ាងកងរំពង។ ប៉េងប៉ោង និងក្រណាត់ដែលរម្លេចដោយពាក្យស្លាកជាច្រើនត្រូវបានបង្ហោះក្រោមផ្ទៃមេឃបាំងបិទដោយពពក។ ទីលាន Kim Il-Sung ទាំងមូលត្រូវបានរម្លេចដោយទង់ជាតិកូរ៉េខាងជើងយ៉ាងព្រោងព្រាត។
គួរបញ្ជាក់ថា កិច្ចព្រមព្រៀងឈប់បាញ់កាលពីថ្ងៃទី២៧ កក្កដា ឆ្នាំ ១៩៥៣ បានបិទបញ្ចប់សង្គ្រាមដែលបានអូសបន្លាយរយៈពេលបីឆ្នាំនៅក្នុងឧបទ្វីបកូរ៉េ។ ទីបំផុត ប្រទេសកូរ៉េ បានបែងចែកជាពីរគឺកូរ៉េខាងជើងជាសម្ពន្ធ័មិត្តរបស់ចិន និងរុស្ស៊ី និងកូរ៉េខាងត្បូងជាសម្ពន្ធ័មិត្តរបស់សហរដ្ឋអាមេរិក។ ក្បួនព្យុហយាត្រានេះបានប្រព្រឹត្តទៅក្រោមការតាមដានយ៉ាងយកចិត្កទុកដាក់ពីសំណាក់បរទេសដើម្បីចង់ដឹងថា តើកូរ៉េខាងជើងបានអភិវឌ្ឍកម្មវិធីមីស៊ីលរបស់ខ្លួនអ្វីខ្លះ។
ការប្រារព្ធខួប ៦០ ឆ្នាំ នៃការបញ្ចប់សង្គ្រាមកូរ៉េពេលនេះក៏បានធ្វើឡើងខណៈដែលកូរ៉េទាំងពីរកំពុងចរចាគ្នាដើម្បីឲ្យមានភាពស្ងប់ស្ងាត់បន្តិចបន្ទាប់ពីភាពតានតឹងដែលកើតឡើងដោយសារការបាញ់សាកល្បងយានអវកាសដែលទីក្រុងសេអ៊ូលចាត់ទុកថា ជាការបាញ់សាកល្បងគ្រាប់មីស៊ីលឆ្លងទ្វីបរបស់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ