ទស្សនកិច្ចលោកនាយករដ្ឋមន្ត្រីចិន Wen Jiabao នៅរុស្ស៊ី
ក្នុងក្របខ័ណ្ឌទស្សនកិច្ចនេះ ពីថ្ងៃទី៦ដល់ទី៨វិច្ឆិកា លោក Wen Jiabao បានចូលរួមក្នុងកិច្ចប្រជុំជាន់ថ្នាក់ប្រមុខរដ្ឋាភិបាល “អង្គការសហប្រតិបត្តិការក្រុងសៀងហៃ” ហៅកាត់ថា OCS អង្គការដែលឆ្នាំនេះមានវ័យគម្រប់បាន១០ឆ្នាំ និងដែលមាន៦ប្រទេសជាសមាជិកនាំមុខដោយចិន និងរុស្ស៊ីតែម្តង។ បន្ទាប់មក លោក Wen Jiabao បានធ្វើជំនួបទ្វេភាគីជាមួយលោកនាយករដ្ឋមន្ត្រីរុស្ស៊ី Poutine សំដៅពង្រឹង ”ភាពជាដៃគូយុទ្ធសាស្ត្រ ចិន-រុស្ស៊ី”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
គួររំលឹកថា“អង្គការសហប្រតិបត្តិការក្រុងសៀងហៃ” OCS ដែលបានប្រសូតមកនៅក្រុងសៀងហៃក្នុងឆ្នាំ ២០០១ មាន៦ប្រទេស ជាសមាជិកពេញលក្ខណៈ ពោលគឺ ចិន រុស្ស៊ី និង ៤ប្រទេសនៃតំបន់ អាស៊ីកណ្តាល ៖ Kazakhstan Kirghizistan TadjikistanOuzbekistan។ ក្រោយមក មាន៤ប្រទេសនៃតំបន់ បានត្រូវទទួលឲ្យចូលជាសមាជិក-សង្កេតការណ៍របស់ OCS គឺឥណ្ឌា ប៉ាគីស្ថាន អៀរ៉ង់ ម៉ុងហ្គោលី ចង់ក្លាយជាសមាជិក-សង្កេតការណ៍ដែរគឺអាហ្វហ្កានីស្ថាន រីឯសេរីលង្កា និង បេឡារុស្ស បានទទួលលក្ខន្តិកៈជា”ដៃគូសំវាទ” របស់ OCS។ ប្រទេសតួកគីក៏ប្រាថ្នាក្លាយជាដៃគូបែបនេះដែរ។
ថ្លែងរសៀលម្សិលមិញ ក្នុងកិច្ចប្រជុំជាន់ថ្នាក់ប្រមុខរដ្ឋាភិបាលរបស់ OCS នៅក្រុងរុស្ស៊ី Saint-Petersbourg លោកពូទីន នាយករដ្ឋមន្ត្រីប្រទេសម្ចាស់ផ្ទះ គូសបញ្ជាក់ថា OCS ចោទនៅពីមុខខ្លួនទន្ទឹមនិងការពង្រីកសហប្រតិបត្តិការសេដ្ឋកិច្ច រវាងប្រទេសសមាជិកក៏ទាំងបញ្ហាពង្រឹងសន្តិសុខតំបន់បង្កើនការប្រយុទ្ធទល់នឹងភេរវនិយមនិងចរាចរណ៍គ្រឿងញៀន។
ចំណែក លោកនាយករដ្ឋមន្ត្រីចិន Wen Jiabao ថ្លែងថា ចិនត្រៀមផ្តល់ឥណទានក្នុងល័ក្ខខ័ណ្ឌធូរស្រាលសម្រាប់ការអភិវឌ្ឍន៍ហេដ្ឋារចនាសម្ព័ន្ធ។ ក្នុងន័យនេះ ចិនគាំទ្រដល់សំណើKazakhstan ស្តីអំពីការសាងសង់បំពង់បង្ហូរប្រេងកាត និងខ្សែCable នាំចរន្តអគ្គិសនីពីប្រទេសអាស៊ីមួយទៅមួយទៀត។ ចិនក៏គាំទ្រដល់សំណើTadjikistan និង Ouzbekistan ស្តីអំពីការសាងសង់និងការកែឲ្យ ទំនើបឡើងបណ្តាញផ្លូវដែកនិងផ្លូវរថយន្តក្នុងលំហ OCS។
ទាក់ទងនឹងពាក្យសុំចូលជាសមាជិកពេញលក្ខណៈរបស់ OCS ពីខាងប៉ាគីស្ថាន និងអៀរ៉ង់ដែលទើបជាសមាជិក-សង្កេតការណ៍ លោកពូទីនបានលើកឡើងពីគោលជំហរទីក្រុងម៉ូស្គូ ដែលថា ប្រទេសណាដែលនៅជាប់ក្នុងទណ្ឌកម្មរបស់ អ.ស.ប. គឺនៅមិនទាន់អាចត្រូវទទួលឲ្យក្លាយទៅជាសមាជិកពេញលក្ខណៈឡើយ។ ឃ្លានេះពិតជាសំដៅទៅលើអៀរ៉ង់តែម្តង។
ក្នុងជំនួបទ្វេភាគីជាមួយលោកពូទីន លោក Wen Jiabao ថ្លែងថា នៅពីមុខស្ថានការណ៍សេដ្ឋកិច្ចនិងនយោបាយស្មុគស្មាញក្នុងលោក ការពង្រឹងតទៅទៀតភាពជាដៃគូយុទ្ធសាស្ត្រនិងមិត្តភាពជាប្រពៃណីរវាងចិននិងរុស្ស៊ីដែលជាមហាប្រទេស២នៅជិតខាងគ្នា និងមានឥទ្ធិពលក្នុងលោកគឺឆ្លើយស្របមិនគ្រាន់តែផលប្រយោជន៍គន្លឹះរបស់ប្រជាជនរដ្ឋទាំង២ប៉ុណ្ណោះទេ តែក៏មានន័យយុទ្ធសាស្ត្រវែងឆ្ងាយសម្រាប់សន្តិភាពនិងការអភិវឌ្ឍន៍លើភពផែនដី។
លោកពូទីនពីចំណែកខ្លួនថ្លែងថា ថ្នាក់ដឹកនាំចិននិងរុស្ស៊ីតាំងទំនាក់ទំនងដ៏ជិតស្និទ្ធនឹងគ្នាដោយឈរលើការជឿទុកចិត្តនយោបាយទៅវិញទៅមកក្នុងកម្រិតខ្ពស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ