អត្ថបទលោកពូទីនអំពី ”ស្ពាន” ភ្ជាប់ទ្វីបអឺរ៉ុបទៅនឹងតំបន់អាស៊ី-ប៉ាស៊ីហ្វិក
ដើរតួជា ”ស្ពាន” នេះ គឺអនាគតអង្គការក្រោមឈ្មោះថា “សហភាពអឺរ៉ុប-អាស៊ី” ។ អត្ថបទទាក់ទងនឹងសាច់រឿងនេះ សរសេរដោយបុរសខ្លាំងនៅរុស្ស៊ីតែម្តង គឺលោកពូទីន ដែលបច្ចុប្បន្នជានាយករដ្ឋមន្ត្រី ហើយចាប់ពីឆ្នាំក្រោយទៅនឹងវិលត្រឡប់មកកាន់អំណាចកំពូលជាប្រធានាធិបតីវិញ។ គាត់បានសរសេរ គឺ តាមសំណូមពរកាសែតដ៏ធំនិងចំណាស់វ័យនៅរុស្ស៊ី ឈ្មោះកាសែត Izvestia ដែលលេខថ្ងៃនេះឯងបានចុះផ្សាយវាពេញលើទំព័រទី១របស់ខ្លួន។
ចុះផ្សាយនៅថ្ងៃ៖
ស្តាប់ - ០២:១៧
ខ្លឹមសារគឺនៅត្រង់ចាប់ពីថ្ងៃទី១មករាឆ្នាំក្រោយឆ្នាំ២០១២ទៅ នឹងដំណើរការជាផ្លូវការ គឺរចនាសម្ព័ន្ធមួយថ្មីខាងធ្វើសមាហរ៍ណកម្មក្រោមឈ្មោះថា “ សហភាពគយ” បង្កើតឡើងតាំងពី៤ឆ្នាំមុនម៉្លេះដោយ៣ប្រទេសឯករាជ្យ គឺរុស្ស៊ី បេឡារុស្ស កាហ្សាកស្ថាន ស្របនឹងសន្ធិសញ្ញា ចុះថ្ងៃទី៦តុលាឆ្នាំ២០០៧។ តាមលោកពូទីន“ សហភាពគយ “នេះ នឹងប្រែក្លាយបន្តិចម្តងៗទៅជា“សហភាពសេដ្ឋកិច្ចអឺរ៉ុប-អាស៊ី” ដែលនឹងបំពេញមុខងារជា “ស្ពាន” ភ្ជាប់ទ្វីបអឺរ៉ុបទៅនឹងតំបន់អាស៊ី-ប៉ាស៊ីហ្វិក។
លោកពូទីនអំពាវនាវប្រទេសឯទៀតឲ្យភ្ជាប់ខ្លួនមកនឹងសហភាពថ្មី ដោយនៅដំណាក់ដំបូងត្រៀមទទួលប្រទេសឯករាជ្យ២ផ្សេង គឺ គៀរហ្គីហ្ស៊ីស្ថាននិងតាដហ្ស៊ីគីស្ថានឲ្យចូលជាសមាជិកពេញលក្ខណៈ ដោយព្រមជាមួយនេះ គាត់ពន្យល់បំភ្លឺថាការធ្វើសមាហរ័ណកម្មក្នុងកម្រិតកាន់តែខ្ពស់ឡើងនោះ មិនមែនមានន័យថាស្តារសហភាពសូវៀតឡើងវិញឡើយ។
ចំពោះរដ្ឋឯករាជ្យឯទៀតនៅជិតខាងរុស្ស៊ី ដែលពុំព្រមភ្ជាប់ខ្លួនមកនឹងសហភាពថ្មីក្រោមលេសថា ហាក់បីបញ្ច្រាសនឹងជម្រើសរបស់គេទៅខាងសហភាពអឺរ៉ុបលោកពូទីនសរសេរថា ការយល់ឃើញបែបនេះគឺជាការភាន់ច្រឡំទេតើ ដ្បិតសហភាពក្នុងលំហនៃអតីតសហភាពសូវៀតឥតប្រឈមមុខទល់នឹងនរណាមួយឡើយ។ ផ្ទុយទៅវិញ “សហភាពសេដ្ឋកិច្ចអឺរ៉ុប-អាស៊ី” គឺឈរលើគោលការណ៍សាកលនៃសមាហរ័ណកម្មក្នុងឋានៈជាភាគមួយមិនអាចផ្តាច់ចេញបានពី “ មហាទ្វីបអឺរ៉ុប” ដែលលាតសន្ធឹងពីទីក្រុង Lisbonne នៅប៉ែកខាងលិចបង្អស់ទ្វីបអឺរ៉ុប លុះរហូតដល់ក្រុង Vladivostok ឯចុងបូព៌ាប្រទេសរុស្ស៊ី។ មហាទ្វីបនេះរួមគ្នាធ្លុងមួយដោយការទទួលស្គាល់ដូចគ្នាតម្លៃនៃសេរីភាព តម្លៃប្រជាធិបតេយ្យ និងច្បាប់សេដ្ឋកិច្ចទីផ្សារ។
មិនតែប៉ុណ្ណោះ លោកពូទីនរំលឹកថា តាំងពីឆ្នាំ២០០៣ម៉្លេះ រុស្ស៊ីនិងសហភាពអឺរ៉ុបចេះព្រមព្រៀងនឹងគ្នាទៅលើការបង្កើតឡើងជា” លំហសេដ្ឋកិច្ចរួមតែមួយ” ដោយធ្វើនយោបាយឈរលើការសម្របយោបល់គ្នាក្នុងវិស័យឧស្សាហកម្ម បច្ចេកវិជ្ជា ថាមពល អប់រំ វិទ្យាសាស្ត្រ។
ដូច្នេះ តាមសេចក្តីសន្និដ្ឋានរបស់លោកពូទីនជាបច្ចុប្បន្ននាយករដ្ឋមន្ត្រីនិងក្នុងឆ្នាំក្រោយឡើងជាប្រធានាធិបតីរុស្ស៊ីវិញ ៖ ការភ្ជាប់ខ្លួនរបស់រដ្ឋនេះឬនោះ មកនឹងសហភាពថ្មីនឹងជួយគេឲ្យឆាប់បានចូលក្នុងក្រុមគ្រួសារទ្វីបអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ