ប៉េកាំងបារម្ភពីការបោះបង់គម្រោងទំនប់ទឹកនៅភូមា
នៅទីបំផុត ទីក្រុងប៉េកាំងបានបញ្ចេញប្រតិកម្មរបស់ខ្លួននៅថ្ងៃសៅរ៍ទី១តុលា ម្សិលមិញពាក់ព័ន្ធនឹងការបោះបង់គម្រោងទំនប់ទឹកដែលត្រូវសាងសង់នៅ លើទន្លេ Irrawady ក្រោយពីមានការប្រកាសជាឯកតោភាគីបោះបង់គម្រោងសាងសង់ស្ថានីយ វារីអគ្គិសនីដោយលោកប្រធានាធិបតីភូមា។ ទាំងនេះ ដោយហេតុតែមានការប្រឆាំងយ៉ាងខ្លាំងនៅក្នុងប្រទេសទៅនឹងគម្រោង សាងសង់ទំនប់ទឹកដែលមានប្រទេសចិនជាអ្នកផ្តល់ហិរញ្ញប្បទាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ប្រទេសចិនបានជាបាត់បង់ថាមពលអគ្គិសនីដែលនឹងផលិតនៅប្រទេសភូមារួចទៅហើយ។ ប៉ុន្តែទីក្រុងប៉េកាំងពុំចង់បាក់មុខមាត់ឡើយ។ នៅក្នុងសេចក្តីថ្លែងការណ៍មួយរបស់ក្រសួងការបរទេសចិនបានព្រមានថា “ប្រទេសដែលមានជាប់ពាក់ព័ន្ធនឹងគម្រោងសាងសង់ស្ថានីយវារីអគ្គិសនី ត្រូវតែធានាឲ្យមាននីត្យានុកូលភាព និងគោរពភាពពេញលក្ខណៈច្បាប់របស់ក្រុមហ៊ុនចិន”។ អ្នកនាំពាក្យនៃក្រសួងការបរទេសចិនបានគូសបញ្ជាក់ទៀតថា “ការសាងសង់ទំនប់វារីអគ្គិសនីគឺជាគម្រោងវិនិយោគទុនរួមគ្នាមួយរវាងប្រទេសចិននិងប្រទេសភូមា ហើយភាគីទាំងពីរបានពិនិត្យមើលយ៉ាងល្អិតល្អន់”។
នេះប្រទេសចិនចង់រំលឹកឲ្យដឹងថា គម្រោងសាងសង់ស្ថានីយវារីអគ្គិសនីនេះបានត្រូវស្នើដោយពួកយោធាភូមាតាំងពីឆ្នាំ២០០៦ម៉្លេះ។ ហើយគម្រោងការនេះ បានត្រូវលើកយកមកពិភាក្សាគ្នាម្តងទៀត នាឱកាសទស្សនកិច្ចរបស់ប្រមុខដឹកនាំភូមានៅទីក្រុងប៉េកាំងនៅខែកញ្ញាឆ្នាំទៅ។ ក្នុងវិស័យថាមពល ប្រទេសចិនសង្ឃឹមយ៉ាងខ្លាំងទៅលើប្រទេសភូមា។
ប្តូរនឹងការផ្តល់សព្វាវុធចិនឲ្យយោធាភូមា ទីក្រុងប៉េកាំងសង្ឃឹមថា នឹងអាចធ្វើការដឹកជញ្ជូនប្រេងឥន្ធនៈដោយប្រើមហាសាគរឥណ្ឌា ដោយធ្វើការឆ្លងកាត់តាមរយៈប្រទេសភូមា។ ទាំងនេះ ដើម្បីចៀសវាងកុំឲ្យនាវាដឹកប្រេង Supertankers ធ្វើដំណើរឆ្លងតាមច្រកសមុទ្រម៉ាឡាកាដែលសម្បូណ៌ទៅដោយចោរសមុទ្រ។
ហើយអ្វីដែលទីក្រុងប៉េកាំងបារម្ភជាងគេគឺការបោះបង់គម្រោងសាងសង់ស្ថានីយវារីអគ្គិសនីដែលអាចក្លាយជាការជួយលើកទឹកចិត្តដល់បក្សប្រឆាំងភូមា។ ហើយគម្រោងសាងសង់បំពង់បង្ហូរប្រេងពីរទៀតឋិតនៅប៉ែកខាងលិចនៃប្រទេសភូមាសម្រាប់ផ្តល់ប្រេងឥន្ធនៈឲ្យទៅទីក្រុងធំៗរបស់ប្រទេសចិនក៏បានទទួលរងការប្រឆាំងយ៉ាងខ្លាំងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ