ភូមាផ្អាកបញ្ឈប់គម្រោងសាងសង់ទំនប់ទឹកក្រោយពីប្រជាពលរដ្ឋស្រែកប្រឆាំង
នៅថ្ងៃសុក្រទី៣០កញ្ញាឆ្នាំ២០១១នេះ រដ្ឋាភិបាលភូមាបានសម្រេចផ្អាកបញ្ឈប់គម្រោងសាងសង់ទំនប់ទឹកដ៏ធំអស្ចារ្យមួយនៅប៉ែកខាងជើងនៃប្រទេស ដែលទទួលហិរញ្ញប្បទានពីប្រទេសចិន។ ទាំងនេះក្រោយពីមានការប្រឆាំងយ៉ាងខ្លាំងក្លាពីសំណាក់ប្រជាពលរដ្ឋ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
នាឱកាសជំនួបប្រជុំសមាជិកសភាភូមានៅទីក្រុង Naypyidaw លោកប្រធានាធិបតី Thein Sein បានថ្លែងឲ្យដឹងថា គម្រោងសាងសង់ទំនប់ទឹកនៅ Myitsone នៅលើទន្លេ Irrawaddy ឋិតនៅក្នុងរដ្ឋ Kachin ប្រហែលជានឹងត្រូវផ្អាកបញ្ឈប់សិនរហូតដល់ចប់អាណត្តិរដ្ឋាភិបាលភូមាបច្ចុប្បន្ន។
អ្នកទទួលខុសត្រូវម្នាក់នៃរដ្ឋាភិបាលភូមាបានថ្លែងថា “លោកប្រធានាធិបតី Thein Sein បានសម្រេចផ្អាកបញ្ឈប់គម្រោងសាងសង់ទំនប់ទឹក ដោយហេតុថារដ្ឋាភិបាលភូមាបច្ចុប្បន្នជារដ្ឋាភិបាលតែងតាំងដោយប្រជាពលរដ្ឋ ដូច្នេះរដ្ឋាភិបាលត្រូវតែគោរពឆន្ទៈរបស់ប្រជាពលរដ្ឋ”។
ទន្ទឹមគ្នានេះ សកម្មជនភូមាក៏ចង់សាកល្បងដើម្បីដឹងពីកម្រិតសេរីភាពនៃរបបគ្រប់គ្រងស៊ីវិលថ្មីដែលឋិតនៅក្រោមការត្រួតត្រារបស់យោធាភូមា។ គួរបញ្ជាក់ថា សំឡេងប្រឆាំងនឹងគម្រោងសាងសង់ទំនប់វារីអគ្គិសនីបានកើតមានកាន់តែច្រើនឡើងៗ។ ថាមពលអគ្គិសនីដែលកើតចេញពីទំនប់ទឹកនេះគ្រោងនឹងបញ្ជូនទៅឲ្យប្រទេសចិន។
រីឯអ្នកការពារបរិស្ថានឯណោះវិញបាននាំគ្នាស្រែកបរិហារពីផលវិបាកអវិជ្ជមានដែលកើតចេញពីការសាងសង់ទំនប់ទឹកនេះ ដែលអាចបណ្តាលឲ្យស្រុកភូមិជាច្រើនស្គាល់ការលិចលង់ ហើយនិងតម្រូវឲ្យជម្លៀសប្រជាពលរដ្ឋយ៉ាងតិចប្រមាណ១០ ០០០នាក់។ បន្ថែមពីលើនេះ នៅមានផលវិបាក “អវិជ្ជមាន” ជះទៅលើតំបន់ដែលពោរពេញទៅដោយជីវសម្បូណ៌បែបផងទៀត។
សូមបញ្ជាក់ថា នៅខែមិថុនាកន្លងទៅការវាយប្រយុទ្ធគ្នាមួយដ៏ហិង្សាបានកើតមានរវាងពួកអ្នកបះបោរ Kachin និងទាហានភូមាជុំវិញបញ្ហាគម្រោងសាងសង់ទំនប់វារីអគ្គិសនីនេះ។ ទំនប់វារីអគ្គិសនីនេះក៏បានក្លាយទៅជានិមិត្តរូបនៃការប្រយុទ្ធតស៊ូប្រឆាំងនឹងរដ្ឋអំណាចភូមាបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ