អៀរ៉ង់និងកូរ៉េខាងជើងបញ្ជូនបច្ចេកវិជ្ជាឲ្យគ្នាទៅវិញទៅមក
កូរ៉េខាងជើងនិងអៀរ៉ង់ ទំនងជាបានបញ្ជូនឲ្យគ្នាទៅវិញទៅមកជាទៀងទាត់បច្ចេកវិជ្ជាក្នុងវិស័យកាំជ្រួចមីស្ស៊ីលបាញ់បានឆ្ងាយ ដោយរំលោភបំពានលើការដាក់ទណ្ឌកម្មរបស់ អ.ស.ប. ។ នេះបើយោងតាមរបាយការណ៍សម្ងាត់មួយរបស់ អ.ស.ប. របាយការណ៍ដែលចិនប៉ុនប៉ងរារាំងមិនឲ្យផ្សព្វផ្សាយ។ នេះបើយោងតាមមន្ត្រីការទូត.អស.ប.នៅថ្ងៃអាទិត្យ១៥ឧសភាម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
របាយការណ៍ដែលដាក់ជូនក្រុមប្រឹក្សាសន្តិសុខអ.ស.ប. ពិនិត្យ ដោយអ្នកជំនាញការមួយក្រុមដែល មានគ្នា ៧នាក់និងទទួលបន្ទុក ខាងត្រួតពិនិត្យលើការគោរពទណ្ឌកម្មរបស់សហគមន៍អន្តរជាតិ ប្រឆាំងកូរ៉េខាងជើង បន្ទាប់ពីប្រទេសនេះ បានធ្វើការបាញ់សាកល្បងកាំជ្រួចនុយក្លេអ៊ែរ នៅឆ្នាំ២០០៦និង២០០៩រួចមក។
យោងតាមទីភ្នាក់ងារព័ត៌មានបារាំង AFP ក្រុមអ្នកជំនាញការ សង្ស័យថា៖ គ្រឿងសម្ភារៈដែលអាចយកទៅធ្វើកាំជ្រួចមីស្ស៊ីល ដែលគេហាមឃាត់ ត្រូវបានកូរ៉េខាងជើងនិងអៀរ៉ង់ ធ្វើការដឹកបញ្ជូនឲ្យគ្នាទៅវិញទៅមក តាមជើងយន្តហោះដឹកទំនិញ នៃក្រុមហ៊ុនអាកាសចរណ៍កូរ៉េខាងជើង Air Koryo និងអៀរ៉ង់ Iran Air។
ការដាក់ទណ្ឌកម្មរបស់អសប ទៅលើកូរ៉េខាងជើងនិងអៀរ៉ង់ ដោយមូលហេតុប្រទេសទាំងពីរនេះ បាន ធ្វើការពង្រីកកម្មវិធីនុយក្លេអ៊ែររបស់ខ្លួន។ កូរ៉េខាងជើងដែលធ្វើការដឹកជញ្ជូនគ្រឿងសម្ភារៈ របស់គេ តាមយន្តហោះដឹកទំនិញ ដោយមក ពី វិធានការត្រួតពិនិត្យសន្តិសុខ តាមយន្តហោះជំនួញ ពុំសូវជាតឹងតែងប៉ុន្មានទេ។
របាយការណ៍ បានបញ្ជាក់បន្ថែមថា “សម្ភារៈ ហាមឃាត់ទាំងនោះ “ត្រូវបានដឹកឆ្លងកាត់ ប្រទេសទី៣ ជិតខាងតែគេ មិនប្រាប់ឈ្មោះ ។ ប្រទេសទី៣នោះ គឺពុំមាន ប្រទេសណាក្រៅពីប្រទេសចិនទេ ដែលជាសម្ព័ន្ធមិត្តចាក់ទឹកមិនលិចរបស់កូរ៉េខាងជើង ពីព្រោះ ទីក្រុងប៉េកាំង កន្លងមកនេះ ខិតខំនិយាយបញ្ចុះបញ្ចូលសមាជិកចិនម្នាក់ដែលស្ថិតនៅក្នុងក្រុមអ្នកជំនាញការ កុំឲ្យចុះហត្ថលេខាលើ របាយការណ៍ខាងលើ- នេះបើយោងតាមកាសែត New York Times ។
ម្យ៉ាងទៀត របាយការណ៍របស់អសប ក៏ច្បាស់ជានឹងត្រូវគេធ្វើការពិនិត្យមើល និង ជជែកពិភាក្សាគ្នាយ៉ាងផុសផុល នៅថ្ងៃអង្គារស្អែកនេះ មុននឹងគេ អាចផ្សព្វផ្សាយបាន ក្រោយពីមានការព្រមព្រៀងគ្នា ជាឯកច្ឆ័ន្ទមួយ រវាងសមាជិកទាំង១៥ នៃ ក្រុមប្រឹក្សាសន្តិសុខអសបដែលក្នុងនោះក៏មានប្រទេសចិនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ