រដ្ឋាភិបាលបន្ថែមថវិកាដើម្បីសម្រួលជីវភាពជនរងគ្រោះ
រដ្ឋាភិបាលជប៉ុនបានអនុម័តនៅថ្ងៃសុក្រទី២២មេសានេះនូវការបន្ថែមថវិកាសម្រាប់ជួយរើបោសសម្អាតកំទេចគំនរដែលបង្កឡើងដោយ មហន្តរាយរលកយក្សស៊ូណាមីនិងនុយក្លេអ៊ែរ ជួសជុលអគារទ្រុឌទ្រោម សាងសង់លំនៅដ្ឋានបណ្តោះអាសន្នថ្មីសម្រាប់ជនរងគ្រោះជប៉ុន រាប់ម៉ឺននាក់។ការខូចខាតដែលបណ្តាលមកពីគ្រោះមហន្តរាយរលកយក្សស៊ូណាមីនិង នុយក្លេអ៊ែរអាចមានដល់ទៅ២៥ ០០០ពាន់លានយេនឬត្រូវជា២១០ពាន់លានអឺរ៉ូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ក្រុមប្រឹក្សាគណៈរដ្ឋមន្ត្រីជប៉ុនបានសម្រេចស្នើសុំសភានូវឥណទានបន្ថែមប្រមាណ៣៣ពាន់លានអឺរ៉ូសម្រាប់ផ្តល់ហិរញ្ញប្បទានដល់ការស្ថាបនាសាងសង់ឡើងវិញនៅតំបន់ប៉ែកឦសាននៃប្រទេសដែលបានទទួលរងគ្រោះដោយមហន្តរាយរលកយក្សស៊ូណាមីនិងនុយក្លេអ៊ែរ។ ការពិនិត្យទៅលើសំណើសុំរបស់រដ្ឋាភិបាលដោយសភាជប៉ុននឹងត្រូវប្រព្រឹត្តទៅនៅថ្ងៃទី២៨មេសាខាងមុខនេះ។
រដ្ឋាភិបាលជប៉ុនគ្រោងចំណាយ១ ២០៩ពាន់លានយេនឬ១០ពាន់លានអឺរ៉ូសម្រាប់ជួសជុលហេដ្ឋារចនាសម្ព័ន្ធសាធារណៈ ៣៦៣ពាន់លានយេនឬ៣ពាន់លានអឺរ៉ូសម្រាប់សាងសង់លំនៅដ្ឋានបណ្តោះអាសន្នថ្មី ៣៥០ពាន់លានយេនសម្រាប់រើបោសសម្អាតកំទេចគំនរដែលបង្កឡើងដោយមហន្តរាយរលកយក្សស៊ូណាមីនិងនុយក្លេអ៊ែរ ២៧០ពាន់លានយេនសម្រាប់សាងសង់អគារសិក្សានិងពង្រឹងប្រព័ន្ធការពាររញ្ជួយដី។
រដ្ឋាភិបាលរបស់លោកនាយករដ្ឋមន្ត្រីណាអូតូ កានបានប្រមាណថា ការខូចខាតដែលបណ្តាលមកពីគ្រោះមហន្តរាយរលកយក្សស៊ូណាមីនិងនុយក្លេអ៊ែរអាចមានដល់ទៅ២៥ ០០០ពាន់លានយេនឬត្រូវជា២១០ពាន់លានអឺរ៉ូ។
សូមបញ្ជាក់ថា គ្រោះមហន្តរាយរញ្ជួយដីនិងគ្រោះមន្តរាយរលកយក្សស៊ូណាមីកាលពីថ្ងៃទី១១មីនាកន្លងទៅនេះបានបណ្តាលឲ្យមានមនុស្សស្លាប់និងបាត់ខ្លួនប្រមាណ២៨ ០០០នាក់នៅប្រទេសជប៉ុន។ ហើយចាប់តាំងពីថ្ងៃសុក្រនេះទៅ តំបន់ក្នុងរង្វង់២០គ,មនៅជុំវិញមជ្ឈមណ្ឌលនុយក្លេអ៊ែរហ្វ៊ូគូស្ហ៊ីម៉ាបានត្រូវគេជម្លៀសប្រជាជនចេញហើយនិងហាមឃាត់ពុំឲ្យចេញចូល ដោយហេតុតែមានសារធាតុវិទ្យុសកម្មកម្រិតខ្ពស់ធ្វើឲ្យប៉ះពាល់សុខភាពមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ