គម្រោងរុះរើចោលរោងចក្រនុយក្លេអ៊ែរ Fukushima មានទំហំមហាសាល
នាយករដ្ឋមន្រ្តីជប៉ុន លោកណាអូតូ កានបាននិយាយ នៅថ្ងៃព្រហស្បតិ៍ទី ៣១ មីនា ២០១១ ថា រោងចក្រនុយក្លេអ៊ែរFukushima Daiichiនឹងត្រូវរុះរើបិទចោល។ គំនិតដូចគ្នា នេះត្រូវបានប្រធានក្រុមហ៊ុន Tepco ដែលជាម្ចាស់រោងចក្រ ធ្លាប់លើកម្តងរួចហើយ នៅដើមសប្តាហ៍នេះ បន្ទាប់ពីរកឃើញថា ម៉ាស៊ីនប្រតិកម្មទាំងបួនមានការខូចខាតធ្ងន់ធ្ងរ ក្នុងគ្រោះថ្នាក់រញ្ជួយដីលើកនេះ។ ប៉ុន្តែ ក្រុមហ៊ុនTepco បញ្ជាក់ថា ម៉ាស៊ីនប្រតិកម្មទី៥ និងទី ៦ ដែលមិនមានបញ្ហា នឹងមិនស្ថិតក្នុងគម្រោងរុះរើចោលនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
សម្រាប់នាយករដ្ឋមន្រ្តីជប៉ុន រោងចក្រនុយក្លេអ៊ែរទាំងមូលត្រូវតែបិទ និងរុះរើចោល គ្មានការលើកលែង ម៉ាស៊ីនប្រតិកម្មណាមួយទេ។ ពេលនេះ គេនិយាយពីការរុះរើ តែមិនមែនកប់បិទម៉ាស៊ីនប្រតិកម្ម ដូចកាលនៅ រោងចក្រTchernobylនោះទេ។ ក្នុងការអនុវត្តន៍ជាក់ស្តែង ការរុះរើសំអាតចោលរោងចក្រនុយក្លេអ៊ែរមួយៗ ត្រូវការពេលវេលាយូរ និងលុយ ជាច្រើនពាន់លានដុល្លារ។
បើតាមលោកThierry Charles នាយកវិទ្យាស្ថានការពារវិទ្យុសកម្ម និងសុវត្ថិភាពនុយក្លេអ៊ែររបស់បារាំង គេត្រូវការពេលដ៏យូរ យ៉ាងហោចណាស់ ៣០ឆ្នាំដើម្បីអាចរុះរើរោងចក្រនុយក្លេអ៊ែរ ព្រោះថា រើ បិទចោលរោងចក្រនុយក្លេអ៊ែរមួយៗ មិនមែនងាយស្រួលដូចរុះរើផ្ទះនោះទេ។
ក្នុងករណីនៅប្រទេសជប៉ុន ពេលវេលាដើម្បីរើរោងចក្រនុយក្លេអ៊ែរចោល អាចយូរជាងនេះទៀត។ នៅរោងចក្រFukushima គេមិនអាចចាប់ផ្តើមការងាររុះរើបានទេ ដរាបណាស្ថានភាពសុវត្ថិភាពនៅម៉ាស៊ីនប្រតិកម្មមិនទាន់មានលំនឹង។ នោះគឺមានន័យថា ការងារចំបងដែលត្រូវធ្វើពេលនេះ ត្រូវរៀបចំបណ្តាញរក្សាសីតុណ្ហភាពនៅម៉ាស៊ីនប្រតិកម្មឲ្យមានដំណើរការឡើងវិញសិន គឺធ្វើយ៉ាងណាកុំឲ្យស្នូលម៉ាស៊ីនប្រតិកម្មឡើងក្តៅ និងអាចផ្ទុះបាន។
បន្ទាប់មកទៀត ក្នុងដំណើរការរុះរើ ការងារអាទិភាពមួយទៀត គឺគេត្រូវបូមទឹកចេញឲ្យអស់ពីក្នុងអាងទឹកដែលគេកំពុងត្រាំស្នូល ម៉ាស៊ីនប្រតិកម្មដែលគេប្រើរួចហើយ។ បច្ចុប្បន្ននេះ ស្នូលម៉ាស៊ីនប្រតិកម្មនេះត្រូវនៅកណ្តាលវាល បន្ទាប់ពីអគាម៉ាស៊ីនប្រតិកម្មផ្ទុះខូច បន្តបន្ទាប់គ្នា។ បើទោះបីជាស្នូលម៉ាស៊ីនប្រតិកម្មដែលប្រើរួចហើយ មានចំហេះខ្សោយ និងមិនអាចផ្ទុះបាន ប៉ុន្តែ វាចូលរួមបំពុលបរិស្ថានធ្ងន់ធ្ងរ។
ក្នុងពេលគេបញ្ចេញទឹកពីក្នុងអាងទឹកដែលស្ថិតនៅក្នុងអគារម៉ាស៊ីនប្រតិកម្ម គេត្រូវចាប់ផ្តើមកំណត់ទីកន្លែង តំបន់ដែលមានធាតុវិទ្យុសកម្ម។ គេក៏អាចប្រើមនុស្សយន្ត ដើម្បីចូលទៅដល់កន្លែងដែលមានធាតុវិទ្យុសកម្មកម្រិតខ្ពស់ ខ្ពស់ដែលមនុស្សមិនអាចទទួលយកបាន។ ជាមួយគ្នានេះ គេត្រូវសាងសង់អគារ ដើម្បីគ្របដណ្តប់រោងចក្រនុយក្លេអ៊ែរ ឡើងវិញ គឺធ្វើយ៉ាងណា កុំឲ្យទឹក និងខ្យល់ដែលមានលាយធាតុវិទ្យុសកម្ម លេចចេញមកក្រៅ។ បន្ទាប់មកទៀត គេអាចបន្តបន្ថយកំដៅរបស់ស្នូលម៉ាស៊ីនប្រតិកម្មឲ្យចុះត្រជាក់មែនទែន រហូតដល់គេអាចដឹកយកទៅដាក់នៅកន្លែងសុវត្ថិភាពមួយផ្សេងទៀត។ និយាយឲ្យចំ ការងាររុះរើរោងចក្រ គឺគេរើតាមផ្នែក និងធ្វើម្តងមួយៗ ដោយប្រយ័ត្នប្រយែង។
វិធីសាស្រ្តដើម្បីរើ បិទអគាររោងចក្រ ត្រូវគេដឹងអស់ហើយ បញ្ហាចុងក្រោយដែលចោទឡើង គឺថា តើអ្នកណាដែលនឹងស្ម័គ្រចិត្តទៅធ្វើការនៅកន្លែងដែលប្រកបដោយគ្រោះថ្នាក់? ហើយតើគេនឹងយកកាកសំណល់ផ្ទុកដោយធាតុវិទ្យុសកម្ម ទៅស្តុកទុកនៅកន្លែងណា? តើគេត្រូវសំអាតបរិស្ថាននៅក្រោយការរុះរើ រោងចក្រFukushima បានយ៉ាងម៉េច?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ