ការរញ្ជួយដី ថ្ងៃទី៧មេសា បានធ្វើឲ្យប៉ះពាល់មជ្ឈមណ្ឌលនុយក្លេអ៊ែរជប៉ុនមួយថ្មីទៀត
ប៉ែកឦសាននៃប្រទេសជប៉ុនបានទទួលរងគ្រោះជាថ្មីម្តងទៀតដោយការរញ្ជួយផែនដីនៃថ្ងៃទី៧មេសាឆ្នាំ២០១១ ក្រោយពីមានការរញ្ជួយផែនដីនៃថ្ងៃទី១១មីនារួចមក។ ការរញ្ជួយព្រះធរណីដ៏ខ្លាំងក្លាកាលពីម្សិលមិញដែលមានកម្រិត៧,១%នៃ មាត្រាដ្ឋានរិឆទ័របានបណ្តាលឲ្យមានមនុស្សស្លាប់យ៉ាងតិច៣នាក់និង របួស១០០ប្លាយនាក់។ហើយការរញ្ជួយផែនដីនៅថ្ងៃទី៧មេសាម្សិលមិញបានធ្វើឲ្យប៉ះពាល់ មជ្ឈមណ្ឌលនុយក្លេអ៊ែរជប៉ុនមួយថ្មីទៀតនៅអូណាហ្កាវ៉ា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
ការរញ្ជួយព្រះធរណីដ៏ខ្លាំងក្លាកាលពីថ្ងៃព្រហស្បតិ៍ទី៧មេសាម្សិលមិញដែលមានកម្រិត៧,១%នៃមាត្រាដ្ឋានរិឆទ័របានធ្វើឲ្យប៉ះពាល់ដល់មជ្ឈមណ្ឌលនុយក្លេអ៊ែរជប៉ុនមួយថ្មីទៀតនៅអូណាហ្កាវ៉ាដែលឋិតនៅប៉ែកឦសាននៃប្រទេសជប៉ុន។ មជ្ឈមណ្ឌលនុយក្លេអ៊ែរប៉ះពាល់ថ្មីនេះឋិតនៅចម្ងាយប្រមាណ១២០គ,មខាងជើងមជ្ឈមណ្ឌលនុយក្លេអ៊ែរហ្វ៊ូគូស្ហ៊ីម៉ាដែលបានទទួលរងគ្រោះមហន្តរាយកាលពីថ្ងៃទី១១មេសាឆ្នាំ២០១១កន្លងទៅ។ កាលពីម្សិលមិញ គេបានកត់សម្គាល់ឃើញមានអគ្គីភ័យបានកើតមាននៅមជ្ឈមណ្ឌលនុយក្លេអ៊ែរអូណាហ្កាវ៉ា ក៏ប៉ុន្តែគេបានពន្លត់អគ្គីភ័យនេះបានយ៉ាងឆាប់រហ័ស។ មជ្ឈមណ្ឌលនុយក្លេអ៊ែរអូណាហ្កាវ៉ានេះឋិតនៅក្រោមការគ្រប់គ្រងរបស់ក្រុមហ៊ុនTohoku Electric Power។
សូមបញ្ជាក់ថា កម្រិតនៃសារធាតុវិទ្យុសកម្មបានកើនឡើងដល់កម្រិតមួយដ៏គួរឲ្យបារម្ភដែលបានបណ្តាលឲ្យអ្នកទទួលខុសត្រូវធ្វើការប្រកាស “ភាពអាសន្ន”។ ក៏ប៉ុន្តែក្រោយមក កម្រិតនៃសារធាតុវិទ្យុសកម្មបានធ្លាក់មកនៅកម្រិតធម្មតាវិញ។
ហើយនៅថ្ងៃសុក្រនេះ គេកត់សម្គាល់ឃើញមានលេចចេញទឹកដែលមានសារធាតុវិទ្យុសកម្មកម្រិតខ្សោយនៅក្នុងនោះ។ មជ្ឈមណ្ឌលនុយក្លេអ៊ែរនៅអូណាហ្កាវ៉ាមានម៉ាស៊ីនប្រតិកម្មនុយក្លេអ៊ែរ៣។ ទឹកដែលលេចចេញហើយមានសារធាតុវិទ្យុសកម្មកម្រិតខ្សោយនោះគឺចេញពីអាងទឹកជាច្រើនសម្រាប់ធ្វើឲ្យឥន្ធនៈនុយក្លេអ៊ែរត្រជាក់។ ឥន្ធនៈនុយក្លេអ៊ែរដែលគេប្រើនៅក្នុងម៉ាស៊ីនប្រតិកម្មនុយក្លេអ៊ែរទី១និងទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ