រដ្ឋអំណាចចិនកំពុងបារម្ភពីផលវិបាកសេដ្ឋកិច្ចដែលកើតចេញពីភាពរំាងស្ងួតនារដូវរងា
ចុះផ្សាយនៅថ្ងៃ៖
ស្តាប់ - ០៤:០៤
ភាពរំាងស្ងួត ហួតហែងបាននិងកំពុងបន្តគ្របដណ្តប់លើប្រទេសចិនប៉ែកខាងជើង។ អវត្តមានទឹកភ្លៀងក្នុងរយៈពេល ៤ខែចុងក្រោយនេះ បាននិងកំពុងធ្វើឲ្យរដ្ឋអំណាចចិនមានការព្រួយបារម្ភជាពន់ពេក។ ចិនបារម្ភពីផលវិបាកសេដ្ឋកិច្ចដែលអាចកើតចេញពីភាពរំាងស្ងួតនេះ។ គឺជាព្រឹត្តិការណ៍ដ៏ធ្ងន់ធ្ងរមួយដែលចិនមិនធ្លាប់ជួបប្រទះទេ ក្នុងរយៈពេល ៦០ឆ្នំាចុងក្រោយនេះ។ យ៉ាងណាក៏ដោយ រដ្ឋអំណាចបានចាត់វិធានការជាច្រើន ដើម្បីត្រៀមទប់ទល់នឹងបញ្ហានេះ។ តើផលវិបាកសេដ្ឋកិច្ចដែលចិនអាចនឹងជួបប្រទះមានអ្វីខ្លះ ?
អស់រយៈពេល ១២០ថ្ងៃកន្លងមកហើយ ដែលនៅទូទំាងប្រទេសចិន និយាយជារួម និងនៅក្នុងទីក្រុងប៉េកំាង និយាយដោយឡែក គេមិនឃើញមានភ្លៀងធ្លាក់ទេ សូម្បីតែមួយតំណក់ ក៏គ្មានដែរ។ គឺជាបាតុភូតមួយដ៏ចម្លែក និងធ្ងន់ធ្ងរដែលចិនមិនធ្លាប់ជួបប្រទះទេក្នុងរយៈពេល ៦០ឆ្នំាចុងក្រោយនេះ។ តើវាជាផលវិបាកដែលជះមក ពីការប្រែប្រួលអាកាសធាតុក្នុងពិភពលោក ឬមួយក៏ជាសញ្ញាអាក្រក់នៃការបញ្ចប់ឆ្នំាចាស់ ឆ្នំាខ្លា ឆ្លងចូលឆ្នំាថ្មី ឆ្នំាថោះ ? នេះជាសំណួរដែលគ្មានចម្លើយ។
ប៉ុន្តែអ្វីដែលបាននិងកំពុងកើតមានជាក់ស្តែងពេលនេះគឺថា អវត្តមានទឹកភ្លៀងចំនួន ១២០ថ្ងៃជាប់គ្នាបាននិងកំពុងធ្វើឲ្យដីដំាដុះជាង ៥លានហិចតារីងស្ងួត ហួតហែង។ ទន្ទឹមគ្នានេះ អវត្តមានទឹកភ្លៀងចំនួន ១២០ថ្ងៃជាប់គ្នា ក៏បានធ្វើឲ្យពលរដ្ឋចិនជាង ២លាន ៥សែននាក់ខ្វះទឹកប្រើប្រាស់ដែរ ពិសេស ប្រជាជនរស់ក្នុងខេត្ត Shandon និងខេត្ត Henan។ ខេត្តនីមួយៗដែលមានប្រជាជនរស់នៅប្រមាណជា ៩៥លាននាក់។ ជាក់ស្តែងនៅក្នុងស្រុក Rizhao នៃខេត្ត Shangdon អវត្តមានទឹកភ្លៀងតំាងពីថ្ងៃទី ១១ កញ្ញា ឆ្នំា ២០១០ គឺជាបាតុភូតដែលគេមិនធ្លាប់ប្រទះទេ តំាងពី ៣០០ឆ្នំាកន្លងទៅនេះ។
នៅប្រទេសចិន តំបន់ប៉ែកខាងត្បូង ជាតំបន់ដែលផ្តល់អំណោយផលច្រើនសម្រាប់ដំណំាស្រូវ និងតំបន់ប៉ែកខាងជើង ដែលផ្តល់អំណោយផលច្រើនសម្រាប់ដំណាំស្រូវសាលី។ ស្រូវសាលីសម្រាប់រដូវរងាដែលពេលនេះ កំពុងពេញវ័យ និងដែលកំពុងត្រូវការទឹក។ ទំាងនេះដោយមិនទាន់បានគិតអំពីដំណំាផ្សេងៗទេ។ ដូច្នេះចង់ ឬមិនចង់ អវត្តមានទឹកភ្លៀងនាពេលនេះបាននិងកំពុងប៉ះពាល់ដល់ការលូតលាស់ស្រូវសាលី ដោយចៀសមិនរួច។ តាមការប៉ាន់ប្រមាណមើលនៅពេលនេះ ភាពរំាងស្ងួតនឹងធ្វើឲ្យបរិមាណនៃការប្រមូលផលស្រូវសាលីរដូវរងាថយចុះជិត ១លាន ៧សែនតោន។ តែបើស្ថានការណ៍នេះនឹងបន្តរហូតដល់ខែមីនា ឬខែមេសាខាងមុខនោះ បរិមាណនៃការប្រមូលផលស្រូវសាលីរដូវរងានឹងត្រូវថយចុះរហូតដល់ទៅជាង ១០លានតោន។
រហូតមកដល់ពេលនេះ ផលវិបាកសេដ្ឋកិច្ចដែលចិនអាចនឹងទទួលពីភាពរំាងស្ងួត នៅមានកម្រិត។ នៅមានកម្រិត ព្រោះថា បរិមាណស្រូវ និងស្រូវសាលីដែលចិនបានស្តុកទុក មានច្រើនណាស់ មានន័យថាក្នុងរយៈពេលខ្លីខាងមុខ ចិនមិនបារម្ភអំពីកង្វះអង្ករដើម្បីចិញ្ចឹមពលរដ្ឋរបស់ខ្លួនទេ។ រីឯមូលហេតុដែលនំាឲ្យចិនមានបរិមាណស្រូវ និងស្រូវសាលីច្រើន ក៏ដោយសារតែតម្លៃរបស់វានៅលើទីផ្សារពិភពលោកបានកើនខ្លំាងក្នុងរយៈពេលប៉ុន្មានឆ្នំាចុងក្រោយនេះ។ តម្លៃខ្ពស់ដែលបានជម្រុញ និងលើកទឹកចិត្តប្រជាកសិករចិនឲ្យបង្កើនបន្ថែមនូវផលិតកម្មស្រូវ និងស្រូវសាលីរបស់ខ្លួន ជារៀងរាល់ឆ្នំា នោះបើទោះបីជាចិន នៅមិនទាន់អាចនំាស្រូវសាលីរបស់ខ្លួនទៅលក់នៅលើទីផ្សារពិភពលោកក៏ដោយ។
សូមជម្រាបជូនថា ក្រៅពីប្រទេសចិន ភាពរំាងស្ងួតក៏កំពុងគ្របដណ្តប់នៅលើប្រទេសឥណ្ឌាផងដែរ។ ម្យ៉ាងទៀត ឥណ្ឌា និងចិនជាប្រទេសពីរដែលបានផលិតស្រូវសាលីច្រើនជាងគេ និងក៏ជាប្រទេសពីរ ដែលមានតម្រូវការស្រូវសាលីច្រើនជាងគេនៅក្នុងពិភពលោក។ នៅលើទីផ្សារពិភពលោក ប្រទេសដែលនំាចេញស្រូវសាលីច្រើនជាងគេ មានសហរដ្ឋអាមេរិក ប្រទេសបារំាង និងប្រទេសរុស្ស៊ី។ អ៊ីចឹងហើយបានជានៅពេលនេះ ទីក្រុងវ៉ាស៊ីនតោន ប៉ារីស និងម៉ូស្គូ បាននិងកំពុងតាមដានដោយមិនប៉ប្រិចភ្នែក អំពីស្ថានភាពឧតុនិយមនៅក្នុងប្រទេសចិន។ អ្វីដែលពួកគេបារម្ភខ្លំាង គឺអំពីតម្លៃស្រូវសាលីនៅលើទីផ្សារពិភពលោក ព្រោះថា បើផលិតកម្មស្រូវសាលីនៅក្នុងប្រទេសចិន និងឥណ្ឌាបានធ្លាក់ចុះព្រមគ្នា នោះនឹងធ្វើឲ្យតម្លៃស្រូវសាលីឡើងថ្លៃកប់ពពក។
យ៉ាងណាក៏ដោយនៅពេលនេះ រដ្ឋាភិបាលក្រុងប៉េកំាងបានសម្រេចផ្តល់ជំនួយជាបន្ទាន់ចំនួនជាង ៣៣០លានដុល្លារ សម្រាប់ជួយប្រជាកសិករដែលកំពុងរងគ្រោះដោយភាពរំាងស្ងួត និងបានសម្រេចធ្វើវិនិយោគក្នុងទឹកប្រាក់ចំនួនជាង ៦០ម៉ឺនលានដុល្លារចាប់ពីនេះ រហូតដល់ឆ្នំា ២០២០ ដើម្បីរៀបចំរចនាសម្ព័ន្ធគ្រប់គ្រងស្តុក និងប្រព័ន្ធចែកចាយទឹកឡើងវិញ។ ទំាងនេះសុទ្ធសឹងជាវិធានការចំាបាច់ មិនអាចខ្វះបាន បើពុំនោះសោតទេ ចិនចៀសមិនផុត ពីការដំឡើងបរិមាណនំាចូលស្រូវសាលី ដើម្បីយកទៅចិញ្ចឹមពលរដ្ឋទំាង ១ ៣០០លាននាក់របស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ