ក្រុងព្យុងយ៉ាងគំរាមសេអ៊ូលដែលបដិសេធមិនព្រមចរចាផ្នែកយោធា
ភាពតានតឹងរវាងបងប្អូនកូរ៉េទាំងពីរបានកើតមានជាថ្មី បន្ទាប់ពីមានការបាញ់ប្រទះអាវុធគ្នា កាលពីថ្ងៃសុក្រម្សិលមិញ នៅព្រំដែនគោករវាងប្រទេសទាំងពីរ។ កន្លងមកកូរ៉េខាងជើង ធ្លាប់គំរាមកំហែង ដាក់គំនាបទៅលើកូរ៉េខាងត្បូង ពីរឿងដែលកូរ៉េខាងត្បូងបដិសេធមិនទទួលឲ្យមានការចរចាយោធារវាងប្រទេសទាំងពីរ។ ទោះយ៉ាងណា ភាពប្រទូស្តរ៉ាយគ្នាផ្នែកអាវុធ នៅព្រំដែន មិនបានរាំងស្ទះដល់ការជួបជុំគ្រួសាររបស់ប្រជាជនកូរ៉េទាំងពីរ ដែលគេបានរៀបចំធ្វើ នៅព្រឹកថ្ងៃសៅរ៍នេះ ក្នុងប្រទេសកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
នៅព្រឹកថ្ងៃសុក្រម្សិលមិញ ទាហានយាមព្រំដែនកូរ៉េខាងជើង បានបាញ់ចូលទៅក្នុងទឹកដីកូរ៉េខាងត្បូង គឺបាញ់សំដៅទៅលើក្រុមទាហានកូរ៉េខាងត្បូងដែលកំពុងដើរល្បាតនៅតាមបណ្តោយព្រំដែន។ នេះបើយោងតាមមេបញ្ជាការទ័ពកូរ៉េខាងត្បូង។ ភ្លាមៗ ទាហានកូរ៉េខាងត្បូងបានធ្វើការបាញ់តបតវិញ។
រហូតមកដល់ពេលនេះ គេនៅមិនទាន់ដឹងពីមូលហេតុដែលធ្វើឲ្យទាហានកូរ៉េខាងជើងបើកការបាញ់ប្រហារទៅលើកូរ៉េខាងត្បូង នៅឡើយទេ។ ប៉ុន្តែ កាលពីព្រឹកថ្ងៃសុក្រ រដ្ឋាភិបាលក្រុងព្យុងយ៉ាងបានព្រមានថា ទំនាក់ទំនងរវាងប្រទេសជិតខាងទាំងពីរនឹងអាចរងគ្រោះធ្ងន់ធ្ងរដោយគ្រោះមហន្តរាយមួយ ប្រសិនបើកូរ៉េខាងត្បូង នៅបន្តបដិសេធ មិនព្រមឲ្យមានការចរចាយោធាទ្វេភាគីឡើងវិញ។
កន្លងមក កូរ៉េខាងត្បូងធ្លាប់បាននិយាយយ៉ាងម៉ឺងម៉ាត់ហើយថា ខ្លួននឹងមិនព្រមចូលចរចាជាមួយកូរ៉េខាងជើងទេ ដរាបណា ប្រទេសនេះមិនព្រមសុំទោស និងទទួលស្គាល់ថា ខ្លួនបានបាញ់ពន្លិចនាវាចម្បាំងរបស់កូរ៉េខាងត្បូង។ រដ្ឋាភិបាលក្រុងសេអ៊ូលបានចេញមុខប្រកាសផ្អាកការចរចាដែលត្រូវរៀបចំ កាលពីខែកញ្ញាមុននេះ។ ការចរចាដែលសំដៅសម្រាលភាពតានតឹងរវាងប្រទេសបងប្អូនសត្រូវទាំងពីរ។
កូរ៉េខាងត្បូងបានកត់សម្គាល់ថា ចរិតញុះញង់របស់ក្រុងព្យុងយ៉ាងមានកាន់តែខ្លាំងឡើង ជាពិសេស នៅប៉ុន្មានសប្តាហ៍មុនការរៀបចំកិច្ចប្រជុំកំពូលនៃប្រទេសមហាឧស្សាហកម្ម ហៅថា G 20 ដែលត្រូវធ្វើឡើង នៅថ្ងៃទី ១០ និងទី ១១ខែវិច្ឆិកាខាងមុខនេះ ក្នុងក្រុងសេអ៊ូល។ កងទ័ពកូរ៉េខាងត្បូងត្រូវបានប្រកាសប្រាប់ឲ្យអនុវត្តនូវការធានាសន្តិសុខ កម្រិតខ្ពស់ក្នុងប្រទេស ជាពិសេសគឺចាប់ពីថ្ងៃនេះ រហូតដល់ថ្ងៃទី ១៣វិច្ឆិកា។
ភាពតានតឹងផ្នែកយោធា នៅបន្តមាន នៅតាមព្រំដែនរវាងកូរ៉េទាំងពីរ ប៉ុន្តែ គម្រោងជួបជុំគ្រួសាររវាងប្រជាជនកូរ៉េ នៅបន្តរៀបចំជាធម្មតា ចាប់ពីព្រឹកថ្ងៃសៅរ៍នេះរហូតដល់ថ្ងៃទី ៥វិច្ឆិកា នៅក្នុងតំបន់ភ្នំទេសចរណ៍មួយក្នុងទឹកដីកូរ៉េខាងជើង។ កម្មវិធីជួបជុំគ្រួសារ ដែលបែកគ្នា ដោយហេតុផលសង្រ្គាម និងការពុះចែកខ្សែបន្ទាត់ព្រំដែនរវាងប្រទេសទាំងពីរ ដែលចាប់ផ្តើមតាំងពីឆ្នាំ ២០០០ ទើបរៀបចំជា លើកទីមួយ បន្ទាប់ពីត្រូវបានផ្អាកក្នុងរយៈពេល២ឆ្នាំចុងក្រោយនេះ។ ផ្អាកដោយសារហេតុផលនយោបាយតានតឹងរវាងកូរ៉េទាំងពីរ។
កន្លងមក គេបានប្រមើលឃើញថា ទំនាក់ទំនង រវាងកូរ៉េទាំងពីរអាចនឹងល្អនឹងគ្នាឡើងវិញ ពោលគឺចាប់តាំងពីពេលរដ្ឋាភិបាលទីក្រុងសេអ៊ូលបានបញ្ជូន ស្បៀងមនុស្សធម៌ ទៅកូរ៉េខាងជើង និងការរៀបចំឲ្យមានការជួបជុំគ្រួសាររបស់ប្រជាជនកូរ៉េទាំងពីរ។ ប៉ុន្តែ ការពិតជាក់ស្តែង កូរ៉េខាងជើងដែលកំពុងមានប្រជាជនរងគ្រោះដោយភាពអត់ឃ្លាន នៅតែបន្តរករឿង និងប្រើអំណាច នុយក្លេអ៊ែររបស់ខ្លួនគំរាមកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ