តូក្យូប្រឆាំងជាផ្លូវការវត្តមាននាវាល្បាតរបស់ចិន នៅក្បែរប្រជុំកោះSenkaku
នាយករដ្ឋមន្រ្តីជប៉ុនទើបលើកនិយាយ កាលពីថ្ងៃអាទិត្យម្សិលមិញ ពីរឿងដែលចិនចេះតែបង្ហាញវត្តមាននាវាល្បាតរបស់ខ្លួន កាន់តែច្រើនក្នុងសមុទ្រចិនខាងកើតក្បែរប្រជុំកោះដែលកំពុងមាន ជម្លោះ។ នៅថ្ងៃចន្ទនេះ ទីក្រុងតូក្យូបានចេញមុខប្រឆាំងតវ៉ាជាផ្លូវការនឹងវត្តមានរបស់ នាវាល្បាតចិនពីរដែលបានបើកឆ្វែលមកជិតប្រជុំកោះSenkaku កាលពីយប់ថ្ងៃអាទិត្យ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
ជាផ្លូវការ ជប៉ុនបានបញ្ជូនលិខិតប្រឆាំង របស់ខ្លួនរួចហើយ ទៅទីក្រុងប៉េកាំង។ ជប៉ុនដែលបានធ្វើការប្រុងប្រយ័ត្នខ្លាំង ក្នុងពេលថ្មីៗនេះ បានកត់ត្រាយ៉ាងច្បាស់ថា មាននាវាល្បាតនេសាទចិន ចំនួនពីរបានបើកចូលមកជិតប្រជុំកោះ Senkaku។ យោងតាមអ្នកនាំពាក្យរបស់រដ្ឋាភិបាលជប៉ុន នាវាចិនទាំងពីរបានបើកចូលមកក្នុងដែនទឹករបស់ជប៉ុន នៅវេលាម៉ោង៩យប់ និងបានបើកចេញទៅវិញ ដោយសំដៅទៅប្រទេសចិន។ ក្នុងលិខិតរបស់ខ្លួន តូក្យូបានបញ្ជាក់ទៅប៉េកាំងថា វាគ្មានហេតុផលអ្វីដែលទូកល្បាតចិនត្រូវចូលមកក្នុងដែនទឹកគ្រប់គ្រងដោយជប៉ុននោះទេ។
សូមជំរាបជូនថា ចិន ជប៉ុន អតីតគូសត្រូវក្នុងប្រវត្តិសាស្រ្ត ចាប់ផ្តើមមើលមុខគ្នាមិនចំឡើងវិញ នៅពេល ជប៉ុនបានចាប់ឃុំខ្លួនអ្នកបើកនេសាទចិន អស់រយៈជាច្រើនថ្ងៃ កាលពីដើមខែកញ្ញានេះ។ ភាពតានតឹងបានថយចុះមួយរយៈ ក្រោយពេលជប៉ុនដែលរងការដាក់គំនាបពីចិន បានសុខចិត្តធ្វើសម្បទាន ដោះលែងអ្នកបើកទូកនេសាទចិន។ ប៉ុន្តែទំនាក់ទំនងរវាងប្រទេសទាំងពីរចាប់ផ្តើមល្អក់កករជាថ្មី ចាប់តាំងពីពាក់កណ្តាលខែ តុលានេះ។ ពោល គឺចាប់តាំងពីពេលដែលប្រជាជនទាំងពីរប្រទេសដែលមានលក្ខណៈជាតិនិយមរៀងៗខ្លួន បានធ្វើបាតុកម្មភ្លូកទឹកភ្លូកដី ដើម្បីទាមទារឲ្យរដ្ឋាភិបាលតវ៉ាយកប្រជុំកោះដែលមានជម្លោះមកគ្រប់គ្រងឲ្យខាងតែបាន។ ទាំងនេះ សឲ្យឃើញថា ជម្លោះពិតប្រាកដរបស់ប្រទេសទាំងពីរមិនមែនដោយសាររឿងចាប់អ្នកបើកទូកនេសាទចិននោះទេ តែជាជម្លោះលើរឿងចាស់ រឿងដណ្តើមទឹកដីដែលមិនងាយនឹងដោះស្រាយរួចរវាងប្រទេសទាំងពីរ។
ប្រជុំកោះ Senkaku ដែលចិនឲ្យឈ្មោះថា Diaoyu ត្រូវបានជប៉ុនដាក់បញ្ចូលជាដែនដីរបស់ខ្លួនតាំងពីឆ្នាំ ១៨៩៥ និង គ្រប់គ្រងរហូតមក ដោយមានការទទួលស្គាល់ពីច្បាប់អន្តរជាតិ។ ប្រជុំកោះនេះមានផ្ទៃក្រឡា សរុបជាង ៧គីឡូម៉ែត្រការ៉េ និងស្ថិតក្នុងសមុទ្រចិនខាងកើត។ ប្រជុំកោះ Senkaku ត្រូវគេរកឃើញថា មានអណ្តូងប្រេង និងជាកន្លែងសំបូរត្រី។ ចាប់តាំងពីពេលនោះមក គឺតាំងពីឆ្នាំ ១៩៧០ ចិន និងតៃវ៉ាន់ក៏បានចេញមុខទាមទារយកកោះនេះ មកធ្វើជារបស់ខ្លួនវិញ ដោយអះអាងថា ដែនទឹកជុំវិញប្រជុំកោះSenkakuនោះជាកម្មសិទ្ធិរបស់ចិន តាំងពីបុរាណកាលមក។ កន្លងមក ទូកនេសាទចិន និងតៃវ៉ាន់តែងតែឆ្លៀតលបចូលមកនេសាទក្បែរ ប្រជុំកោះ Senkaku ប៉ុន្តែតែងតែត្រូវនាវាល្បាតជប៉ុនតាមបណ្តេញចេញ ឬចាប់ឃាត់ទុក ដូចករណីអ្នកបើកទូកនេសាទចិនកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ