សន្តិសុខជាតិរបស់ជប៉ុនកំពុងរងការគំរាមកំហែង
នៅចំពោះមុខនៃការកើនឡើងនៃវត្តមានរបស់កងនាវាចម្បាំងចិន ក្នុងសមុទ្រចិនខាងត្បូង និងកម្មវិធីអភិវឌ្ឍន៍អាវុធនុយក្លេអ៊ែរបស់កូរ៉េខាងជើង សន្តិសុខរបស់ជប៉ុនបច្ចុប្បន្នកំពុងស្ថិតក្នុងស្ថានភាពដ៏លំបាកមួយ។ នេះជាការថ្លែងរបស់នាយករដ្ឋមន្រ្តីជប៉ុន ទៅកាន់រេហ៍ពលជប៉ុនដែលកំពុងដើរក្នុងក្បួនព្យុហយាត្រា ដែលរៀបចំធ្វើនៅថ្ងៃអាទិត្យទី២៤ តុលា នៅជាយក្រុងតូក្យូ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
សម្រាប់ នាយករដ្ឋមន្រ្តីជប៉ុន លោកណាអូតូ កាន សន្តិសុខសម្រាប់ជប៉ុនកាន់តែមិនអំណោយផលល្អ នោះគឺចាប់តាំងពីមានដំណឹងថា កូរ៉េខាងជើងកំពុងអភិវឌ្ឍមិនឈប់ឈរអាវុធនុយក្លេអ៊ែររបស់ខ្លួន ចំណែកចិនឯណោះវិញកំពុងបង្ហាញ បង្អួតគ្រឿងសព្វាវុធទំនើបៗរបស់ខ្លួន តាមរយៈការពង្រាយនាវាចម្បាំងរបស់ខ្លួន នៅក្បែរកោះរបស់ប្រទេសជប៉ុន។
ការថ្លែងរបស់នាយករដ្ឋមន្រ្តីជប៉ុនធ្វើឡើងក្នុងបរិបទដែលវិបត្តិការទូតចិន-ជប៉ុនកាន់តែធ្លាក់ដុនដាប។ នោះគឺចាប់តាំងពីពេលដែលជប៉ុនបានចាប់ឃាត់អ្នកបើកបរទូកនេសាទចិន កាលពីខែមុនដោយសារតែ អ្នកបើកទូកចិនរូបនោះបានបើកបុកទង្គិចជាមួយនាវាល្បាតរបស់ជប៉ុន។ សង្គ្រាមពាក្យសំដីទៅវិញ ទៅមក ទៅលើរឿងទាមទារគ្រប់គ្រងប្រជុំកោះ Senkaku បានជំរុញឲ្យចលនាជាតិនិយម កាន់តែផុសផុលឡើងក្នុងប្រទេសទាំងពីរ។
ងាកមកមើលកូរ៉េខាងជើងវិញម្តង ជប៉ុនកាន់តែព្រួយបារម្ភពីសុវត្ថិភាពរបស់ខ្លួន ជាពិសេសក្រោយពីមានព័ត៌មានពីខាងទីក្រុងសេអ៊ូលដែលថា កូរ៉េខាងជើងកំពុងត្រៀមលក្ខណៈបាញ់សាកល្បងគ្រាប់នុយក្លេអ៊ែរជាលើកទីបី ក្នុងពេលខាងមុខនេះ។
ក្នុងស្ថានភាពបែបនេះ ជប៉ុនចាំបាច់ត្រូវពង្រឹងវិស័យយោធារបស់ខ្លួន ចំណែកកងទ័ពការពារខ្លួន ត្រូវត្រៀមគ្រប់លក្ខណៈ ដើម្បីឆ្លើយតបឲ្យទាន់ពេល ទៅនឹងការវាយប្រហារណាមួយ។ ឆ្លៀតក្នុងឱកាសនេះ នាយករដ្ឋមន្រ្តីជប៉ុនបានផ្តើមនិយាយរំលឹកពីសារៈសំខាន់ និងពង្រឹងសម្ព័ន្ធភាពរបស់ជប៉ុន ជាមួយអាមេរិកឡើងវិញ។ សម្ព័ន្ធភាពជប៉ុន អាមេរិកដែលមានអាយុ ៥០មកហើយនោះកំពុងត្រូវរង្គោះរង្គើ ពោលគឺចាប់តាំងពីប្រជាជនជប៉ុនប្រឆាំងនឹងវត្តមានរបស់មូលដ្ឋានទ័ពអាមេរិក នៅលើកោះអូគីណាវ៉ា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ