លោកHamid Karzaï បង្កើតឩត្តមក្រុមប្រឹក្សាដើម្បីសន្តិភាព
ការបង្កើតឩត្តមក្រុមប្រឹក្សាដើម្បីសន្តិភាពត្រូវបានលោក ប្រធានាធិបតីអាហ្វហ្កានិស្តង់ Hamid Karzaï ប្រកាសឱ្យដឹង នៅថ្ងៃសៅរ៍៤កញ្ញាម្សិលមិញ។ក្រុមប្រឹក្សាត្រូវបញ្ចូលទៅក្នុង សមាសភាពខ្លួននូវអ្នកតំណាងសង្គមអាហ្វហ្កានិស្តង់ទាំងមូល រួមទាំងពួកតាលីបង់ផងដែរ។ក្រុមប្រឹក្សាមានគោលដៅច្បាស់លាស់ ប៉ុន្តែប្រាកដជាពិបាកណាស់នឹងធ្វើឱ្យសម្រេចគឺណែនាំបញ្ចុះបញ្ចូល ពួកតាលីបង់ឱ្យមកអង្គុយនៅតុចរចាស្តីពីសន្តិភាព។
ចុះផ្សាយនៅថ្ងៃ៖
សេចក្តីរាយការណ៍របស់វីនស្តុន រតនា
ចាប់តាំងពីការវាយផ្តួលរំលំរបបពួកតាលីបង់កាលពី៩ឆ្នាំមុនមក ពួកតាលីបង់ទាំងនេះបដិសេធទាត់ចោលជារឿយៗនូវសំណើសូមឱ្យចរចាគ្នា។គេចាត់ទុកលោកប្រធានាធិបតីHamid Karzaï ថាជាអាយ៉ងមួយរបស់សហរដ្ឋអាមេរិកនិងថ្លែងត្រៀមខ្លួនចរចាស្តីពីសន្តិភាពតែនៅល្គឹកណាកងទ័ពបរទេសដកថយចេញពីប្រទេស។
កងទ័ពនៃបក្សសម្ព័ន្ធអូតង់ ប្រចាំនៅអាហ្វហ្កានិស្តង់មានគ្នាចំនួនជិត១៥ម៉ឺននាក់។ដោយពុំអាចបំពេញបានល័ក្ខខ័ណ្ឌធំដាក់ដោយពួកបះបោរតាលីបង់ លោកHamid Karzaïចង់ដាក់ឱ្យអង្គុយនៅតុចរចាជាទីដែលពួកតាលីបង់ប្រហែលជានឹងពុំប្រឈមមុខតទល់គ្នាដោយចំពោះជាមួយរដ្ឋាភិបាល។ប្រសិនបើពួកតាលីបង់មិនមកអង្គុយនៅតុចរចាគ្នាទេ នោះលោកHamid Karzaïរំពឹងថានឹងធ្វើឱ្យពួកតាលីបង់ស្ថិតនៅឯកោអនាថោ នៅលើឆាកនយោបាយអាហ្វហ្កានិស្តង់។
ឩត្តមក្រុមប្រឹក្សាដើម្បីសន្តិភាពដែលការបង្កើតត្រូវបានអនុម័តយល់ព្រមរួចស្រេចទៅហើយ នៅខែមិថុនាមុន នៅឱកាសសម័យប្រជុំសភា “ jirga ដើម្បីសន្តិភាព “ នៅទីក្រុងកាប៊ូល ត្រូវមាននៅក្នុងសមាសភាពខ្លួន “ ពួកមេកន្ទ្រាញសង្គ្រាមសាសនាJihad ពួកអ្នកប្រកបដោយអំណាចឥទ្ធិពលនិងស្ត្រី “ ។ចំណែកខាងពួកតាលីបង់វិញ នៅខណៈនេះ មានអតីតសមាជិកចលនាចំនួនតែប៉ុន្មាននាក់ទេដែលទំនងជាចាប់អារម្មណ៍។ដូច្នេះ គឺជាយុទ្ធវិធីធ្វើឱ្យកម្លាំងសំខាន់ៗបំផុតរបស់ពួកតាលីបង់ស្ថិតនៅឯកោអនាថោនៅលើឆាកនយោបាយដែលប្រហែលអាចនឹងមានប្រៀបជាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ