ទិវាកាន់ទុក្ខជាតិដល់ជនរងគ្រោះស្លាប់ដោយការស្រុតបាក់ដីនៅ Gansu
នាថ្ងៃអាទិត្យនេះ ប្រទេសចិន ប្រារព្ធទិវាកាន់ទុក្ខជាតិ ដើម្បីជាគារវកិច្ចដល់វិញ្ញាណក្ខន្ធនៃជនរងគ្រោះដែលស្លាប់នៅ ក្នុងការស្រុតបាក់ដីនៅខេត្ត Gansuប៉ែកពាយ័ព្យប្រទេសចិន។ គឺជាគ្រោះធម្មជាតិមួយដ៏សាហាវបំផុតចាប់តាំងពីជាច្រើនទសវត្ស មកហើយនិងដែលបណ្តាលឲ្យមានមនុស្សស្លាប់ប្រមាណជាង១២០០នាក់និង បាត់ខ្លួនជនចំនួន ជាង ៥០០នាក់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នុយ ប៊ែរណាដែត
ទង់មរណសញ្ញាត្រូវបានគេបង្ហូតឡើងនៅទូទាំងប្រទេសចិន។ ទីកន្លែងកំសាន្តនានាដូចជានៅកន្លែងរោងភាពយន្ត កន្លែងលេងល្បែងកន្លែងច្រៀង karaoké ឬកន្លែងប្រគំតន្ត្រី ត្រូវបានបិទទ្វារដែរ។
យោងតាមទីភ្នាក់ងារពត៌មានចិនថ្មី គ្រោះធម្មជាតិស្រុតបាក់ដីនេះ បានបណ្តាលឲ្យមានមនុស្សស្លាប់ចំនួន ១២៣៩នាក់និងជនចំនួន ៥០៥នាក់ផ្សេងទៀតបាត់ខ្លួន។
ប្រជាជននិងក្រុមអ្នកជួយសង្គ្រោះជាច្រើនពាន់នាក់នៅតំបន់ភ្នំ Gansuនេះ ត្រូវរងគ្រោះដោយការហូរបាក់ដីនិងភក់កាលពីមួយសប្តាហ៍មកហើយ បានផ្អាកការស្វែងរកជននៅរស់រានមានជីវិត ដើម្បីចូលរួមក្នុងទិវាកាន់ទុក្ខជាតិនេះដែរ។ គឺនៅវេលាម៉ោង ១០ព្រឹកម៉ោងក្នុងស្រុក ពលរដ្ឋចិននៅទូទាំងប្រទេសបានស្មិងស្មាធិ៍បីនាទី ដើម្បីគោរពដល់វិញ្ញាណក្ខន្ធនៃជនរងគ្រោះ។
នៅ ប៉េកាំង ប្រជាជនជាង ១ម៉ឺននាក់ ជួបជុំគ្នានាព្រឹកថ្ងៃអាទិត្យនេះនៅលើទីលាន Tiananmen ដើម្បីចូលរួមពិធីនេះដែរ។ សំឡេងស៊ីរ៉ែនបានបន្លឺឡើង។ អ្នកចូលរួមខ្លះ ដោតផ្កាធ្វើពីក្រដាសពណ៌សហើយខ្លះទៀតកំពុងតែកាន់ប៉ែលនៅនឹងដៃ ខណៈពេលស្មិងស្មាធិ៍ ៣នាទីនេះ នៅតាមទីតំបន់ផ្សេងៗក្នុងប្រទេសចិន។ បន្ទាប់មក ក្រុមជួយសង្គ្រោះនិង ក្រុមបុគ្គលិកពេទ្យ បានចាប់ធ្វើការឡើងវិញ ដោយនាំគ្នាកាយកំទេចកំទីចេញពីស្ទឹង Bailong ដើម្បីស្វែងរកសាកសពជនរងគ្រោះដទៃទៀតដែលនៅកប់ពីក្រោមកម្រាស់ភក់ជាច្រើនម៉ែត្រ ព្រមទាំងធ្វើការបាញ់ថ្នាំដើម្បីសម្លាប់មេរោគទៀតផង។
ទន្ទឹមនេះដែរ អាជ្ញាធរចិន បានព្រមានប្រាប់ដល់ប្រជាជនចិន ថា នៅថ្ងៃអាទិត្យនេះ ទឹកភ្លៀងនឹងបន្តធ្លាក់យ៉ាងខ្លាំងទៀត។ ចំណែកទឹកជំនន់ ការស្រុតបាក់ដី និង កំទេចកំទីដែលនៅអណ្តែតពាសពេញផ្ទៃទឹកនោះ នៅតែបន្តជាគ្រោះថ្នាក់ដល់ប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ