គ្រោះធម្មជាតិស្រុតបាក់ដីបណ្តាលឱ្យមានជនរងគ្រោះស្លាប់ជាច្រើន នៅប៉ែកពាយ័ព្យប្រទេសចិន
យ៉ាងតិចក៏មានមនុស្សស្លាប់១២៧នាក់និង២០០០នាក់ទៀតបាត់ខ្លួន បន្ទាប់ពីការស្រុតបាក់ដីបណ្តាលមកពីភ្លៀងធ្លាក់ខ្លាំង នៅថ្ងៃ៧សីហា នៅក្នុងខែត្រGansu (នៅប៉ែកពាយ័ព្យប្រទេសចិន)។លោកនាយករដ្ឋមន្ត្រី វេន ជាប៉ាវដែលបានអញ្ជើញទៅដល់ខែត្រមានភ្នំនិងរងគ្រោះធម្មជាតិ នៅថ្ងៃអាទិត្យ៨សីហា ម្សិលមិញ ក៏ព្រមទាំងលោកប្រធានាធិបតី ហ៊ូ ស៊ិនតាវ បានអំពាវនាវទៅកាន់ក្រុមអ្នកជួយសង្គ្រោះឱ្យធ្វើរាល់អ្វីៗអស់ពីសមត្ថភាព ដើម្បីជួយសង្គ្រោះជីវិតមនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ Delphine Sureau ពីសៀងហៃ
លោកវេន ជាប៉ាវបានអញ្ជើញមកលើកទឹកចិត្តទាហានបីពាន់នាក់ គ្រូពេទ្យនិងគិលានុបដ្ឋាកដែលកំពុងតែខំប្រឹងស្វែងរកអ្នកនៅរស់រានមានជីវិតជាយថាហេតុ :” គេពុំត្រូវសំចៃកម្លាំងឡើយ ដើម្បីជួយសង្គ្រោះជីវិតមនុស្ស “ -នេះជាប្រសាសន៍លោកនាយករដ្ឋមន្ត្រីចិនថ្លែងនៅខែត្រហ្កាន់ស៊ូ ( Gansu )។
ប៉ុន្តែភក់ជ្រាំដែលនៅតាមវិថីខ្លះមានកំពស់ដល់ទៅមួយម៉ែត្រផង ធ្វើឱ្យពិបាកដល់ដំណើរជឿនលឿនទៅមុខនៃការជួយសង្គ្រោះ។គេពុំអាចទោះជាបើកបរឡានក្តី ទោះជាដើរនឹងជើងក្តី។អគ្គិសនីក៏ត្រូវបានកាត់ផ្តាច់ដែរ។
បណ្តាជនជាច្រើនដែលចំនួនមួយភាគបីមានដើមកំណើតមកពីតំបន់ទីបេ នៅក្នុងខែត្រស្វយ័តនេះ នៅតែបាត់ខ្លួនជានិច្ច អ្នកខ្លះទៀតជាប់គាំងនៅក្នុងបន្ទប់លំនៅឋានខ្លួន។អ្នកខ្លះបានទៅជ្រកនៅលើដំបូលផ្ទះខ្លួន។
ការស្រុតបាក់ដីដំបូងបានកើតមាននៅពេលដែលអ្នកស្រុកភាគច្រើនកំពុងតែដេក នៅយប់ថ្ងៃ៧សីហា។ផ្ទះសំបែងទាំងឡាយបានស្រុតរលំធ្លាក់ទៅក្នុងទឹកស្ទឹង Bailongដែលឡើងពេញព្រៀបហូរហៀរផ្តុំម៉ោងមួយព្រឹក ដោយហូរពាំនាំទាំងភក់ជ្រាំ ទាំងផ្ទាំងថ្មខ្ពស់ចោត ទៅជាមួយខ្លួន។តែក្នុងរយៈពេលប៉ុន្មាននាទីប៉ុណ្ណោះ ពាក់កណ្តាលនៃស្រុកហ្សូស៊ុយ ( Zhouqu ) ត្រូវបានលិចទឹក។
ពួកទាហានក៏ខំប្រឹងប្រែងដែរក្នុងការរើកកាយយកចេញកំទេចអំបែងដែលធ្វើឱ្យទទើសទទែងដល់ចរន្តទឹកស្ទឹង ពីព្រោះទឹកភ្លៀងធ្លាក់ខ្លាំងដូចទឹកជ្រោះ ត្រូវគេទន្ទឹងរង់ចាំ នៅក្នុងតំបន់ នៅថ្ងៃអង្គារនិងថ្ងៃពុធខានស្អែកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ