ខ្យល់រដូវបំផ្លិចបំផ្លាញនៅប៉ាគីស្តង់
ខ្យល់រដូវបានបណ្តាលឱ្យមានការខូចខាតយ៉ាងច្រើន ចាប់តាំងពីប្រទេសចិនរហូតដល់ប៉ាគីស្តង់ ជាទីដែលក្នុ្ងងអំឡុងពេលបីថ្ងៃ ទឹកជំនន់ និងការបាក់ស្រុតដីបានបណ្តាលឱ្យមានមនុស្សស្លាប់ជាង៤០០នាក់ និងធ្វើឱ្យជនជាង៦០ម៉ឺនរងគ្រោះ -ស្របតាមអាជ្ញាធរក្នុងស្រុកផ្សាយឱ្យដឹង នៅថ្ងៃសុក្រម្សិលមិញ៣០កក្កដា។
ចុះផ្សាយនៅថ្ងៃ៖
សេចក្តីរាយការណ៍របស់វីនស្តុន រតនា
ផ្ទះរាប់រយខ្នង និងដីជាច្រើនពាន់ហិកតារត្រូវលិចទឹក នៅប៉ែកពាយ័ព្យប្រទេស និងនៅCachemire (ខាងជើង) ផ្លូវធំឆ្ពោះទៅកាន់ប្រទេសចិនត្រូវបានកាត់ផ្តាច់ ជាហេតុធ្វើឱ្យសហគមន៍រាប់រយស្ថិតនៅឯកោដាច់ពីគេឯង។
ភ្លៀងធ្លាក់ខ្លាំងពុំធ្លាប់ដែលមានចំនួន៣២១មីល្លីម៉ែត្រ នៅប៉ែកពាយ័ព្យ ក្នុងរយៈពេល៣៦ម៉ោងចុងក្រោយ -ស្របតាមក្រសួងឩតុនិយមប៉ាគីស្តង់។ ខែត្រ Khyber Pakhtunkhwa (អតីតខែត្រនៅព្រំដែនប៉ែកពាយ័ព្យ) ជាទីដែលសហគមន៍ក្រីក្រជាច្រើនរស់នៅលើភ្នំបានទទួលរងគ្រោះខ្លាំងជាងគេ។ “គឺជាទឹកជំនន់ដ៏ធ្ងន់ធ្ងរបំផុតពុំធ្លាប់ដែលមានទេ នៅក្នុងខែត្រ“ -នេះជាយោបល់របស់រដ្ឋមន្ត្រីក្រសួងព័ត៌មាននៃខែត្រ លោក Mian Iftikhar Hussain ថ្លែងនៅឱកាសសន្និសីទសារព័ត៌មាន នៅPeshawar។ ជនជិត១៥០នាក់បានបាត់ខ្លួន ទឹកបានពន្លិចផ្លូវចម្ងាយប្រមាណជា២០០គីឡូម៉ែត្រ។ “យ៉ាងតិចមានជន៦០ម៉ឺននាក់បានរងគ្រោះដោយទឹកជំនន់ ហើយចំនូននេះនឹងកើនឡើងថែមទៀត ពីព្រោះទឹកចេះតែបន្តកើនឡើង នៅPeshawar NowsheraនិងCharsada” -នេះជាការបញ្ជាក់ប្រាប់របស់លោករដ្ឋមន្ត្រី។
ទីក្រុងSwat Shangla និងPeshawarត្រូវបានកំណើនទឹកកាត់ផ្តាច់ពីទីក្រុងដទៃទៀតនៃប្រទេស។ អ្នកឈប់សំរាកវ៉ាកងប្រមាណជា២៨០០នាក់បានជាប់គាំង នៅជ្រលងភ្នំ Swatដែលត្រូវបានកងទ័ពប៉ាគីស្តង់ច្បាំងដណ្តើមយកបានមកវិញពីកណ្តាប់ដៃពួកតាលីបង់ នៅឆ្នាំទៅ។
ទឹកជំនន់ក៏បានរាតត្បាតដែរតំបន់Cachemire នៅលើដែនដីប៉ាគីស្តង់ដែលស្ថិតនៅខាងជើងប្រទេសជាទីដែលមានមនុស្សស្លាប់យ៉ាងតិច២២នាក់ និងតំបន់Baloutchistan (ប៉ែកនិរតី) ដោយមានអ្នកស្លាប់២៥នាក់-ស្របតាមអាជ្ញាធរក្នុងស្រុក។
ចំនួនអ្នករងគ្រោះស្លាប់ដោយទឹកជំនន់បីថ្ងៃនេះមានច្រើនជាងចំនួនអ្នកស្លាប់ក្នុងគ្រោះថ្នាក់ធ្លាក់យន្តហោះដឹកអ្នកដំណើរ កាលពីថ្ងៃពុធ២៨កក្កដា នៅលើកូនភ្នំជាយក្រុងIslamabadគឺ១៥២នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ