នាវាចម្បាំងកូរ៉េខាងត្បូង ៖ អង្គការសហប្រជាជាតិចូលចរចាជាថ្មីជាមួយកូរ៉េខាងជើង
ការពិភាក្សាចរចាថ្មីមួយ រវាងកូរ៉េខាងជើង ជាមួយក្រុមបញ្ជាការរួមនៃអង្គការសហប្រជាជាតិ ស្តីពីសំណុំរឿងបាញ់ពន្លិចនាវាចម្បាំងកូរ៉េខាងត្បូង Cheonan កាលពីខែមីនា បានផ្តើមប្រព្រឹត្តទៅនៅថ្ងៃអង្គារនេះ នៅក្នុងបរិបទមួយដែលឧបទ្វីបកូរ៉េកំពុងឋិតក្នុងសម្ពាធដ៏តានតឹងបំផុត។
ចុះផ្សាយនៅថ្ងៃ៖
សេចក្តីរាយការណ៍របស់ អៀង សុខម៉ិញ
ជំនួបពិភាក្សាថ្នាក់វរសេនីយ៍ឯក ដែលបានចាប់ផ្តើមតាំងពីព្រឹកមិញមក នៅក្នុងភូមិមួយជាប់ព្រំដែនខ័ណ្ឌចែកកូរ៉េទាំងពីរនេះ គឺជាការប្រុងប្រៀបរៀបចំ កិច្ចចរចាថ្នាក់ឧត្តមសេនីយ៍ ឈានទៅរកការស៊ើបអង្កេតអន្តរជាតិស្តីពីការបាញ់ពន្លិចនាវាចម្បាំងកូរ៉េខាងត្បូង ឈើនណាន់ (Cheonan) សម្លាប់ជីវិតនាវិកអស់ ៤៦នាក់ កាលពីខែមីនាកន្លងទៅ។ នេះបើយោងតាមការអះអាងរបស់ទីបញ្ជាការរួមអង្គការសហប្រជាជាតិ ដែលដឹកនាំដោយសហរដ្ឋអាមេរិក និងដែលមានភារៈត្រួតពិនិត្យការគោរពកិច្ចឈប់បាញ់គ្នា បញ្ចប់សង្គ្រាមក្នុងឧបទ្វីបកូរ៉េឆ្នាំ ១៩៥៣។
នៅក្នុងជំនួបប្រជុំលើកមុន កូរ៉េខាងជើងបានស្នើបញ្ជូនក្រុមអ្នកស៊ើបអង្កេតទៅកាន់កូរ៉េខាងត្បូង ដើម្បីពិនិត្យមើលភស្តុតាងទាំងឡាយដែលក្រុងសេអ៊ូលបានលើកយកទៅប្តឹង ប៉ុន្តែសំណើនេះមិនត្រូវបានទទួលយកដោយកូរ៉េខាងត្បូងទេ។
ចំណែកការពិភាក្សលើកនេះ បានប្រព្រឹត្តទៅនៅក្នុងបរិយាកាសមួយដ៏តានតឹងបំផុត ពីព្រោះនារយៈពេលពីរបីថ្ងៃចុងក្រោយនេះ ក្រុងព្យុងយ៉ាងបានបញ្ចេញកាយវិការរបៀបអ្នកលេង គួរឲ្យខកចិត្តបំផុត។ កប៉ាល់នេសាទកូរ៉េខាងត្បូងមួយគ្រឿង ព្រមទាំងអ្នកនេសាទ៧នាក់ ត្រូវរបបកុម្មុនិស្តនេះស្ទាក់ចាប់រឹបអូស និងឃុំខ្លួន កាលពីថ្ងៃនៅថ្ងៃសៅរ៍ ហើយនៅថ្ងៃច័ន្ទម្សិលមិញ ដែល កូរ៉េខាងត្បូងត្រូវបិទបញ្ចប់សមយុទ្ធរបស់ខ្លួន កូរ៉េខាងជើងបានបាញ់កាំភ្លើងធំ ប្រមាណជាង ១១០គ្រាប់ សំដៅសមុទ្ទលឿង ជិតកន្លែងដែលនាវាចម្បាំងកូរ៉េខាងត្បូងបានលិច កាលពីខែមីនា។ ថ្វីបើគ្រាប់ខ្លះធ្លាក់ក្នុងដែនសមុទ្ទរបស់កូរ៉េខាងជើង តែក៏មានគ្រាប់ខ្លះទៀតបានធ្លាក់ក្នុងដែនរបស់កូរ៉េខាងត្បូងដែរ។ នេះបើតាមការគូសបញ្ជាក់របស់ភ្នាក់ងារកូរ៉េខាងត្បូង ដែលបានបន្ថែមទៀតថា តាំងពីថ្ងៃសៅរ៍មក អាជ្ញាធរខាងជើង មិនបានចេញសេចក្តីថ្លែងការណ៍អ្វីទាក់ទងមកខាងកូរ៉េខាងត្បូងសោះ។
កូរ៉េខាងត្បូង និងសហរដ្ឋអាមេរិក គ្រោងនឹងធ្វើសមយុទ្ធមួយថ្មីទៀត នៅសប្តាហ៍ក្រោយ ក្នុងផ្ទៃសមុទ្ទនេះទៀត។ ដូច្នេះល្បែងសង្គ្រាមនៅក្នុងឧបទ្វីបកូរ៉េ នឹងត្រូវមានជាបន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ