ការបោះឆ្នោតជ្រើសរើសតែអ្នកតំណាងរាស្ត្រម្នាក់គត់
ការប្រយុទ្ធគ្នារវាងអាជ្ញាធរថៃនិងពួកសកម្មជនប្រឆាំងរដ្ឋាភិបាល គឺ "ពួកអាវក្រហម" ប្រព្រឹត្តទៅជាលើកទីមួយ តាមរយៈការិយាល័យបោះឆ្នោតនៅបាងកក។ ការបោះឆ្នោតសភានៅថ្ងៃអាទិត្យ ២៥កក្កដានេះ ជ្រើសរើសតែអ្នកតំណាងរាស្ត្រម្នាក់គត់ ដើម្បីជំនួសអ្នកតំណាងរាស្ត្រប្រជាធិបតេយ្យម្នាក់ ដែលបានស្លាប់ដោយរោគមហារីក។ ការបោះឆ្នោតនេះមានសារៈសំខាន់ ជាពិសេសគឺជាការបោះឆ្នោតលើកទី១ ចាប់តាំងពីមានអំពើហិង្សាដ៏ឃោរឃៅដែលបានបណ្តាលឲ្យស្លាប់ជន៩០នាក់ និងរបួស១៩០០នាក់ កាលពីខែមេសា និងឧសភាមុននេះមក។ អ្វីដែលគួរឲ្យភ្ញាក់ផ្អើល គឺបេក្ខជននៃគណបក្សប្រឆាំងធ្វើយុទ្ធនាការឃោសនាបោះឆ្នោតចាប់ពីបន្ទប់នៃពន្ធនាគាររបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីប្រែសម្រួលរបស់ វីនស្តុន រតនា
អ្នកបោះឆ្នោតចំនួនជិត៤០ម៉ឺននាក់ អញ្ជើញទៅកាន់ហិបឆ្នោតនៅថ្ងៃអាទិត្យទី ២៥ កក្កដានេះ ដោយសរុបមានបេក្ខជនចំនួន៦រូប ប៉ុន្តែការបោះឆ្នោតអាចនឹងត្រូវប្រកួតប្រជែងគ្នារវាងគណបក្សធំពីរនៃរាជាណាចក្រថៃ គឺម្ខាងគណបក្សប្រជាធិបតេយ្យកាន់រដ្ឋអំណាច តំណាងដោយលោក Panich Vikitsreth ជាអតីតអនុរដ្ឋមន្ត្រីក្រសួងការបរទេស ម្ខាងទៀតគឺគណបក្សភឿថៃ Puea Thaï ដែលបានគាំទ្របាតុកម្មប្រឆាំងនឹងរដ្ឋាភិបាលក្នុងប៉ុន្មានខែចុងក្រោយនេះ។
គណបក្សភឿថៃ Puea Thaï បានសម្រេចចិត្តជ្រើសរើសលោក Korkaew Pikulthong ជាអ្នកដឹកនាំម្នាក់របស់ "ពួកអាវក្រហម"។ គឺជាជម្រើសដ៏មោះមុត ដោយហេតុថាគាត់កំពុងជាប់ឃុំឃាំងក្នុងពន្ធនាគារ ចាប់តាំងពីចប់បាតុកម្ម ត្រូវជាប់ចោទពីបទភេរវនិយម។ សំណូមពររបស់គាត់ សូមឲ្យអាជ្ញាធរដោះលែងគាត់ជាថ្នូរនឹងប្រាក់តម្កល់ត្រូវបានអាជ្ញាធរបដិសេធទាត់ចោល។ ហេតុដូច្នេះហើយបានជាគាត់ត្រូវធ្វើយុទ្ធនាការឃោសនាបោះឆ្នោតចាប់ពីពន្ធនាគារ តាមរយៈសំបុត្រ និងខ្សែអាត់វីដេអូ បណ្តាក់វេនគ្នាដោយបក្សព័ន្ធរបស់គាត់។
ការបោះឆ្នោតជ្រើសរើសតែមួយអាសនៈប៉ុណ្ណោះនៃរដ្ឋសភានៅក្នុងសង្កាត់មួយ នៃទីក្រុងបាងកក ដែលតាមធម្មតាជាដែនឥទ្ធិពលរបស់ពួកអ្នកប្រជាធិបតេយ្យ ប៉ុន្តែវាត្រូវគេចាត់ទុកជាសញ្ញាមួយចង្អុលបង្ហាញការគាំទ្រដែលភាគីទាំងពីរបានទទួល។ វាជាចំណាប់អារម្មណ៍មួយ ឲ្យដឹងជាមុនអំពីការបោះឆ្នោតទូទាំងប្រទេសជាតិដែលនឹងប្រព្រឹត្តទៅ នៅឆ្នាំក្រោយ។
កំណែនដ៏ខ្លាំងនៃ "ពួកអាវក្រហម" នៅឱកាសយុទ្ធនាការឃោសនាបោះឆ្នោតនេះ ទោះបីជាមានការប្រកាសភាពអាសន្ន និងការបង្ក្រាបគាបត្បៀតពីខាងប៉ូលិសក្តី វាបានបង្ហាញឲ្យឃើញថា ចលនារបស់ពួកគេ ពុំងាយនឹងត្រូវអាជ្ញាធរកប់ចោលដោយស្រួលៗឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ