កងទ័ពនិងព្រះរាជាពុំត្រូវធ្វើអន្តរាគមន៍នយោបាយទេ
កងទ័ពនិងព្រះរាជាដែលមានវត្តមាន នៅគ្រប់តែស្ថាប័ននៃប្រទេសថៃពុំត្រូវធ្វើអន្តរាគមន៍នយោបាយទេ នេះជាយោបល់របស់លោកនាយករដ្ឋមន្ត្រីអភិស៊ីទនៅក្នុងបទសម្ភាសន៍មួយ ផ្តល់ឲ្យទីភ្នាក់ងារពត៌មានបារាំងAFPនៅពេលដែលប្រទេសជាតិកំពុង តែរុំដំបៅបណ្តាលមកពីវិបត្តិបង្ហូរឈាមពីរខែមុននេះ។
ចុះផ្សាយនៅថ្ងៃ៖
សេចក្តីរាយការណ៍របស់ វីនស្តុន រតនា
ឥទ្ធិពលរបស់យោធានិងព្រះបរមរាជវាំងនៅដំណាក់កាលនានាបានបន្សល់ទុកស្លាកស្នាមដ៏ជ្រាលជ្រៅនៅក្នុងប្រវត្តិសាស្ត្រប្រទេសថៃប្រកបដោយអស្ថិរភាពដែលនៅនិទាឃរដូវឆ្នាំនេះបានជួបប្រទះវិបត្តិមួយដែលបានបណ្តាលឲ្យស្លាប់មនុស្ស៩០នាក់និងរបួស១ ៩០០នាក់។
“ខ្ញុំសង្ឃឹមថាកងទ័ពនៅតែបន្តគោរពរដ្ឋធម្មនុញ្ញនិងរបបគ្រប់គ្រងអាស្រ័យសភាហើយកងទ័ពនឹងស្តាប់តែតាមបញ្ជារបស់រដ្ឋាភិបាលដែលស្របតាមច្បាប់” នេះជាប្រសាសន៍របស់លោកនាយកដ្ឋមន្ត្រីថៃអភិស៊ីទវេចាជីវ៉ានៅក្នុងបទសម្ភាសន៍មួយផ្តល់ឲ្យទីភ្នាក់ងារពត៌មានបារាំងAFPនៅទីស្នាក់ការរដ្ឋាភិបាល។
ប្រទេសថៃបានជួបប្រទះរដ្ឋប្រហារឬការប៉ុនប៉ងធ្វើរដ្ឋប្រហារដោយសរុបចំនួន១៨លើកចាប់ពីឆ្នាំ១៩៣២មករួមទាំងរដ្ឋប្រហារចុងក្រោយនៅឆ្នាំ២០០៦ទម្លាក់លោកនាយករដ្ឋមន្ត្រីថាក់ស៊ីនដែលសព្វថ្ងៃរស់នៅនិរទេសខ្លួននៅឯបរទេស។
លោកអភិស៊ីទទទួលស្គាល់ថា សង្គមថៃនៅពុំទាន់បានធូរស្រាលទាំងស្រុងនៅឡើយទេពីវិបត្តិនេះ ប៉ុន្តែគាត់បានបដិសេធថា ខ្លួនគាត់ផ្ទាល់ពុំត្រូវបានគំរាមដោយរដ្ឋប្រហារណាមួយដូចដែលមធ្យោបាយឃោសនាមហាជនថៃបានផ្សព្វផ្សាយនោះទេ ពីព្រោះគ្រប់តែភាគីបានប្តេជ្ញាចិត្តចៀសវាងកុំឲ្យកើតមានរដ្ឋប្រហារថ្មីណាមួយទៀត។
“ពួកអាវក្រហម”បានប្រកែកតវ៉ាថា លោកអភិស៊ីទជានាយករដ្ឋមន្ត្រីពុំត្រឹមត្រូវតាមច្បាប់ទេចាប់ពីចុងឆ្នាំ២០០៨មកនិងទាមទារការបោះឆ្នោតមុនកំណត់កាល។ ពួកគេបានធ្វើឲ្យគាំងស្ទះទីក្រុងបាងកករយៈពេលពីរខែ បានធ្វើឲ្យប្រទេសជាតិផុងលុងខ្លួនក្នុងវិបត្តិដ៏ធ្ងន់ធ្ងរបំផុតតាំងពីជិត២០ឆ្នាំមក។
គណបក្សជំទាស់បានអំពាវនាវដោយឥតប្រយោជន៍ជាច្រើនលើកច្រើនដងសូមឲ្យព្រះរាជាBhumibol ព្រះជន្ម៨២វស្សាធ្វើអន្តរាគមន៍ដូចដែលព្រះអង្គបានធ្វើនៅឆ្នាំ១៩៩២ ដោយបានត្រាស់បង្គាប់ឲ្យភាគីនានានៃវិបត្តិឈប់ប្រយុទ្ធគ្នា ប៉ុន្តែនៅលើកនេះព្រះអង្គពុំបានធ្វើអន្តរាគមន៍អ្វីសោះ។
គោលជំហររបស់រដ្ឋាភិបាលគឺសុំឲ្យព្រះរាជាសណ្ឋិតនៅពីលើគណបក្សនយោបាយនានា។ “ខ្ញុំអាចនិយាយដោយរបៀបដាច់ខាតថា គ្រប់តែសេចក្តីសម្រេចចិត្តត្រូវបានធ្វើដោយរដ្ឋាភិបាលនៅពេលកំពុងមានបាតុកម្ម។ ព្រះបរមរាជវាំងពុំបានធ្វើអន្តរាគមន៍ទេនៅក្នុងបញ្ហានេះ។ ស្ថាប័នដើរតួនាទីដូចគ្នានឹងរបបរាជានិយមដទៃទៀតដែលអាស្រ័យនឹងរដ្ឋធម្មនុញ្ញ” នេះជាប្រសាសន៍របស់លោកនាយករដ្ឋមន្ត្រីថៃអភិស៊ីទថ្លែងក្នុង បទសម្ភាសន៍មួយផ្តល់ឲ្យទីភ្នាក់ងារពត៌មានបារាំងAFPនៅថ្ងៃព្រហស្បតិ៍ទី៨កក្កដានេះនៅទីក្រុងបាងកក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ