កូនពៅរបស់Kim Jong-Il ជាអ្នកដែលនឹងត្រូវស្នងតំណែងពីគាត់
ចុះផ្សាយនៅថ្ងៃ៖
ស្តាប់ - ០៣:០៥
រដ្ឋសភាជាតិកូរ៉េខាងជើងដែលបានរួមប្រជុំគ្នាជា វិសាមញ្ញកាលពីថ្ងៃចន្ទទី៧មិថុនា ដើមសប្តាហ៍នេះ បានបោះឆ្នោតទទួលយកការផ្លាស់ប្តូរនាយករដ្ឋមន្ត្រីនិងរដ្ឋមន្ត្រី ផ្សេងៗទៀតមួយចំនួន។ ក៏ប៉ុន្តែ អ្វីដែលសំខាន់ជាងគេ គឺការតែងតាំងប្អូនថ្លៃរបស់Kim Jong-Il ជាអនុប្រធាននៃគណៈកម្មការការពារជាតិ។ ពីព្រោះការតែងតាំងនេះ ស្តែងឲ្យឃើញកាន់តែច្បាស់ថា របបកុម្មុយនិស្តបន្តពូជនៅកូរ៉េខាងជើង បានរៀបចំរួចស្រេចហើយ ការស្នងតំណែងពីអគ្គមគ្គទេសក៍Kim Jong-Il ដែលកំពុងមានជម្ងឺប្រចាំកាយ។
នៅថ្ងៃចន្ទដើមសប្តាហ៍នេះ ទីភ្នាក់ងារព័ត៌មានផ្លូវការរបស់កូរ៉េខាងជើង បានជូនដំណឹងយ៉ាងខ្លីថា អ្នកតំណាងរាស្រ្តបានលើកឡើងអំពីការផ្លាស់ប្តូរនាយករដ្ឋមន្ត្រីនិងអំពីការចាត់តាំងផ្សេងៗ។ យ៉ាងណាមិញ កិច្ចប្រជុំវិសាមញ្ញនៃរដ្ឋសភាជាតិកាលពីម្សិលម្ង៉ៃ នៅទីក្រុងPyongyang ជាព្រឹត្តិការណ៍មួយសំខាន់ណាស់ ពីព្រោះអ្នកតំណាងរាស្រ្តបានឲ្យសច្ចាប័នទៅលើគម្រោងការស្នងតំណែង ដែលKim Jong-Il បានតុបតែងឡើង ជាច្រើនខែកន្លងមកហើយ។
នៅក្នុងចំណោមការចាត់តាំងផ្សេងៗ គេចាប់អារម្មណ៍ខ្លាំងជាងគេ ទៅលើការតែងតាំងប្អូនថ្លៃរបស់Kim Jong-Il គឺJang Song-Thaek ជាអនុប្រធាននៃគណៈកម្មការការពារជាតិដែលក្តាប់កងទ័ព បានន័យថាជាបុរសខ្លាំងទីពីរនៃកូរ៉េខាងជើង។ គួរបញ្ជាក់ថា នៅក្នុងរបបកុម្មុយនិស្ត ពិសេសរបបកុម្មុយនិស្តPyongyang អ្នកមានអំណាចធំជាងគេគឺមិនមែននាយករដ្ឋមន្រ្តីទេ។ អ្នកមានអំណាចធំជាងគេ គឺប្រធានគណៈកម្មការការពារជាតិនេះតែម្តង តំណែងដែលសព្វថ្ងៃកាន់កាប់ដោយKim Jong-Il ផ្ទាល់។
ការដែលKim Jong-Il សម្រេចតែងតាំងJang Song-Thaekដែលជាប្អូនថ្លៃឲ្យធ្វើជាអនុប្រធាននៃគណៈកម្មការដ៏មានមហិទ្ធិឫទ្ធិនេះ ស្តែងឲ្យឃើញថា Kim Jong-Il បានជ្រើសរើសកូនប្រុសទីបីKim Jong-Un ឲ្យឡើងមកដឹកនាំប្រទេសកូរ៉េខាងជើង នាពេលខាងមុខ។ ពីព្រោះJang Song-Thaek ជាអ្នកណែនាំប្រៀនប្រដៅកូនទីបីនេះរបស់Kim Jong-Il ដូចឱពុកធម៌អ៊ីចឹង។ ចំពោះក្រុមអ្នកសង្កេតការណ៍ នៅពេលណាដែលKim Jong-Il លាលែងពីតំណែង ឬស្លាប់ នៅពេលនោះកូនប្រុសKim Jong-Un នឹងក្លាយជាស្វ័យប្រវត្តិ ទៅជាប្រធានគណៈកម្មការការពារជាតិ ពោលគឺជាបុរសខ្លាំងនៃប្រទេសកូរ៉េខាងជើង។
ក្រុមអ្នកសង្កេតការណ៍ដដែល បានទាំងអះអាងទៀតផងថា ការតែងតាំងKim Jong-Un ជាអគ្គមគ្គទេសក៍ថ្មីអាចនឹងប្រព្រឹត្តទៅយ៉ាងយូរនៅឆ្នាំ២០១២។ មូលហេតុគឺមកពីKim Jong-Il មានជម្ងឺប្រចាំកាយ ហើយចង់រៀបចំការស្នងតំណែងឲ្យបានឆាប់រហ័ស ដើម្បីចៀសវាងសង្គ្រាមដណ្តើមអំណាចគ្នា ក្រោយមរណភាពរបស់លោក។
គ្មានអ្នកណាដឹងប្រវត្តិរបស់Kim-Jong-Un កូនប្រុសទីបីនេះរបស់Kim Jong-Il ច្បាស់ទេ។ គេគ្រាន់តែដឹងថា បុរសអាយុ២៧ឆ្នាំរូបនេះ ជាកូនសំណព្វ បានរៀនសូត្រនៅប្រទេសស្វីស(Suisse) ចេះភាសាអង់គ្លេស បារាំង និងអាល្លឺម៉ង់។ គេដឹងទៀតថា កាលពីឆ្នាំទៅមិញ Kim Jong-Unត្រូវបានតែងតាំងជាប្រធាននៃប៉ូលិសសម្ងាត់ដែលធ្វើចារកិច្ច នៅក្នុងប្រទេសផង និងនៅបរទេសផង។
យ៉ាងណាក៏ដោយ យោងទៅតាមក្រុមអ្នកសង្កេតការណ៍ Kim Jong-Il គិតគូរតែពីរឿងស្នងតំណែង នារយៈពេលជាងមួយឆ្នាំចុងក្រោយនេះ។ ក្រុមអ្នកសង្កេតការណ៍ដដែលថែមទាំងអះអាងថា Kim Jong-Il បាននិងកំពុងបន្តបង្កដោយចេតនាឲ្យមានភាពតានតឹងរវាងកូរ៉េខាងជើង និងពិភពលោក ក្នុងគោលដៅពង្រឹងអំណាចរបស់ខ្លួននៅក្នុងជួរកងទ័ព និង បង្កើតបរិយាកាសតានតឹងនៅក្នុងជួរថ្នាក់ដឹកនាំ ដើម្បីឲ្យកូនប្រុសKim Jong-Un អាចស្នងតំណែងពីខ្លួនបាននៅទីបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ