សមយុទ្ធនាវាអាមេរិកាំង និងកូរ៉េខាងត្បូង
នាវាចម្បាំងអាមេរិកាំងចំនួនដប់គ្រឿង រួមមាននាវាផ្ទុកយន្តហោះមួយគ្រឿងផង នៅសប្តាហ៍ក្រោយ ព្រមជាមួយកងនាវាចម្បាំងកូរ៉េខាងត្បូង នឹងចូលរួមសមយុទ្ធប្រឆាំងនឹងនាវាមុជទឹក នៅពេលកំពុងមានភាពតានតឹងខ្លាំងជាមួយកូរ៉េខាងជើង បន្ទាប់ពីនាវាមុជទឹកកូរ៉េខាងជើងបានបាញ់កំទេចនាវាកូរ៉េខាងត្បូង មួយគ្រឿងមក។
ចុះផ្សាយនៅថ្ងៃ៖
សេចក្តីរាយការណ៍របស់វីនស្តុន រតនា
ស្របតាមទីភ្នាក់ងារព័ត៌មានកូរ៉េខាងត្បូង Yonhap ឱ្យដឹងនៅថ្ងៃពុធ២មិថុនានេះ នាវាផ្ទុកយន្តហោះ USS George Washington នៅថ្ងៃសៅរ៍ខាងមុខនេះ នឹងបើកចេញពីមូលដ្ឋានខ្លួន នៅកំពង់ផែជប៉ុន Yoko suka ដើម្បីទៅដល់សមុទ្រលឿង នៅដើមសប្តាហ៍ក្រោយ។
សមយុទ្ធរួមគ្នានេះ នៅដើមឡើយ ត្រូវបានគ្រោងធ្វើនៅដំណាច់ខែមិថុនា ឬដើមខែកក្កដាខាងមុខនេះ ប៉ុន្តែបែរជាធ្វើមុនពេលមួយខែទៅវិញ ដើម្បី “ឱ្យសញ្ញាខ្លាំងមួយ “ ព្រមានទៅកូរ៉េខាងជើង”។
កូរ៉េខាងត្បូង នៅដើមសប្តាហ៍នេះ បានធ្វើសមយុទ្ធ ដោយមានការចូលរួមរបស់ទាហានកូរ៉េខាងត្បូងរាប់ជាច្រើនពាន់នាក់គាំទ្រដោយឩទ្ធម្ភាគចក្រចម្បាំងជាច្រើនគ្រឿង។
ស្របតាមកងទ័ពកូរ៉េខាងត្បូង ការសំញែងកម្លាំងឫទ្ធិយោធាជាថ្មីនេះធ្វើត្រាប់តាមការវាយប្រហាររបស់កូរ៉េខាងជើង បានប្រព្រឹត្តទៅតាមបណ្តោយស្ទឹងមួយ នៅឃុំខាងជើងតំបន់Hwacheonដែលស្ថិតនៅប៉ែកខាងត្បូងជាប់ព្រំដែនកូរ៉េខាងជើង។
គឺជាសមយុទ្ធលើកទីមួយ បន្ទាប់ពីរបបព្យុងយ៉ាងបានបាញ់កំទេចនាវាចម្បាំងកូរ៉េខាងត្បូងមួយគ្រឿង កាលពីថ្ងៃ២៦មីនាមក។
ស្របតាមសេចក្តីសន្និដ្ឋាននៃការធ្វើអង្កេតជាអន្តរជាតិមួយ ការលិចនាវាចម្បាំង Cheonanចំណុះ១២០០តោន បណ្តាលមកពីការបាញ់គ្រាប់បែកបុកចេញពីនាវាមុជទឹកកូរ៉េខាងជើងមួយគ្រឿងដែលបានបណ្តាលឱ្យស្លាប់ទាហានជើងទឹកកូរ៉េខាងត្បូង៤៦នាក់។
ព្យុងយ៉ាងបានបដិសេធទាត់ចោលរាល់ការទទួលខុសត្រូវចំពោះឩប្បត្តិហេតុដ៏ធ្ងន់ធ្ងរបំផុតមួយនេះ ចាប់តាំងពីមានការចុះយុទ្ធសន្តិភាពបញ្ចប់សង្គ្រាមកូរ៉េ នៅឆ្នាំ១៩៥៣មក។
កូរ៉េខាងត្បូងបានប្រកាសវិធានការសងសឹកតប-តទៅកូរ៉េខាងជើងដែលបានសន្យាថានឹងវាយបកមកកូរ៉េខាងត្បូងវិញ ដោយប្រកាសធ្វើ “សង្គ្រាមជាទូទៅ “ក្នុងករណីមានទ័ណ្ឌកម្មថ្មីៗដាក់មកលើខ្លួន”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ