ក្រុមអាវក្រហមចូលលុកលុយក្នុងមន្ទីរពេទ្យ
មន្ទីរពេទ្យ ដ៏ធំមួយក្នុងក្រុងបាងកកបានជំលៀសអ្នកជំងឺ នៅថ្ងៃសុក្រនេះ ក្រោយពីក្រុមអាវក្រហមបានចូលលុកលុយមួយភ្លែត កាលពីយប់ថ្ងៃព្រហស្បតិ៍ម្សិលមិញ។ មន្ទីរពេទ្យជូឡា ឡុងកនបានសម្រេចបិទសេវាមិនទទួលពិនិត្យជំងឺថ្មី លើកលែងជំងឺដែលត្រូវការជួយសង្រ្គោះបន្ទាន់។ ភ្លាមៗ រដ្ឋាភិបាលសម្រេចបញ្ជូនទ័ពមកឈរចាំយាមមន្ទីរពេទ្យ ចំណែកមេដឹកនាំក្រុមអាវក្រហមបានថ្កោលទោសចំពោះសកម្មភាពរបស់ក្រុម ខ្លួន។
ចុះផ្សាយនៅថ្ងៃ៖
សេចក្តីរាយការណ៍របស់ឈាង បុប្ផា
លោកWeng Tojirakarn មេដឹកនាំម្នាក់ក្នុងចំណោមមេដឹកនាំសំខាន់ៗរបស់ក្រុមអាវក្រហម បានធ្វើការសុំទោសជាសាធារណៈដល់អ្នកជំងឺ និងក្រុមគ្រូពេទ្យ។ មេដឹកនាំបក្សប្រឆាំងរូបនេះ បានចាត់ទុកការចូលលុកលុយរបស់ក្រុមរបស់ខ្លួន ក្នុងមន្ទីរពេទ្យកាលពីល្ងាចម្សិលមិញ គឺជារឿងមិនថ្លៃថ្នូរ និងមិនអាចទទួលយកបាន។
សកម្មភាពបញ្ច្រាសទិសគ្នារវាងមេដឹកនាំក្រុមអាវក្រហម ចំពោះការចូលលុកលុយក្នុងមន្ទីរពេទ្យអាចធ្វើឲ្យគេចោទជាសំណួរស្តីពីសមត្ថភាពគ្រប់គ្រងរបស់មេដឹកនាំបក្សប្រឆាំងទៅលើផែនការសកម្មភាពរបស់សមាជិកក្រុមគាំទ្ររបស់ខ្លួន។
កាលពី ល្ងាចម្សិលមិញ ក្រុមអាវក្រហមជិត ១០០នាក់ដែលស្ថិតក្រោមការដឹកនាំរបស់មេដឹកនាំប្រឆាំងម្នាក់ទៀត បានដើរចូលក្នុងមន្ទីរពេទ្យសំដៅរកក្រុមទាហានដែលពួកគេគិតថា កំពុងលាក់ខ្លួនក្នុងមន្ទីរពេទ្យដើម្បីត្រៀមវាយប្រហារមកលើពួកគេ។ វត្តមានមិនព្រាងទុករបស់ក្រុមអាវក្រហមបានធ្វើឲ្យមន្ទីរពេទ្យ នៅ ថ្ងៃ សុក្រទី ៣០មេសានេះ ចាប់ជម្លៀសអ្នកជំងឺរបស់ខ្លួនទៅកាន់មន្ទីរពេទ្យផ្សេងទៀត និងផ្អាកមិនទទួលអ្នកជំងឺថ្មីលើកលែងករណីសង្គ្រោះបន្ទាន់។
មន្ទីរពេទ្យជូឡា ឡុងកនដែលជាមន្ទីរពេទ្យសំខាន់មួយក្នុងក្រុងបាងកក ស្ថិតនៅចំកណ្តាលសង្កាត់ដែលក្រុមអាវក្រហម កំពុងធ្វើការតវ៉ា ទប់ទល់នឹងទាហានរដ្ឋាភិបាល។ ក្នុងកំឡុងពេលផ្ទុះហិង្សាកាលពីថ្ងៃទី ១០មេសាដែលបានបណ្តាលឲ្យមានមនុស្សស្លាប់២៥នាក់ ទាហានបានប្រើប្រាស់ទីតាំងមួយផ្នែករបស់មន្ទីរពេទ្យដើម្បីធ្វើការវាយបង្ក្រាបទៅលើក្រុមអាវក្រហម។
នៅព្រឹកថ្ងៃនេះ ទាហានជាង១០០នាក់ត្រូវបានបញ្ជូនទៅគ្រប់គ្រងស្ថានការណ៍នៅមន្ទីរពេទ្យ។ វិធានការដែលថ្នាក់គ្រប់គ្រងមន្ទីរពេទ្យមិនទទួលយក ដោយមូលហេតុថា មន្ទីរពេទ្យជាកន្លែងអព្យាក្រិត ទទួលព្យាបាលតែជំងឺ និងមិនចង់ឲ្យគេយកមន្ទីរពេទ្យធ្វើជាកន្លែងបង្ហូរឈាមរវាងក្រុមអាវក្រហម និងទាហានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ