កូរ៉េខាងត្បូង៖ លោកស្រីប៉ាក់ គុនហេ រាសីដាក់ ដោយសារគ្រូអាគមខ្លួនឯង
ចុះផ្សាយនៅថ្ងៃ៖
ស្តាប់ - ០៧:១២
នរណាដែលអាចជឿបានថា ប្រទេសជឿនលឿនដូចជាកូរ៉េខាងត្បូង បែរជាមានប្រធានាធិបតី ជាប់រឿងអាស្រូវ ដែលពាក់ព័ន្ធទៅនឹងអំពើមន្តអាគម ទៅវិញ? អបិយជំនឿ មាននៅគ្រប់ទីកន្លែង មិនថាប្រទេសក្រីក្រ រឺជឿនលឿន។ តែរឿងអាស្រូវរបស់លោកស្រីប្រធានាធិបតីកូរ៉េខាងត្បូង ប៉ាក់ គុនហេ មានកម្រិតលើសពីអបិយជំនឿផ្ទាល់ខ្លួនធម្មតា ព្រោះវាបានបង្កើតឲ្យមានអំពើពុករលួយ ការប្រើប្រាស់ឥទ្ធិពលដើម្បីទាញយកប្រយោជន៍ផ្ទាល់ខ្លួន ព្រមទាំងការចូលជ្រៀតជ្រែកក្នុងកិច្ចការសម្ងាត់រដ្ឋ ពីសំណាក់ស្រ្តីឈ្មោះ ឆយ ស៊ុនស៊ីល ដែលគេជឿថា ជាស្ត្រីចេះធ្វើស្នេហ៍សង្កត់ស្មារតីលោកស្រីប៉ាក់ គុនហេ។
៤ខែមកហើយ ដែលឈ្មោះ ឆយ ស៊ុនស៊ីល បានល្បីសាយសុះ ទូទាំងកូរ៉េខាងត្បូង។ ឆយ ស៊ុនស៊ីល ភេទស្រី អាយុ៦០ឆ្នាំ ត្រូវបានគេស្គាល់ថាជាមិត្តចិត្តមួយថ្លើមមួយ ជាមួយនឹងលោកស្រីប៉ាក់ គុនហេ ប្រធានាធិបតីកូរ៉េខាងត្បូង អស់រយៈពេល៤០ឆ្នាំមកហើយ។ មិនមែនជាមិត្តធម្មតាទេ តែជាមិត្តភាពដែលគេឯងចោទថា ស្ថិតក្រោមអំពើមន្តអាគមគ្របសង្កត់ស្មារតី។ គ្រប់ជំហាន គ្រប់ការសម្រេចចិត្ត របស់លោកស្រីប៉ាក់ គុនហេ គឺមិនអាចធ្វើបានទេ បើសិនគ្មានការផ្តល់យោបល់ រឺសម្រេចយល់ព្រមពីមនុស្សស្រីឈ្មោះ ឆយ ស៊ុនស៊ីលនេះ។
ឆយ ស៊ុនស៊ីល កូនស្រីឆយ តែមីន គ្រូសន្ថិតដ៏ល្បីនៅកូរ៉េខាងត្បូង៖
បើរៀបរាប់រំលឹកឡើងវិញ លោកស្រី ប៉ាក់ គុនហេ ប្រធានាធិបតីកូរ៉េខាងត្បូង បានមានចំណងស្អិតរមួត ជាមួយនឹងអបិយជំនឿគ្រូសន្ថិតនេះ តាំងតែពីឆ្នាំ១៩៧៤ នៅពេលដែលម្តាយលោកស្រី ត្រូវបានគេលបធ្វើឃាត។ កាលជំនាន់នោះ ឪពុកលោកស្រីប៉ាក់ គុនហេ ឈ្មោះ ប៉ាក់ ឈុងហ៊ី គឺជាប្រធានាធិបតីកូរ៉េខាងត្បូង។
បុរសម្នាក់ឈ្មោះ ឆយ តែមីន ដែលកាលជំនាន់នោះ ល្បីទូទាំងកូរ៉េខាងត្បូងថាជាមនុស្សចេះមន្តអាគម ជាគ្រូសន្ថិតវិញ្ញាណ ទើបបានប្រកាសបើកនិកាយសាសនាមួយបែប ដាក់ឈ្មោះថា”ព្រះវិហារជីវិតអមតៈ”។ គ្រូមន្តអាគមដ៏ល្បីនេះ បានអះអាងថាព្រលឹងរបស់ម្តាយលោកស្រីប៉ាក់ គុនហេ ដែលត្រូវគេសម្លាប់នោះ បានចូលមកសន្ថិតនឹងខ្លួនគាត់ ដើម្បីឲ្យគាត់ការពារលោកស្រីប៉ាក់ គុនហេ។ ការនេះ បានញ៉ាំង ឲ្យលោកស្រីប៉ាក់ គុនហេ មានទំនាក់ទំនងយ៉ាងស្និតជាមួយនិងគ្រូមន្តអាគម នេះ។ យោងតាមរបាយការណ៍សម្ងាត់ របស់ស្ថានទូតអាមេរិក ប្រចាំការនៅសេអ៊ូល ហើយដែលបានធ្វើឲ្យបែកធ្លាយដោយ គេហទំព័រ Wikileaks បានឲ្យដឹងថា កាលជំនាន់នោះ លោកស្រីប៉ាក់ គុនហេ ស្ថិតក្រោមការគ្រប់គ្រងវិញ្ញាណស្មារតីទាំងស្រុង ពីសំណាក់ គ្រូមន្តអាគម ឈ្មោះឆយ តែមីននេះ។
គឺគ្រូឈ្មោះ ឆយ តែមីននេះហើយ ដែលជាឪពុករបស់ស្រ្តីឈ្មោះ ឆយ ស៊ុនស៊ីល។ ឆយ តែមីន បានណែនាំកូនស្រីខ្លួន ឲ្យស្គាល់លោកស្រីប៉ាក់ គុនហេ ហើយបានផ្តែរផ្តាំថា គឺ ឆយ ស៊ុនស៊ីល នឹងក្លាយជាអ្នកស្នងតំណែងគ្រូអាគមការពារលោកស្រី ប៉ាក់ គុនហេ បន្ទាប់ពីខ្លួន។ ឆយ តែមីន បានស្លាប់នៅឆ្នាំ១៩៩៤ ហើយចាប់ពីពេលនោះមក ស្ត្រីឈ្មោះ ឆយ ស៊ុនស៊ីល បានស្នងតំណែងជាប្រមុខដឹកនាំព្រះវិហារជីវិតអមតៈ ហើយបានក្លាយជាមនុស្សមានឥទ្ធិពលមិនអាចប្រកែកបាន ទៅលើលោកស្រី ប៉ាក់ គុនហេ។
ឆយ ស៊ុនស៊ីល ជាអ្នកសម្រេចកិច្ចការរដ្ឋទាំងអស់ពីក្រោយខ្នង៖
តាមការស្រាវជ្រាវ ក្រោមការជួយជ្រោមជ្រែងពីសំណាក់ស្ត្រីឈ្មោះឆយ ស៊ុនស៊ីល លោកស្រីប៉ាក់ គុនហេ បានជាប់ឆ្នោតជាលើកទីមួយ ក្លាយជាតំណាងរាស្ត្រ នៅឆ្នាំ១៩៩៧។ ជីវិតនយោបាយរបស់លោកស្រីប៉ាក់ គុនហេ តែងតែបានទទួលការផ្តល់ប្រឹក្សា ដោយសំងាត់ ពីសំណាក់ស្រ្តីម្នាក់នេះ។ យ៉ាងណាមិញ នៅឆ្នាំ២០០៧ ប្តីរបស់ស្រ្តីឆយ ស៊ុនស៊ីលនេះ បានក្លាយជាអ្នកដឹកនាំការឃោសនាបោះឆ្នោតប្រធានាធិបតី ឲ្យលោកស្រីប៉ាក់ គុនហេទៀតផង។ ទីបំផុត លោកស្រីប៉ាក់ គុនហេ បានក្លាយជាប្រធានាធិបតីនៅឆ្នាំ២០១៣។
ក្លាយជាប្រធានាធិបតី លោកស្រីប៉ាក់ គុនហេ បានបន្តស្ថិតនៅក្រោមឥទ្ធិពលរបស់ស្ត្រីឆយ ស៊ុនស៊ីល។ ការសែតកូរ៉េបានចុះផ្សាយថា ជារៀងរាល់ថ្ងៃ សំណុំឯកសារសម្ងាត់រដ្ឋនានា តែងតែត្រូវបញ្ជូនទៅឲ្យ ឈ្មោះឆយ ស៊ុនស៊ីល ដើម្បីឲ្យស្ត្រីនេះពិនិត្យ ហើយបន្ទាប់មកទើបប្រាប់ឲ្យលោកស្រីប្រធានាធិបតី ត្រូវសម្រេចយ៉ាងណា។ មិនត្រឹមតែប៉ុណ្ណោះ ភស្តុតាងដែលរឹបអូសបាននៅក្នុងTablette របស់ឈ្មោះ ឆយ ស៊ុនស៊ីល បានបង្ហាញទៀតថា គឺឈ្មោះឆយ ស៊ុនស៊ីលនេះ ជាអ្នកកែសម្រួលសន្ទរៈថារាល់លើករបស់លោកស្រីប៉ាក់ គុនហេ។
ជារួម រាល់កិច្ចការសម្រេចចិត្តធំៗ របស់លោកស្រីប៉ាក់ គុនហេ គឺជាយោបល់របស់ឈ្មោះ ឆយ ស៊ុនស៊ីលនេះទាំងអស់ ទាំងដែលស្ត្រីរូបនេះ គ្មានមុខតំណែងអ្វីសោះ។ ប្រជាជនចោទសួរថា តើកន្លងមក នរណាជាប្រធានាធិបតីរបស់ពួកគេ ប៉ាក់ គុនហេ រឺមួយ ឆយ ស៊ុនស៊ីល? យ៉ាងណាមិញ តាមការចុះផ្សាយរបស់កាសែតក្នុងស្រុកកូរ៉េ ការបញ្ជាឲ្យបិទតំបន់សេដ្ឋកិច្ចពិសេស Kaesong ដែលស្ថិតនៅក្នុងដីកូរ៉េខាងជើង កាលពីខែកុម្ភៈកន្លងទៅ គឺជាគំនិតរបស់ឈ្មោះឆយ ស៊ុនស៊ីល។ ស្រ្តីនេះ បានទាយថា របបកូរ៉េខាងជើង នឹងរលំនៅឆ្នាំ២០១៧ ដូច្នេះត្រូវតែធ្វើបាបកូរ៉េខាងជើង តាមរយៈការបិទតំបន់សេដ្ឋកិច្ចពិសេសនេះ។ សូមបញ្ជាក់ថាតំបន់សេដ្ឋកិច្ចពិសេសនេះ គឺជាគំរោងតែមួយគត់ ដែលមានបំណងផ្សារភ្ជាប់បងប្អូនកូរ៉េទាំងពីរ តែត្រូវបានរលាយទៅវិញនាពេលនោះ។
មិនត្រឹមតែប៉ុណ្ណោះ សារព័ត៌មានកូរ៉េបានផ្សាយថា ឆយ ស៊ុនស៊ីល គឺជាអ្នកផ្តើមគំនិត ក្នុងការរុះរើមនុស្សធ្វើការនៅក្នុងវិមានប្រធានាធិបតីទៀតផង។ បុគ្គលិកណា ដែលចេះដឹងច្រើន ឆ្ងល់ច្រើន ត្រូវបានដកចោល ហើយតែងតាំងជំនួស ដោយមនុស្សជំនិតរបស់ឆយ ស៊ុនស៊ីល និងបក្សពួក។ ករណីតែងតាំងរដ្ឋមន្ត្រីជាច្រើនរូប ក៏ត្រូវបានគេសង្ស័យថា ជាគំនិតរបស់ឆយ ស៊ុនស៊ីលដែរ។ យ៉ាងណាមិញ កាលពីថ្ងៃចន្ទ ទី១៤ វិច្ឆិកា រដ្ឋអាជ្ញាក្រុងសេអ៊ូល ទើបបានសួរចម្លើយបុគ្គលិកខុទ្ទការល័យប្រធានាធិបតី២នាក់ ដែលជាប់ចោទថាបានជួយសម្រួល ការប្រើឥទ្ធិពលរបស់ឆយ ស៊ុនស៊ីល មកលើវិមានប្រធានាធិបតី។
យកឈ្មោះប្រធានាធិបតី ដើរទារលុយ និងប្រើអំណាច៖
បន្តិចម្តងៗ ឆយ ស៊ុនស៊ីល ចាប់ផ្តើមចេញមុខ យកឈ្មោះលោកស្រីប្រធានាធិបតីទៅប្រើ ដើម្បីប្រមូលប្រាក់វិភាគទាន ដាក់ក្នុងមូលនិធិមួយ ដែលខ្លួនបង្កើត។ ប្រាក់ប្រមាណជាង៦០លានដុល្លារ ត្រូវបានឆយ ស៊ុនស៊ីល ប្រមូលយកដាក់ហោប៉ៅ ពីក្រុមហ៊ុនធំៗរបស់កូរ៉េ ដូចជាក្រុមហ៊ុម Samsung Hyundai និង Hanwha ជាដើម។ ចំណែកលោកស្រីប៉ាក់ គុនហេ ត្រូវបានគេសង្ស័យថា បានជំរុញប្រធានក្រុមហ៊ុនទាំងនោះ ឲ្យនាំគ្នាផ្តល់វិភាគទានទៅឲ្យមូលនិធិក្លែងក្លាយនេះ។
ឆយ ស៊ុនស៊ីល ក៏ត្រូវបានគេតាមដានដឹងទៀតថា តែងតែទៅបនបេស្យាបុរស ដែលមានសេវាបំរើការសប្បាយរបស់ស្ត្រីវ័យចំណាយ នៅសង្កាត់Gangnam ក្នុងក្រុងសេអ៊ូល។ គឺទីនោះហើយ ដែលឆយ ស៊ុនស៊ីល បានស្គាល់បុរសវ័យក្មេងម្នាក់ ហើយបានជួយជ្រោមជ្រែក ឲ្យបង្កើតម៉ាកយីហោកាបូបស្ពាយមួយដ៏ល្បី នៅឆ្នាំ២០១៣ ដោយលោកស្រីប៉ាក់ គុនហេផ្ទាល់ ជាអ្នកជួយផ្សាយពាណិជ្ជកម្មឲ្យទៀតផង។
ឆយ ស៊ុនស៊ីល ក៏បានយកឈ្មោះលោកស្រីប្រធានាធិបតី ទៅប្រើដើម្បីឲ្យកូនស្រីខ្លួន បានចូលរៀននៅសកលវិទ្យាល័យនារីដ៏ល្បីរបស់កូរ៉េឈ្មោះEwha។ កូនស្រីឆយ ស៊ុនស៊ីល បានទទួលសញ្ញាប័ត្រពិន្ទុល្អប្រសើរ ទាំងដែលគេមិនដែលឃើញមុខទៅរៀនសូម្បីតែម្តង។ ឆយ ស៊ុនស៊ីល ក៏បានទៅចាប់បង្ខំក្រុមហ៊ុន Samsung ឲ្យបង់ប្រាក់ជិត៣លានដុល្លារ ដើម្បីឧបត្ថម្ភការហ្វិកហាត់កីឡាលោតសិះរបស់កូនស្រីខ្លួន នៅប្រទេសអាល្លឺម៉ង់ ព្រោះឆយ ស៊ុនស៊ីល ស្រម័យចង់ឲ្យកូនខ្លួន បានមេដាយមាសកីឡាអូឡាំពិក។
បដាតវ៉ា៖ “ប៉ាក់ គុនហេ ចុះចេញពីតំណែង!”
ការលូកដៃចូលជ្រៀតជ្រែកក្នុងកិច្ចការរដ្ឋ ការប្រើឥទ្ធិពលដើម្បីយកប្រយោជន៍ផ្ទាល់ខ្លួន ការប្រព្រឹត្តិអំពើពុករលួយ ទាំងអស់នេះ ត្រូវបានស្ត្រីឈ្មោះ ឆយ ស៊ុនស៊ីល បដិសេធទាំងស្រុង។ ក្រុមស៊ើបអង្កេត របស់រដ្ឋអាជ្ញាក្រុងសេអ៊ូល បានសាកសួរចម្លើយ អ្នកតំណាងក្រុមហ៊ុនធំៗនាៗ ដែលជាប់ពាក់ព័ន្ធ ថែមទាំងបានចុះទៅរឹបអូសវត្ថុតាង នៅការិយាល័យរបស់ក្រុមហ៊ុន Samsung ទៀតផង។
លោកស្រីប៉ាក់ គុនហេ កំពុងសំងំលាក់ខ្លួន គេចចេញពីរឿងអាស្រូវដ៏អសោចនេះ។ លោកស្រីបានសុំទោសជាសារធារណៈពីរដងមកហើយ ថាលោកស្រីមានការធ្វេសប្រហែស តែលោកស្រីមិនបានសារភាពទទួលស្គាល់ទេថា លោកស្រីត្រូវស្នេហ៍សណ្តំរបស់ឆយ ស៊ុនស៊ីល។ លោកស្រីប៉ាក់ គុនហេបានព្យាយាមគ្រប់វិធីដើម្បីរំងាប់កំហឹងរបស់ប្រជាជនកូរ៉េ តាមរយៈការរុះរើគណរដ្ឋមន្ត្រី ការសន្យាបែងចែកអំណាច ទៅឲ្យនាយករដ្ឋមន្ត្រីមកពីគណបក្សប្រឆាំងជាដើម។
ជាការប្រឹងប្រែងដែលគ្មានលទ្ធផល ព្រោះកាលពីថ្ងៃសៅរ៍ទី១២ វិច្ឆិកា មនុស្សជិត១លាននាក់ បានធ្វើបាតុកម្មទាមទារឲ្យលោកស្រីចុះចេញពីតំណែងជាបន្ទាន់។ តើលោកស្រីប៉ាក់ គុនហេ អាចសំងំបានដល់ពេលណាទៀត? ក្នុងពេលដ៏ឆាប់ខាងមុខ រដ្ឋអាជ្ញានឹងកោះហៅលោកស្រីទៅសាកសួរ។ រដ្ឋសភា និងគណបក្សប្រឆាំងទាំងពីរ បានស្រុះស្រួលគ្នា បង្កើតក្រុមស៊ើបអង្កេតឯករាជ្យមួយទៀត ដើម្បីរកការពិត ប្រកបដោយតម្លាភាព។ រាសីនយោបាយលោកស្រីប៉ាក់ គុនហេ កំពុងជួបគ្រោះថ្នាក់ ហើយពីថ្ងៃនេះទៅ ទោះគ្រូមន្តអាគមគាថាមកពីឋានណា ក៏ប្រហែលជាមិនអាចជួយរំដោះគ្រោះលោកស្រីបានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ