បណ្តាប្រទេសអាស៊ីនៅតែចង់អភិវឌ្ឍអគ្គិសនីនុយក្លេអ៊ែរ
នៅពេលមួយដែលប្រទេសជប៉ុនអាចនឹងធ្លាក់ខ្លួនទៅក្នុងគ្រោះមហន្តរាយនុយក្លេអ៊ែរ រដ្ឋាភិបាលអាស៊ីដែលកំពុងសង់ឬមានគម្រោងសង់រោងចក្រនុយក្លេអ៊ែរ កំពុងឋិតនៅក្រោមសម្ពាធរបស់មតិសាធារណជន។ តែយ៉ាងណាក៏ដោយ ជាទូទៅ បណ្តាប្រទេសអាស៊ីទាំងនេះ មិនព្រមបោះបង់ចោលឡើយ ការអភិវឌ្ឍន៍អគ្គិសនីនុយក្លេអ៊ែរ។
ចុះផ្សាយនៅថ្ងៃ៖
សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ
មតិសាធារណជននៅក្នុងបណ្តាប្រទេសអាស៊ីមួយចំនួន ដូចជានៅឥណ្ឌា នៅថៃ និងកូរ៉េខាងត្បូងជាដើម ចាប់ផ្តើមបន្ទរសំឡេងតវ៉ាប្រឆាំងនឹងកម្មវិធីនុយក្លេអ៊ែរស៊ីវិល។ ម្យ៉ាងគឺមកពីជប៉ុនដែលគេចាត់ទុកថាជាប្រទេសប្រយ័ត្នប្រយែងជាងគេ ក៏នៅតែគេចមិនផុតពីគ្រោះថ្នាក់នុយក្លេអ៊ែរ នៅទីបំផុត។ រីឯម្យ៉ាងទៀត គឺមកពីសព្វថ្ងៃនេះ ក្នុងចំណោមម៉ាស៊ីនប្រតិកម្មទាំង៦២ដែលកំពុងត្រូវសង់នៅក្នុងពិភពលោក ៤០ឋិតនៅក្នុងទ្វីបអាស៊ី។ នេះមិនមែនជាការចៃដន្យទេ ដ្បិតអាស៊ីដែលកំពុងស្គាល់កំណើនសេដ្ឋកិច្ចក្លៀវក្លាជាងគេ ត្រូវការថាមពលខ្លាំងឡើងៗ។
យ៉ាងណាក៏ដោយ ជាទូទៅបណ្តាប្រទេសដែលកំពុងសង់ឬក៏មានគម្រោងសង់រោងចក្រនុយក្លេអ៊ែរ មិនព្រមដកថយទេ។ ប្រទេសចិនដែលកំពុងសង់ម៉ាស៊ីនប្រតិកម្មចំនួន២៧និងមានគម្រោងសាងសង់៥០ផ្សេងទៀត បានបញ្ជាក់តាំងពីថ្ងៃអាទិត្យទី១៣មីនាម្ល៉េះថា ខ្លួនមិនបោះបង់ចោលដាច់ខាតការអភិវឌ្ឍន៍អគ្គិសនីនុយក្លេអ៊ែរ។ ដូចគ្នាអ៊ីចឹងដែរ ឥណ្ឌានិងកូរ៉េខាងត្បូងដែលកំពុងសង់ម៉ាស៊ីនប្រតិកម្មម្នាក់៥ និងដែលមានគម្រោងសាងសង់ម្នាក់ៗជាង១០ផ្សេងទៀត ក៏បានប្រកាសហើយដែរ ថាមិនដកថយឡើយ។ ប្រទេសវៀតណាមក៏អ៊ីចឹងដែរ អះអាងថា គ្រោះថ្នាក់នុយក្លេអ៊ែរនៅប្រទេសជប៉ុន មិនតម្រូវឲ្យរដ្ឋាភិបាលលុបចោលវិញទេ គម្រោងសាងសង់រោងចក្រនុយក្លេអ៊ែរទាំង៨ពីពេលនេះ ទៅដល់ឆ្នាំ២០២០។
ចំណែកប្រទេសបង់ក្លាដែសវិញ បានពន្យល់ប្រាប់ពលរដ្ឋគេថា រោងចក្រនុយក្លេអ៊ែរទាំង២ ដែលគ្រោងនឹងសាងសង់ ជាម៉ាស៊ីនប្រតិកម្មជំនាន់ទី៣ ដែលអាចទប់ទល់នឹងគ្រោះរញ្ជួយដីបាន។ រដ្ឋាភិបាលម៉ាឡេស៊ី ក៏បានខិតខំធ្វើឲ្យប្រជាជនកក់ក្តៅក្នុងចិត្តដែរ ដោយបានលើកឡើងថា គម្រោងសាងសង់រោងចក្រនុយក្លេអ៊ែរទាំង២ នឹងលេចចេញជារូបរាងនៅឆ្នាំ២០២១ឯណោះ។
ផ្ទុយពីគេឯង រដ្ឋាភិបាលថៃដែលមានគម្រោងសាងសង់រោងចក្រនុយក្លេអ៊ែរដែរនោះ បានប្រាប់ឲ្យដឹងថា អាចនឹងដកថយវិញ។ ក៏ប៉ុន្តែ គួរដឹងថា សេចក្តីប្រកាសបែបនេះរបស់ទីក្រុងបាងកក បានធ្លាក់មកដល់ចំពេលមួយ ដែលប្រទេសកំពុងផ្តើមចាត់ចែងរៀបចំបោះឆ្នោតសភា ម្ល៉ោះហើយវាអាចជាការយកចិត្តប្រជាពលរដ្ឋពីសំណាក់រដ្ឋាភិបាលអាភីស៊ីត។
ក្រៅពីនេះ មិនទាន់មានទេ ប្រតិកម្មឬការប្រកាសអ្វីមួយរបស់រដ្ឋាភិបាលឥណ្ឌូណេស៊ីនិងហ្វីលីពីន ដែលទាំងពីរប្រទេស សុទ្ធតែមានគម្រោងសាងសង់រោងចក្រនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ