ថាមពលនុយក្លេអ៊ែរនៅអាស៊ីអាគ្នេយ៍៖ ផលប្រយោជន៍ និងគ្រោះថ្នាក់
នៅថ្ងៃអាទិត្យ ៣១តុលា ២០១០នេះ វៀតណាមបានចុះកិច្ចព្រមព្រៀងជាមួយរុស្ស៊ី ក្នុងគម្រោងសាងសង់រោងចក្រអគ្គិសនីដើរដោយថាមពលនុយក្លេអ៊ែរចំនួន ២កន្លែង។ វៀតណាមគ្រោងសាងសង់រោងចក្រនុយក្លេអ៊ែរឲ្យបាន៨កន្លែង នៅឆ្នាំ២០៣០ខាងមុខ។ នៅអាស៊ីអាគ្នេយ៍ ក្រៅពីវៀតណាម នៅមានប្រទេសផ្សេងទៀត (ឥណ្ឌូនេស៊ី, ថៃ, ហ្វ៊ីលីពីន) ដែលកំពុងតែស្វះស្វែងចង់សង់រោងចក្រនុយក្លេអ៊ែរដែរ។ តើកត្តាអ្វីខ្លះដែលជំរុញឲ្យប្រទេសនៅអាស៊ីអាគ្នេយ៍បោះជំហានទៅរក នុយក្លេអ៊ែរ? តើការប្រើប្រាស់ថាមពលនុយក្លេអ៊ែរអាចបង្កគ្រោះថ្នាក់អ្វីខ្លះ?
ចុះផ្សាយនៅថ្ងៃ៖
បទវិភាគរបស់ សេង ឌីណា
នៅក្នុងរយៈពេល ១០-២០ឆ្នាំទៀត រោងចក្រអគ្គិសនីដើរដោយថាមពលនុយក្លេអ៊ែរអាចនឹងចាប់ដំណើរការនៅ អាស៊ីអាគ្នេយ៍។ ប្រទេសខ្លះ នៅក្នុងអាស៊ាន ដូចជា ឥណ្ឌូនេស៊ី វៀតណាម ថៃ និងហ្វ៊ីលីពីន សុទ្ធតែបានសម្រេចបោះជំហានទៅរកថាមពលនុយក្លេអ៊ែរ។ មានកត្តាធំៗពីរ ដែលជំរុញឲ្យអាស៊ានសម្រេចចាប់យកថាមពលនុយក្លេអ៊ែរ។
តម្រូវការថាមពលកើនឡើង ឯតម្លៃផលិតថាមពលក៏កាន់តែថ្លៃ
អាស៊ាន គឺជាតំបន់ ដែលមានកំណើនសេដ្ឋកិច្ចខ្ពស់។ ការកើនឡើងនៃសកម្មភាពសេដ្ឋកិច្ចធ្វើឲ្យតម្រូវការផ្នែកថាមពលក៏កើន ឡើងខ្លាំងដែរ។ យោងតាមរបាយការណ៍របស់ទីភ្នាក់ងារថាមពលអន្តរជាតិ (Agence internationale de l’énergie) ចេញផ្សាយកាលពីឆ្នាំ២០០៩ គេបានព្យាករថា នៅក្នុងចន្លោះពីឆ្នាំ២០០៧ ដល់ឆ្នាំ២០៣០ តម្រូវការផ្នែកថាមពល នៅក្នុងតំបន់អាស៊ីអាគ្នេយ៍នឹងកើនឡើងប្រមាណជា ៧៦% (បើគិតជាមធ្យម គឺ ២,៥% ក្នុងមួយឆ្នាំ)។ អត្រាកំណើននេះ មានកម្រិតខ្ពស់ជាងតំបន់ណាៗទាំងអស់។
នៅក្នុងពេលដែលតម្រូវការថាមពលមានការកើនឡើងខ្ពស់ ការផលិតថាមពល ដោយប្រើប្រេង ឧស្ម័ន និងធ្យូងថ្ម ជាដើម ក៏មានតម្លៃកាន់តែខ្ពស់ដែរ។ តំបន់អាស៊ីអាគ្នេយ៍ ថ្វីដ្បិតតែមានប្រទេសខ្លះ មានរ៉ែប្រេងកាត ក៏ប៉ុន្តែ នៅតែជាតំបន់ដែលពឹងផ្អែកលើការនាំប្រេងចូលពីតំបន់ផ្សេង។
ដោយហេតុតែតម្រូវការផ្នែកថាមពលមានកំណើនខ្លាំង ហើយតម្លៃផលិតក៏មានកម្រិតខ្ពស់បែបនេះហើយ ទើបបណ្តាប្រទេសនៅអាស៊ានចាប់ផ្តើមងាកទៅរកថាមពលនុយក្លេអ៊ែរវិញ។ ការសាងសង់រោងចក្រអគ្គិសនីដើរដោយថាមពលនុយក្លេអ៊ែរ ពិតជាមានភាពស្មុគស្មាញ និងត្រូវចំណាយលុយច្រើនមែនពីដំបូង។ ក៏ប៉ុន្តែ ក្រោយពីសង់រួចរាល់ហើយ រោងចក្រប្រភេទនេះអាចផលិតថាមពលអគ្គិសនីបានក្នុងតម្លៃថោកបំផុត ធៀបទៅនឹងរោងចក្រដើរដោយធ្យូងថ្ម ឬដោយប្រេងឥន្ធនៈ។
ភាពចាំបាច់ក្នុងការទប់ទល់នឹងការឡើងកម្តៅនៃភពផែនដី
នាពេលបច្ចុប្បន្ននេះ គេនាំគ្នានិយាយអំពីការឡើងកម្តៅនៃភពផែនដីស្ទើរតែគ្រប់កន្លែង។ ប្រទេសក្នុងតំបន់អាស៊ីអាគ្នេយ៍ក៏ចាប់ផ្តើមផ្តោតអារម្មណ៍ទៅលើ បញ្ហានេះខ្លាំងដែរ។ ដើមហេតុចម្បង ដែលធ្វើឲ្យផែនដីឡើងកម្តៅ គឺឧស្ម័នផ្ទះកញ្ចក់ (Greenhouse Gas ជាភាសាអង់គ្លេស ឬ Gaz à effet de serre ជាភាសាបារាំង)។ នុយក្លេអ៊ែរ គឺការផលិតថាមពល ដែលបញ្ចេញឧស្ម័នផ្ទះកញ្ចក់តិចបំផុត ធៀបនឹងប្រេងឥន្ធនៈ ធ្យូងថ្ម និងឧស្ម័ន។ ដូច្នេះ ការបង្វែរទៅរកថាមពលនុយក្លេអ៊ែរ គឺជាមធ្យោបាយមួយ ដែលប្រទេសនៅអាស៊ីអាគ្នេយ៍គិតថា មានប្រសិទ្ធភាពក្នុងការទប់ស្កាត់ការឡើងកម្តៅផែនដី។
គ្រោះថ្នាក់ដែលអាចបង្កឡើងពីការប្រើថាមពលនុយក្លេអ៊ែរ
ថាមពលនុយក្លេអ៊ែរ គឺជាអាវុធមុខពីរ។ ថ្វីដ្បិតតែនុយក្លេអ៊ែរអាចជួយឲ្យគេផលិតថាមពលបានក្នុងតម្លៃថោក និងអាចជួយទប់ស្កាត់ការឡើងកម្តៅផែនដី ក៏ប៉ុន្តែ វាក៏អាចបង្កបញ្ហាធ្ងន់ធ្ងរដល់សុខភាពរបស់មនុស្សដែរ។ បញ្ហាចោទធំបំផុត គឺធាតុវិទ្យុសកម្ម នៅក្នុងរោងចក្រនុយក្លេអ៊ែរ។ ធាតុវិទ្យុសកម្ម ប្រសិនបើលេចធ្លាយចេញមកខាងក្រៅ គឺអាចនឹងបង្កគ្រោះថ្នាក់ធ្ងន់ធ្ងរបំផុតទាំងចំពោះជីវិតមនុស្ស និងបរិស្ថានជុំវិញ។
ការលេចធ្លាយធាតុវិទ្យុសកម្មអាចកើតមានឡើង បណ្តាលមកពីបញ្ហាច្រើនយ៉ាង រួមមាន កង្វះខាតបច្ចេកទេសក្នុងការគ្រប់គ្រងរោងចក្រនុយក្លេអ៊ែរ ការធ្វេសប្រហែសរបស់បុគ្គលិក ការវាយប្រហារពីសំណាក់ក្រុមភេរវជន ឬគ្រោះធម្មជាតិ (ជាពិសេស រញ្ជួយដី) ។ល។
បញ្ហាភេរវកម្ម និងគ្រោះធម្មជាតិ គឺជាបញ្ហាចម្បង នៅអាស៊ីអាគ្នេយ៍។ ប្រទេសឥណ្ឌូនេស៊ីមានទីតាំងនៅត្រង់កន្លែងសម្បូរគ្រោះរញ្ជួយដី និងការផ្ទុះភ្នំភ្លើងច្រើនជាងគេបំផុត។ អង្គការភេរវកម្ម ដូចជា Jemaah Islamiyah ក៏កំពុងតែបង្កបញ្ហាអសន្តិសុខយ៉ាងខ្លាំងដែរ នៅឥណ្ឌូនេស៊ី។ នៅតាមប្រទេសមួយចំនួនផ្សេងទៀត ដូចជា ហ្វ៊ីលីពីន និងថៃ ជាដើម ក៏សុទ្ធតែមានបញ្ហាអសន្តិសុខ បង្កឡើងដោយពួកភេរវជន។ ទាំងនេះ សុទ្ធសឹងតែជាបញ្ហាចោទ ជុំវិញសុវត្ថិភាពនុយក្លេអ៊ែរ។
ក្រៅពីនេះ ការផលិតថាមពលដោយនុយក្លេអ៊ែរ ចោទជាបញ្ហាដ៏ធំមួយទៀត គឺកាកសំណល់នុយក្លេអ៊ែរ ដែលមានធាតុវិទ្យុសកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ