ថៃកំពុងប្រយុទ្ធប្រឆាំងនឹងអំពើពុករលួយ ឬកំពុងឈូសឱ្យអស់ស្នាមត្រកូលថាក់ស៊ីន ?
ចុះផ្សាយនៅថ្ងៃ៖
ស្តាប់ - ០៤:១៨
ប៉ូលិសថៃជាប់ឈ្មោះល្បីខាងពុកលួយ ! សារព័ត៌មានក្នុងស្រុកតែងចុះផ្សាយជាញយដង អំពីភាពមន្ទិលសង្ស័យជាច្រើនថាប៉ូលិសទទួលសំណូក។ ប៉ុន្តែនៅលើកនេះ ប៉ូលិសថៃបានជួបរឿងអាស្រូវក្នុងទម្រង់ខុសពីមុនបន្តិច។ ជាលើកទីមួយ អ្នកទទួលខុសត្រូវជាន់ខ្ពស់ប៉ូលិសបានរងការចោទ ប្រកាន់ប្រព្រឹត្តអំពើពុករលួយ (រឹបអូសលុយសុទ្ធបានប្រមាណ១ពាន់លានបាត) ក្នុងនោះពីរនាក់ ជាប់ចោទពីបទប្រមាថរាជានិយម។ នេះបញ្ជាក់ថាការប្រយុទ្ធប្រឆាំងនឹងអំពើពុករលួយរបស់រដ្ឋាភិបាលថៃ បានដើរមកដល់របត់ថ្មី ស្រាវចាប់ដល់មេធំៗ ប៉ុន្តែហេតុអ្វីមានបទចោទប្រកាន់ប្រមាថព្រះចេស្តាព្រះមហាក្សត្រជាមួយដែរ ?
រដ្ឋាភិបាលសឹកថៃរបស់លោក ឧត្តមសេនីយ៍ ប្រាយុទ្ធចាន់អូចា បានប្រកាសជាច្រើនលើកច្រើនសា អំពីការប្រយុទ្ធប្រឆាំងនឹងអំពើពុករលួយ ថាជាអាទិភាពដ៏ចម្បងមួយ។ នៅក្នុងសំណុំរឿងចាប់ខ្លួនមេប៉ូលិសកាលពីចុងសប្តាហ៍ គ្មានព័ត៌មានលម្អិតណាទាក់ទងបទចោទប្រកាន់អំពើពុករលួយត្រូវបានទម្លាយចេញឱ្យដឹងទេ ក្រៅអំពីចំនួនទឹកប្រាក់ដ៏មហាសាលនោះ។
ចំណែកខ្លឹមសារនៃបទចោទប្រកាន់ប្រមាថព្រះមហាក្សត្រ ក៏មិនត្រូវបានផ្សព្វផ្សាយជាសាធារណៈដែរ។ មិនដឹងថាប៉ូលិសនោះប្រើពាក្យពេជន៍ ឬទង្វើអ្វីដែលនាំឱ្យជាប់ចោទឡើយ។ ប៉ុន្តែគ្រាន់តែបានឮដំណឹងថាមានប៉ូលិសផ្ទាល់តែម្តងដែលត្រូវជាប់ចោទពីបទប្រមាថរាជានិយម គឺគ្រប់គ្រាន់នឹងបង្កភាពងឿយឆ្ងល់និងការភ្ញាក់ផ្អើលបំផុតហើយ។ ព្រោះសឹងថាមិនដែលធ្លាប់មានពីមុនមកទេ !
ចាប់ខ្លួនកាលពីថ្ងៃសៅរ៍ មេប៉ូលិស ព្រមទាំងមេប៉ូលិសរងនៃការិយាល័យស៊ើបអង្កេតមជ្ឈិម និងមេប៉ូលិសជើងទឹកត្រូវបានដកហូតតួនាទីនិងយកទៅឃុំឃាំង។ ប៉ូលិសបួននាក់ទៀត បូកនិងជនស៊ីវិល៥នាក់ផ្សេងទៀត ក៏ត្រូវចាប់ខ្លួនដែរក្នុងសំណុំរឿងតែមួយ។ ប៉ុន្តែមានតែនាយប៉ូលិសបីនាក់ប៉ុណ្ណោះដែលត្រូវរងការចោទប្រកាន់អំពីបទប្រមាថរាជានិយម។ ជាបទចោទប្រកាន់ដ៏ធ្ងន់ធ្ងរ នៅប្រទេសថៃ ដែលអាចមានការផ្តន្ទាទោសឱ្យជាប់ពន្ធនាគាររហូតដល់១៥ឆ្នាំ។
តាមការពិត សំណុំរឿងប្រមាថព្រះមហាក្សត្រ មិនមែនជារឿងថ្មីថ្មោងទេ។ តាំងពីមានការប្តូរអ្នកកាន់អំណាច នៅថ្ងៃទី២២ឧសភា២០១៤ តាមរយៈរដ្ឋប្រហារទម្លាក់រដ្ឋាភិបាលយីងឡាក់ ស៊ីណាវ៉ាត់មក ចំនួនបទចោទប្រកាន់ និងដាក់ទោសពីបទប្រមាថព្រះចេស្តាព្រះមហាក្សត្រ កើនឡើងជាលំដាប់ ប៉ុន្តែសឹងពុំធ្លាប់មានឡើយការចោទប្រកាន់ប្រឆាំងនឹងមេប៉ូលិសជាន់ខ្ពស់ដូច្នេះ។ គេត្រូវវិលទៅទសវត្សឆ្នាំ១៩៩០ ទើបឃើញមានករណីបែបនេះ។ ក្នុងរយៈពេល១០ឆ្នាំចុងក្រោយនេះ ការចាប់ទោសអូសដំណើរពីបទប្រមាថព្រះមហាក្សត្រ កើតមានឡើងតែចំពោះសកម្មជនការពារលទ្ធិប្រជាធិបតេយ្យ និងក្រុមសកម្មជនអាវក្រហម អ្នកគាំទ្រត្រកូលថាក់ស៊ីនតែប៉ុណ្ណោះ។
តែពេលនេះ សូម្បីតែមេប៉ូលិសធំ ក៏ត្រូវជាប់ចោទដែរ ! ពិតជាគួរឱ្យភ្ញាក់ផ្អើលមែន ! តើនេះមិនមែនមានន័យថាក្រុមទាហានដែលជាអ្នកដឹកនាំប្រទេស កំពុងបង្ហាញធ្មុង ចង់បំបាក់រចនាសម្ព័ន្ធប៉ូលិស ដែលពុករលួយក្រោមផ្លាកការពាររាជានិយមទេឬ ?
សូមបញ្ជាក់ថា ទំនាក់ទំនងរវាងស្ថាប័នយោធា និងប៉ូលិសថៃ តែងត្រូវបានគេសង្កេតឃើញថាមានលក្ខណៈចម្រូងចម្រាសមិនស៊ីចង្វាក់គ្នាទេ ហើយតាំងពីឧត្តមសេនីយ៍ ប្រាយុទ្ធ ចាន់អូចា ឡើងកាន់អំណាចមក ទំនាក់ទំនងនេះកាន់តែធ្លាក់ដុនដាប ស្ទើរក្លាយជាភាគីបក្សដិបក្សមានជម្លោះនឹងគ្នាផង។
ប្រជារាស្ត្រមិនសូវឱ្យតម្លៃខ្លាំង ព្រោះតែមានឈ្មោះមិនល្អខាងប្រព្រឹត្តអំពើពុករលួយ ស៊ីសំណូក ជារឿងមួយ ប៉ុន្តែស្ថាប័នប៉ូលិសនេះ ត្រូវបានស្ថាប័នយោធា ចោទប្រកាន់ថាក្រុមដែលស្ថិតនៅក្រោមដែនអំណាចរបស់លោកថាក់ស៊ីន ស៊ីណាវ៉ាត់ និងបានបិទភ្នែក ធ្វើមិនឃើញសកម្មជនអាវក្រហម ប្រមូលអាវុធលួចលាក់ទុក ពេលធ្វើបាតុកម្ម។ ប្រមុខស្ថាប័នប៉ូលិសថ្មី ដែលស្និទ្ធនឹងរបបសឹករបស់លោកប្រាយុទ្ធចាន់អូចា បានចេញមុខប្តេជ្ញាកម្ចាត់អំពើពុកក្នុងផ្ទៃស្ថាប័នប៉ូលិស និងបន្ទាប់ពីបានជម្រុះមន្ត្រីស៊ីវិល និងប៉ូលិសស្និទ្ធនឹងលោកថាក់ស៊ីនរួច បានប្រកាសចង់បញ្ចូលកាតព្វកិច្ចប៉ូលិសទៅក្នុងស្ថាប័ននេះ ដើម្បីបំពេញកង្វះមន្ត្រីប៉ូលិស។
ហេតុដូច្នេះហើយបានជា អ្នកវិភាគមួយចំនួនមើលឃើញ ការចោទប្រកាន់ ប្រឆាំងនឹងមន្ត្រីជាន់ខ្ពស់ ប៉ូលិសពេលនេះ ថាទំនងជាចំណែកមួយនៃប៉ុនប៉ងបោសសម្អាតក្នុងស្ថាប័នប៉ូលិស នូវរាល់អ្នកទទួលត្រូវណាដែលរបបសឹកយល់ថាមាននិន្នាការស្និទ្ធនឹងត្រកូលថាក់ស៊ីន។ រដ្ឋាភិបាលសឹកថៃ សាកល្បងធ្វើយ៉ាងណាឱ្យស្ថាប័នប៉ូលិសកាន់តែចុះខ្សោយ ដោយលើកតម្កើងស្ថាប័នយោធា។
ក្រុមបញ្ញវន្ត និងអង្គការជាច្រើន យល់ថាសំណុំរឿងប្រមាថព្រះចេស្តាព្រះមហាក្សត្រ ជារឿងក្តីនយោបាយ ព្រោះជនជាប់ចោទភាគច្រើន សុទ្ថសឹងជាអ្នកមានចំណង ឬទំនាក់ទំនងជាមួយចលនាអាវក្រហម ឬសកម្មជនគាំទ្រលោកថាក់ស៊ីន។ លោក ថាក់ស៊ីន អតីតនាយករដ្ឋមន្ត្រីដែលត្រូវផ្តួលចេញពីតំណែងដោយរដ្ឋប្រហារនៅឆ្នាំ២០០៦ បន្សល់ទុកនូវការបែកបាក់ក្នុងសង្គមថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ