កូឡុមបូស្នើសុំអសបបង្អង់ពេលចេញរបាយការណ៍ស្តីពីឧក្រិដ្ឋកម្មសង្គ្រាមនៅស្រីលង្កា
ស្របពេលដែលអសប ត្រៀមនឹងចេញរបាយការណ៍មួយរបស់ខ្លួននៅដើមខែមីនា បរិហារពីឧក្រិដ្ឋកម្មសង្គ្រាមនៅអំឡុងពេលសង្គ្រាមស៊ីវីលនៅប្រទេសស្រីលង្កា ប្រទេសនេះ បានស្នើសុំអសបកុំប្រញាប់ចេញរបាយការណ៍ ដោយសុំឲ្យរង់ចាំ រហូតដល់ប្រទេសខ្លួនមានប្រព័ន្ធយុតិធម៌ត្រឹមត្រូវសិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
ប្រមុខការទូតស្រីលង្កាលោក Mangala Samaraweera បានធ្វើការអំពាវនាវនេះនៅទីក្រុងវ៉ាស៊ីនតោន។ នៅទីនោះ លោកប្រមុខការទូតថ្មីស្រីលង្កា ត្រូវជួបប្រាស្រ័យជាមួយសមភាគីអាមេរិកលោក ចន ឃែរីនៅថ្ងៃព្រហស្បតិ៍នេះ បន្ទាប់ពីជ័យជំនះដ៏ធំធេងរបស់ប្រធានាធិបតីថ្មីប្រទេសស្រីលង្កាលោក Maithripala Sirisena កាលពីដើមខែមករាមុន។ ទាំងសហរដ្ឋអាមេរិកនិងទាំងអឺរ៉ុប បានសំដែងការអបអរសាទរជាក្រៃលែងចំពោះដំណើរការផ្លាស់ប្តូរឈានទៅរកលទ្ធិប្រជាធិបតេយ្យនៅស្រីលង្កា។
គួររំលឹកថា នៅខែមីនាឆ្នាំ២០១៤ ក្រុមប្រឹក្សាទទួលបន្ទុកសិទ្ធិមនុស្សអសប បានបើកការស៊ើបអង្កេតមួយដោយប្រគល់ភារកិច្ចនេះជូនដល់ឧត្តមស្នងការសិទ្ធិមនុស្សរបស់អសប ស្តីពីឧក្រិដ្ឋកម្មសង្គ្រាមនៅពេលចុងបញ្ចប់សង្គ្រាមស៊ីវិលនៅស្រីលង្កា។ឧក្រិដ្ឋកម្មសង្គ្រាមដែលបង្កឡើងដោយកងទ័ពស្រីលង្កានៅដើមឆ្នាំ២០០៩ បានបណ្តាលឲ្យប្រជាជនស៊ីវិលតាម៊ូលស្លាប់អស់ ជាង៤ម៉ឺននាក់។ ប៉ុន្តែបើសរុបគិតពីពេលសង្គ្រាមបានផ្ទុះពីដំបូងកាលពីឆ្នាំ១៩៧២ រហូតមកដល់ឆ្នាំ២០០៩ ប្រជាជនស៊ីវីលតាម៊ូល ស្លាប់នៅក្នុងសង្គ្រាមនេះ មានរហូតដល់ ១០ម៉ឺននាក់។
សូមបញ្ជាក់ ឧត្តមស្នងការសិទ្ធិមនុស្សអសប ត្រូវលើកបង្ហាញឲ្យគេដឹងពីសេចក្តីសម្រេចរបស់ខ្លួននៅដើមខែមីនា នាឱកាសសម័យប្រជុំជាទៀងទាត់មួយរបស់ក្រុមប្រឹក្សាអសបនៅពេលខាងមុខ។
នៅក្នុងសន្និសីទមួយនៅមូលនិធិ Carnegie លោកប្រមុខការទូតស្រីលង្កា បានអះអាងថា ការស្នើសុំអសបឲ្យបង្អង់ពេលចេញរបាយការណ៍ ពុំមែនមានន័យថាស្រីលង្កា ចង់កេងចំណេញពេលវេលានោះទេ ប៉ុន្តែស្រីលង្កាចង់មានពេលគ្រប់គ្រាន់ដើម្បីការរៀបចំបង្កើតសាលាក្តីផ្ទាល់មួយរបស់ខ្លួន ។ សាលាក្តីនេះនឹងលេចចេញជារូបរាងនៅក្នុងរយៈពេលពីរខែយ៉ាងយូរ បន្ទាប់មក អសបអាចនឹងបញ្ជូនរបាយការណ៍ខ្លួនមកកាន់ស្រីលង្កា-នេះជាការអះអាងរបស់លោកប្រមុខការទូតស្រីលង្កា ។
លោកប្រមុខការទូតស្រីលង្កាបានថ្លែងធានាដែរថា រដ្ឋាភិបាលស្រីលង្កាថ្មី ត្រៀមជាស្រេច ដើម្បីចាប់ខ្លួនជនទាំងឡាយណាដែលបានចូលរួមក្នុងការរំលោភសិទ្ធិមនុស្សនៅក្នុងប្រទេសត្រូវចាប់ខ្លួនយកមកកាត់ទោសនៅមុខតុលាការ។
នៅស្រីលង្កាវិញ រដ្ឋាភិបាលថ្មីកូឡុមបូ បានបើកការអនុញាតហើយដែរ ដើម្បីបើកការស៊ើបអង្កេតជាតិមួយ ស្តីពីការចោទប្រកាន់នានាពាក់ព័ន្ធនឹងឧក្រិដ្ឋកម្មសង្គ្រាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ