សិទ្ធិមនុស្ស៖ប្រទេសស្រីលង្កាបានច្រានចោលការរិះគន់ ទិតៀនរបស់អង្គការសហប្រជាជាតិ
នៅថ្ងៃសៅរិ៍ ទី៨ វិច្ឆិកា ប្រទេសស្រីលង្កាបានទាត់ចោលទំាងស្រុងលើការរិះគន់ ទិតៀនរបស់លោក Zeid Ra’ad Al Hussein ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស។ រដ្ឋាភិបាលទីក្រុងកូឡុំបូបានសម្តែងការសោកស្តាយយ៉ាងខ្លំាងចំពោះពាក្យសម្តីរិះគន់ ទិតៀនរបស់លោក Hussein ដែលគ្មានភស្តុតាងច្បាស់លាស់។ ប្រតិកម្មរបស់ស្រីលង្កាពេលនេះបានធ្វើឡើង មួយថ្ងៃបន្ទាប់ពីលោក Hussein បានរិះគន់រដ្ឋាភិបាលទីក្រុងកូឡុំបូពីបទបានព្យាយាមរារំាងដំណើរការស៊ើបអង្កេតរបស់អង្គការសហប្រជាជាតិស្តីពីឧក្រិដ្ឋកម្មសង្រ្គាមក្នុងជម្លោះជាមួយក្រុមតាមូល។
ចុះផ្សាយនៅថ្ងៃ៖
ស្តាប់ - ០១:៥០
ប្រតិកម្មរបស់ប្រទេសស្រីលង្កាចំពោះឧត្តមស្នងការសិទ្ធិមនុស្សអន្តរជាតិបានធ្វើឡើងតាមរយៈលោក Ravinatha Aryasinha ឯកអគ្គរដ្ឋទូតស្រីលង្កាប្រចំាអង្គការសហប្រជាជាតិ។ លោក Ravinatha បានសរសេរលិខិតមួយច្បាប់ផ្ញើទៅកាន់ថ្នាក់ដឹកនំារបស់អង្គការសហប្រជាជាតិដើម្បីច្រានចោលទំាងស្រុងនូវការរិះគន់របស់លោក Zeid Ra’ad Al Hussein។ នៅក្នុងលិខិតនោះ លោក Ravinatha បានចាត់ទុកទង្វើរបស់លោក Hussein ថាជាការរំលោភបំពានលើអធិបតេយ្យរបស់ស្រីលង្កាក្នុងនាមជាប្រទេសសមាជិករបស់អង្គការសហប្រជាជាតិតំាងពីឆ្នំា ១៩៥៥។
ទន្ទឹមគ្នានេះ លោក Ravinatha ក៏បានបញ្ជាក់ច្បាស់ៗថា រដ្ឋាភិបាលទីក្រុងកូឡុំបូ ក៏ដូចជាស្ថាប័នរដ្ឋដទៃទៀត គឺមិនដែលបានព្យាយាមរារំាង ឬមួយក៏ហាមមិនឲ្យបុគ្គលិកណាម្នាក់ចេញមុខធ្វើសាក្សីផ្តល់ព័ត៌មានឲ្យគណៈកម្មការស៊ើបអង្កេតរបស់អង្គការសហប្រជាជាតិនោះទេ។ មួយវិញទៀត លោក Ravinatha ក៏បានសម្តែងការសោកស្តាយដែលរដ្ឋាភិបាលស្រីលង្កាត្រូវបានគេបិទសិទ្ធិក្នុងការជំទាស់ទៅនឹងដំណើរការស៊ើបអង្កេតរៀបចំដោយអង្គការសហប្រជាជាតិ និងថា វាជាទង្វើមួយដែលជះឥទ្ធិពលអាក្រក់លើអារម្មណ៍របស់ប្រជាជនស្រីលង្កា និងអនាគតរបស់ប្រទេសនៅក្នុងបរិបទនៃការផ្សះផ្សាជាតិ។
កាលពីថ្ងៃសុក្រ ទី៧ វិច្ឆិកា លោកឧត្តមស្នងការសិទ្ធិមនុស្សអន្តរជាតិ Hussein បានចោទរដ្ឋាភិបាលស្រីលង្កាពីបទបានគំរាមមនុស្សកុំផ្តល់ព័ត៌មាន ក៏ដូចជាព្យាយាមរារំាងដំណើរស៊ើបអង្កេតរបស់អង្គការសហប្រជាជាតិស្តីពីសង្រ្គាមប្រឆំាងពួកឧទ្ទាមតាមូលចន្លោះឆ្នំា ១៩៧២ និង ២០០៩ ដោយបានបណ្តាលឲ្យស្លាប់ជនស៊ីវិលតាមូលជាង ៤០ ០០០នាក់។ លោក Hussein បានបញ្ជាក់ថា បើរដ្ឋាភិបាលស្រីលង្កាមិនព្រមរួមសហការណ៍ទេនោះ ចុះហេតុអ្វីបានជាចំាបាច់ប្រឹងប្រែងធ្វើអ្វីៗគ្រប់បែបយ៉ាងដើម្បីរារំាងដល់ដំណើរការស៊ើបអង្កេតរបស់អង្គការសហប្រជាជាតិខ្លំាងម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ