វិបត្តិស៊ីរី៖ លោកខាងលិចនិងសម្ព័ន្ធអារ៉ាប់បង្កើនសម្ពាធលើរុស្ស៊ី
នៅថ្ងៃអង្គារ ៣១ មករានេះ អគ្គលេខាធិការសម្ព័ន្ធអារ៉ាប់ និងនាយករដ្ឋមន្រ្តីកាតារនឹងទៅទីក្រុងញូវយ៉ក ដើម្បីជំរុញឲ្យក្រុមប្រឹក្សាសន្តិសុខអនុម័តសេចក្តីសម្រេច គាំទ្រផែនការរបស់សម្ព័ន្ធអារ៉ាប់ ក្នុងការដោះស្រាយវិបត្តិស៊ីរី។ អគ្គលេខាធិការសម្ព័ន្ធអារ៉ាប់គ្រោងប្រាប់ទៅតំណាងរដ្ឋាភិបាលរុស្ស៊ីថា ការប្រើសិទ្ធិវ៉េតូលើសេចក្តីសម្រេចនេះ គឺប្រៀបបាននឹងការប្រឆាំងនឹងពិភពអារ៉ាប់ទាំងមូល។
ចុះផ្សាយនៅថ្ងៃ៖
ស្តាប់ - ០៥:៤៧
ការប្រឈមមុខដាក់គ្នានឹងកើតមាននៅថ្ងៃអង្គារនេះ នៅទីក្រុងញូវយ៉ក រវាងម្ខាង រុស្ស៊ី និងម្ខាងទៀតសម្ព័ន្ធអារ៉ាប់ និងប្រទេសលោកខាងលិច ជុំវិញវិបត្តិនៅស៊ីរី។
សម្ព័ន្ធអារ៉ាប់បញ្ជូនឥស្សរជនពីររូប គឺអគ្គលេខាធិការ និងនាយករដ្ឋមន្រ្តីកាតារ ដែលជាប្រធានគណៈកម្មាធិការសម្ព័ន្ធអារ៉ាប់ទទួលបន្ទុកកិច្ចការស៊ីរី ដើម្បីឆ្លើយការពារផែនការរបស់ខ្លួនចំពោះមុខក្រុមប្រឹក្សាសន្តិសុខ។ អាមេរិក អង់គ្លេស និងបារាំង សុទ្ធតែបានបញ្ជូនរដ្ឋមន្រ្តីការបរទេសទៅញូវយ៉កដោយផ្ទាល់ ដើម្បីគាំទ្រផែនការរបស់សម្ព័ន្ធអារ៉ាប់ ទល់នឹងការប្រឆាំងរបស់រុស្ស៊ី។
នៅក្នុងសេចក្តីព្រាងសេចក្តីសម្រេច ដែលវិទ្យុបារាំងអន្តរជាតិទទួលបាន ក្រុមប្រឹក្សាសន្តិសុខអ.ស.ប. ចង់ដាក់កំហិតឲ្យរដ្ឋាភិបាលស៊ីរីអនុវត្តតាមផែនការរបស់សម្ព័ន្ធអារ៉ាប់ ដែលចែកចេញជាពីរផ្នែក៖
ដំណោះស្រាយភ្លាមៗដើម្បីបញ្ចប់អំពើហិង្សា
សេចក្តីព្រាងទាមទារឲ្យរដ្ឋាភិបាលស៊ីរី៖
- បញ្ឈប់រាល់អំពើហិង្សា និងត្រូវការពារប្រជាជនស៊ីវិល
- ដោះលែងអ្នកទោសទាំងអស់ ដែលអាជ្ញាធរបានចាប់ខ្លួន ក្នុងព្រឹត្តិការណ៍បះបោរប្រឆាំងកន្លងទៅ
- ដកកងទ័ពទាំងអស់ ដែលរដ្ឋាភិបាលស៊ីរីដាក់ពង្រាយតាមទីក្រុង និងទីប្រជុំជន ដើម្បីបង្រ្កាបក្រុមប្រឆាំង
- ផ្តល់សិទ្ធិសេរីភាពពេញលេញ ដល់ក្រុមអ្នកសង្កេតការណ៍របស់សម្ព័ន្ធអារ៉ាប់ ដើម្បីបំពេញបេសកកម្ម នៅក្នុងប្រទេសស៊ីរី
ដំណោះស្រាយបន្ទាប់ដើម្បីធ្វើកំណែទម្រង់នយោបាយ
- លោកបាស្ហា អាល់អាសាដ (Bachar al-Assad) ត្រូវចុះចេញពីតំណែង ហើយផ្ទេរអំណាចឲ្យអនុប្រធានាធិបតីស៊ីរីវិញ
- បន្ទាប់មក អនុប្រធានាធិបតីស៊ីរីត្រូវបង្កើតរដ្ឋាភិបាលរួបរួមជាតិមួយ ដោយមានរួមបញ្ចូលក្រុមប្រឆាំង
- រដ្ឋាភិបាលរួបរួមជាតិនេះត្រូវរៀបចំការបោះឆ្នោតជាតិមួយ ដែលមានលក្ខណៈសេរី និងប្រកបដោយតម្លាភាព ក្រោមការចាត់ចែងរបស់សម្ព័ន្ធអារ៉ាប់ និងសហគមន៍អន្តរជាតិ។
គឺការទាមទារឲ្យលោកអាសាដចុះចេញពីតំណែងនេះហើយ ដែលធ្វើឲ្យរុស្ស៊ីជំទាស់។ ជាទូទៅ គេសង្កេតឃើញថា រុស្ស៊ីតែងតែជំទាស់នឹងរាល់សេចក្តីសម្រេចរបស់ក្រុមប្រឹក្សាសន្តិសុខ ដែលមានអត្ថន័យជំរុញឲ្យផ្លាស់ប្តូររបបដឹកនាំ នៅក្នុងប្រទេសអធិបតេយ្យ។ លើសពីនេះទៅទៀត របបដឹកនាំ ដែលក្រុមប្រឹក្សាសន្តិសុខចង់ផ្លាស់ប្តូរ នៅស៊ីរី នៅពេលនេះ គឺជាសម្ព័ន្ធមិត្តរបស់រុស្ស៊ី។
រុស្ស៊ីមានមូលដ្ឋានទ័ពជើងទឹកនៅស៊ីរី។ ស៊ីរីទិញគ្រឿងសព្វាវុធពីរុស្ស៊ី គិតជាទឹកប្រាក់ប្រមាណជា ៧០០លានដុល្លារ ក្នុងមួយឆ្នាំៗ។ ថ្មីៗនេះ នៅក្នុងពេលដែលកំពុងមានចលនាបះបោរប្រឆាំងនៅស៊ីរី រុស្ស៊ីក៏នៅបន្តលក់យន្តហោះចម្បាំង ចំនួន ៣៥គ្រឿងទៅឲ្យរដ្ឋាភិបាលរបស់លោកអាសាដ (កិច្ចសន្យាដែលមានតម្លៃរហូតដល់ទៅ ៥៥០លានដុល្លារ)។
រដ្ឋមន្រ្តីការបរទេសរុស្ស៊ីមិនលើកទូរស័ព្ទ
សហរដ្ឋអាមេរិកបានព្យាយាមបញ្ចុះបញ្ចូលរុស្ស៊ីឲ្យគិតថា លោកអាសាដនឹងមិនអាចបន្តកាន់អំណាចនៅស៊ីរីទៀតបានទេ។ ដូច្នេះ រុស្ស៊ីគួរបញ្ឈប់ការគាំទ្រលើលោកអាសាដទៅ ហើយងាកមកជួយជ្រោមជ្រែងឲ្យមានការផ្លាស់ប្តូររបបដឹកនាំវិញ ដើម្បីទុកលទ្ធភាពរក្សាទំនាក់ទំនង និងផលប្រយោជន៍របស់រុស្ស៊ី នៅពេលមានរបបដឹកនាំថ្មី នៅស៊ីរី។ ក៏ប៉ុន្តែ បើតាមមើលទៅ រដ្ឋាភិបាលរុស្ស៊ីទំនងជាមិនយល់ឃើញបែបនេះទេ។
បើយោងតាមអ្នកនាំពាក្យក្រសួងការបរទេសអាមេរិក រដ្ឋមន្រ្តីការបរទេសរុស្ស៊ីមិនទាំងឆ្លើយទូរស័ព្ទរបស់លោកស្រីហ៊ីឡារី គ្លីនតុនផង ទោះបីជាមានការព្យាយាមហៅជាច្រើនលើក នៅក្នុងរយៈពេល ២៤ម៉ោង កន្លងទៅនេះ។
ប្រឆាំងនឹងសេចក្តីសម្រេចក្រុមប្រឹក្សាសន្តិសុខដូចប្រឆាំងនឹងពិភពអារ៉ាប់
យោងតាមប្រភពការទូត ដែលសុំមិនបញ្ចេញឈ្មោះ អគ្គលេខាធិការសម្ព័ន្ធអារ៉ាប់គ្រោងនឹងជួបជាមួយឯកអគ្គរដ្ឋទូតរុស្ស៊ីប្រចាំអ.ស.ប. ដើម្បីបញ្ជាក់ថា ប្រសិនបើរុស្ស៊ីប្រើសិទ្ធិវ៉េតូលើសេចក្តីព្រាងរបស់ក្រុមប្រឹក្សាសន្តិសុខនៅពេលនេះ គឺប្រៀបដូចជាប្រឆាំងនឹងពិភពអារ៉ាប់ទាំងមូល។
មន្រ្តីការទូតបារាំងបានឲ្យដឹងថា រហូតមកទល់ពេលនេះ នៅក្នុងក្រុមប្រឹក្សាសន្តិសុខអ.ស.ប. មានប្រទេសចំនួន ១០ហើយ ដែលគាំទ្រផែនការរបស់សម្ព័ន្ធអារ៉ាប់ ពោលគឺ លើសពី ៩សំឡេង ដែលត្រូវការ ដើម្បីអនុម័ត។
សហរដ្ឋអាមេរិក អង់គ្លេស និងបារាំង គ្រោងនឹងជំរុញឲ្យក្រុមប្រឹក្សាសន្តិសុខបោះឆ្នោតអនុម័តសេចក្តីព្រាងនេះ នៅចុងសប្តាហ៍ បើទោះជារុស្ស៊ីជំទាស់ក៏ដោយ។ ធ្វើបែបនេះ គឺដើម្បីដាក់សម្ពាធលើរុស្ស៊ី។ បើរុស្ស៊ីប្រើសិទ្ធិវ៉េតូ រុស្ស៊ីនឹងត្រូវប្រឈមមុខនឹងការរិះគន់ថា ជាអ្នកទទួលខុសត្រូវ ចំពោះបរាជ័យនៃផែនការរបស់សម្ព័ន្ធអារ៉ាប់។
រុស្ស៊ីស្នើសុំធ្វើជាអន្តរការីដើម្បីដោះស្រាយវិបត្តិស៊ីរី
រុស្ស៊ីទំនងជាបានមើលឃើញ អំពីផលវិបាកនយោបាយ និងការទូត នៃការប្រើសិទ្ធិវ៉េតូ លើផែនការរបស់សម្ព័ន្ធអារ៉ាប់នេះ។ ហេតុដូច្នេះហើយបានជារុស្ស៊ីមិនបាននិយាយច្បាស់ៗថា ខ្លួននឹងបោះឆ្នោតប្រឆាំងនឹងសេចក្តីព្រាងរបស់ក្រុមប្រឹក្សាសន្តិសុខទេ ដោយគ្រាន់តែនិយាយថា ខ្លឹមសារក្នុងសេចក្តីព្រាងនេះ គឺជារឿង ដែលមិនអាចទទួលយកបាន។ ក៏ប៉ុន្តែ រុស្ស៊ីមានឆន្ទៈចង់ចរចា ដើម្បីសម្រួលពាក្យពេចន៍ក្នុងសេចក្តីព្រាងនេះ។
ក្នុងពេលជាមួយគ្នា រដ្ឋាភិបាលរុស្ស៊ីបានអញ្ជើញតំណាងរដ្ឋាភិបាលស៊ីរី និងតំណាងក្រុមប្រឆាំងឲ្យទៅរុស្ស៊ី ដើម្បីចរចាគ្នា ក្រោមការសម្របសម្រួលរបស់រុស្ស៊ី។ សំណើនេះបានទទួលនូវចម្លើយវិជ្ជមាន ពីសំណាក់រដ្ឋាភិបាលស៊ីរី។ ក៏ប៉ុន្តែ តំណាងក្រុមប្រឆាំងបានបដិសេធ ដោយលើកឡើងថា ដរាបណាលោកអាសាដ នៅកាន់តំណែង គេមិនអាចអង្គុយចរចាជាមួយអាជ្ញាធរស៊ីរីបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ