ម៉ូស្គូនឹងការពារស៊ីរីទៀតហើយ
គឺថ្ងៃសុក្រនេះនៅវេលាម៉ោង ១៥ម៉ោងក្រុង New York ដែលត្រូវនឹងម៉ោង៣ភ្លឺនៃថ្ងៃសោរ៍ស្អែកទៅហើយ ម៉ោងនៅភ្នំពេញ ដែលក្រុមប្រឹក្សាសន្តិសុខអ.ស.ប. នឹងពិភាក្សាទៅលើគម្រោងនៃសេចក្តីសម្រេចតាក់តែងឡើងដោយ”សម្ព័ន្ធអារ៉ាប” រួមជាមួយពួកបស្ចិមប្រទេស ឆ្ពោះទៅដោះស្រាយវិបត្តិរ៉ាំរ៉ៃនៅប្រទេសស៊ីរី។ ដោយហេតុថា ចំណុចមួយនៃគម្រោងនេះ តម្រូវឲ្យលោកប្រធានាធិបតីស៊ីរី Bashar al Assad ជាសម្ព័ន្ធមិត្តរុស្ស៊ីលាចេញពីតំណែង។ ទីក្រុងម៉ូស្គូច្បាស់ជានឹងប្រើសិទ្ធិ Veto ជំទាស់ មិនឲ្យអនុម័តកើតឡើយ។
ចុះផ្សាយនៅថ្ងៃ៖
ស្តាប់ - ០២:៣០
ជាបឋមគួររំលឹកថា កាលពីខែតុលាឆ្នាំទៅមិញ រុស្ស៊ីដោយរួមជាមួយចិន ក្នុងឋានៈជាប្រទេសសមាជិកអចិន្ត្រៃយ៍នៃក្រុមប្រឹក្សាសន្តិសុខអ.ស.ប. បំពាក់ដោយសិទ្ធិVeto បានប្រើសិទ្ធិនេះទៅហើយ ខ្ទប់មិនឲ្យចេញរួចទេគម្រោងនៃសេចក្តីសម្រេចដាក់ចេញដោយប្រទេសខាងលិច ពីព្រោះតាមយោបល់ម៉ូស្គូធាតុពិតនៃឯកសារនោះ នៅទីបំផុតទៅគឺសំដៅផ្តួលរបបគ្រប់គ្រងនៅស៊ីរីនៃលោកប្រធានាធិបតី Bashar al Assad។
ក្រោយមករុស្ស៊ីខ្លួនឯងផ្ទាល់បានដាក់ចេញនូវគម្រោងបែបនេះ របស់ខ្លួនផ្ទាល់អស់៣លើកប៉ុន្តែពុំបានទទួលការគាំទ្រពីបស្ចិមលោកទេ ក្រោមលេសថា គម្រោងរុស្ស៊ីធូររលុងពេក ឥតចែងអំពីការដាក់ទណ្ឌកម្មរបបលោកAssad ហើយមានន័យត្រឹមតែថ្កោលទោស ចំពោះអំពើហិង្សានៅស៊ីរីទៅលើភាគីបដិបក្ខទាំងពីរតែម្តងគឺទៅលើរបបលោកAssadផង និងទៅលើភាគីបះបោរផង ភាគីដែលទាមទារពីលោកAssad ឲ្យចុះចេញពីតំណែងទៅ។ ខ្លឹមសារសំណើរុស្ស៊ី គឺឆ្ពោះទៅអន្ទងគូភាគីនោះ ឲ្យដោះស្រាយវិបត្តិនៅស៊ីរីតាមផ្លូវចរចាក្នុងនាមផ្សះផ្សាជាតិ។
ដើម្បីបញ្ចុះបញ្ចូលម៉ូស្គូ ឲ្យគាំទ្រដល់គម្រោងអារ៉ាប់ លោកអគ្គលេខាធិការ”សម្ព័ន្ធអារ៉ាប” Nabil al-Arabi បានទូរសព្ទមកលោករដ្ឋមន្ត្រីការបរទេសរុស្ស៊ី Serguei Lavrov ដោយលាតត្រដាងថា គម្រោងដាក់ចេញដោយ”សម្ព័ន្ធអារ៉ាប” មានចំណុចច្រើន ដូចទស្សនៈយល់ឃើញរបស់រុស្ស៊ីអ៊ីចឹងបែបយ៉ាង ចាំបាច់ត្រូវតែដោះស្រាយបញ្ហាស៊ីរីដោយសន្តិវិធី ឈរលើការបញ្ឈប់រាល់អំពើហិង្សា ចាប់ផ្តើមឲ្យបានឆាប់ឡើងសំវាទរវាងគូភាគីបដិបក្ខនៅស៊ីរី ហាមមិនឲ្យមានអន្តរាគមន៍យោធាពីក្រៅឡើយ។
ប៉ុន្តែតាមព្យាករណ៏កាសែតមជ្ឈដ្ឋានBusinessរុស្ស៊ី ឈ្មោះKommersant លេខថ្ងៃនេះគ្រាន់តែចំណុចមួយនៃគម្រោងអារ៉ាប់ដាក់ចេញដោយរួមជាមួយប្រទេសខាងលិចដែលតម្រូវឲ្យលោកប្រធានាធិបតីស៊ីរី Assad ជាសម្ព័ន្ធមិត្តរុស្ស៊ី ផ្ទេរអំណាចទៅឲ្យអនុរបស់គាត់ដើម្បីបង្កើតឡើងជា”រដ្ឋាភិបាលឯកភាពជាតិអន្តរកាល” គឺវាគ្រប់គ្រាន់ទៅហើយ សម្រាប់រុស្ស៊ីប្រើជាថ្មី សិទ្ធិVeto របស់ខ្លួន។
ចំណែកកាសែតរដ្ឋាភិបាលរុស្ស៊ី ឈ្មោះ “Rossiskaya Gazeta” លេខថ្ងៃនេះ បំភ្លឺឲ្យដឹងអំពីមូលហេតុដែលញ៉ាំងឲ្យបស្ចិមលោក ខ្នក់ខ្នាញ់នឹងលោកប្រធានាធិបតីAssad គឺមកពីគាត់ស្និទនឹងរបបនៅអ៊ីរ៉ង់ ធ្វើនយោបាយឯករាជ្យម្ចាស់ការគាំទ្រប្តូរផ្តាច់ដល់ចលនាប៉ាឡេស្ទីន ហើយប្រាកដណាស់ជាសម្ព័ន្ធមិត្តរបស់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ