Amnesty International បរិហារពីការបណ្តេញចេញពីដីធ្លី ឬលំនៅដ្ឋានដោយប្រើអំពើហិង្សា
នៅថ្ងៃព្រហស្បតិ៍ ទី១១ តុលានេះ Amnesty International បានចេញផ្សាយរបាយការណ៍មួយស្តីពីការបណ្តេញមនុស្សចេញពីដីធ្លី ឬមួយពីលំនៅដ្ឋានដោយប្រើអំពើហិង្សា។ យោងតាម Amnesty International ការប្រើអំពើហិង្សាបណ្តេញមនុស្សចេញពីដីធ្លី ឬពីលំនៅដ្ឋាននៅក្នុងប្រទេសចិនមានការកើនឡើងគួរឲ្យព្រួយបារម្ភក្នុងរយៈពេលប៉ុន្មានឆ្នំាចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:០៤
យោងតាមអង្គការក្រៅរដ្ឋាភិបាល(ONG) នៅក្នុងរយៈពេល ២ឆ្នំាចុងក្រោយនេះ ចំនួនប្រជាពលរដ្ឋចិនដែលត្រូវបានគេបង្ខំឲ្យបោះបង់ចោលដីធ្លី ឬមួយលំនៅដ្ឋានរបស់ខ្លួនមានការកើនឡើងគួរឲ្យកត់សម្គាល់ គិតទំាងអ្នករស់ក្នុងទីក្រុង និងជនបទ។ ការបណ្តេញចេញដោយមានការប្រើអំពើហិង្សា ដូចយ៉ាងវាយតប់ ចាប់ញាត់គុក និងពេលខ្លះសម្លាប់ចោលតែម្តងនៅពេលណាដែលមានអ្នកណាម្នាក់ហ៊ានប្រឆំាង។ តាមការសិក្សាលើការបណ្តេញចំនួន ៤០ករណី ONG បានបញ្ជាក់បន្ថែមថា មានជនរងគ្រោះមួយចំនួនថែមទំាងព្យាយាមដុតខ្លួនឯងទៀតផង។
ផ្អែកតាមអង្គការក្រៅរដ្ឋាភិបាល គណបក្សកុម្មុយនិស្តកាន់អំណាចក្នុងប្រទេសចិនបាននិងកំពុងបន្តអនុវត្តនូវនយោបាយ សេដ្ឋកិច្ចមួយដោយទុកបណ្តាយឲ្យរដ្ឋអំណាចមូលដ្ឋានជាអ្នកស្វែងរកកំណើនសេដ្ឋកិច្ចឲ្យរដ្ឋ ដោយមិនបានកំណត់អំពីមធ្យោបាយដែលត្រូវធ្វើនោះទេ។ ដើម្បីអាចសម្រេចបាននូវទិសដៅរបស់បក្ស រដ្ឋអំណាចជាន់ក្រោមមិនញញើតនឹងរឹបអូសយកដីធ្លី ឬលំនៅដ្ឋានរបស់ប្រជាជនដើម្បីយកទៅសាងសង់ផ្លូវ និងរោងចក្រ សហគ្រាសទេ។ ម្យ៉ាងទៀត និងអ្វីដែលគួរឲ្យចាប់អារម្មណ៍នោះ រដ្ឋអំណាចថ្នាក់លើថែមទំាងជួយលើកទឹកចិត្ត និងផ្តល់ប័ណ្ណសរសើរឲ្យរដ្ឋអំណាចជាន់ក្រោមណាដែលសម្រេចបានទិសដៅរបស់រដ្ឋាភិបាលទៀតផង។
Amnesty International បានអំពាវនាវឲ្យរដ្ឋាភិបាលទីក្រុងប៉េកំាងបញ្ឈប់ជាបន្ទាន់នូវការបណ្តេញប្រជាពលដ្ឋចេញពីដីធ្លី ឬលំនៅដ្ឋាន ព្រមទំាងនយោបាយលើកទឹកចិត្តរដ្ឋអំណាចជាន់ក្រោមដែលជាអ្នកអនុវត្តផ្ទាល់។
នៅប្រទេសចិនសព្វថ្ងៃ ការរឹបអូសដីធ្លីរបស់ប្រជាជន គឺជាមូលហេតុចម្បងនៃការងើបបះបោររបស់ប្រជាជនប្រឆំាងនឹងរដ្ឋអំណាច។ ពេលខ្លះ ការប្រទូសរ៉ាយរវាងប្រជាពលរដ្ឋដែលរងការរឹបអូសដីធ្លី ឬលំនៅដ្ឋាន និងកម្លំាងរដ្ឋាភិបាលបានផ្ទុះឡើងយ៉ាងហិង្សាបំផុត។ កាលពីខែកញ្ញាកន្លងទៅ ជនជាតិចិនម្នាក់ដែលបានព្យាយាមដុតខ្លួនឯងដើម្បីប្រឆំាងនឹងការរឹបអូសយកដីធ្លីរបស់គាត់ត្រូវបានប៉ូលិសបាញ់សម្លាប់។ ជាទូទៅ ប្រជាពលរដ្ឋដែលរងការរឹបអូសដីធ្លី ឬលំនៅដ្ឋានបានទទួលប្រាក់សំណងតិចតួចបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ