សហរដ្ឋអាមេរិកដោះលែងអ្នកទោសចំនួន ៦ ពាន់នាក់
ចុះផ្សាយនៅថ្ងៃ៖
ស្តាប់ - ០៤:៣២
ចន្លោះពីថ្ងៃទី៣០ ខែតុលា ដល់ថ្ងៃទី២ ខែវិច្ឆិការនេះ ពោលគឺ រយៈពេលតែ ៤ ថ្ងៃប៉ុណ្ណោះ អ្នកទោសចំនួន ៦ ពាន់នាក់នៅសហរដ្ឋអាមេរិក ត្រូវបានដោះលែងអោយមានសេរីភាព។ ការដោះលែងទាំងហ្វូងបែបនេះ គឺធ្វើឡើងក្រោយពីរដ្ឋាភិបាលលោកអូបាម៉ា បានធ្វើកំណែទម្រង់ប្រព័ន្ធយុត្តិធម៌។ ជាពិសេស គឺវិសោធនកម្មច្បាប់ប្រឆាំងការជួញដូរគ្រឿងញៀន។ រដ្ឋាភិបាលអាមេរិកបានពន្យល់ថា ការផ្លាស់ប្តូរបែបនេះ ក៏ដោយសារតែចំនួនអ្នកទោសមានចំនួនលើសលុបនៅតាមពន្ធនាគារ។ ហើយ ការបន្ថយអ្នកទោសបែបនេះ អាចអនុញ្ញាតអោយរដ្ឋាភិបាលសន្សំសំចៃថវិការាប់ពាន់លានដុល្លារ។
ការដោះលែងក្នុងចំនួនដ៏ច្រើនមិនធ្លាប់មាន
៦ពាន់នាក់គឺ ជាចំនួនទណ្ឌិតដែលត្រូវបានដោះលែងកាលពីសប្តាហ៍មុន នៅសហរដ្ឋអាមេរិក។ នេះជាចំនួនទាំងក្រុមដ៏ច្រើនសន្ធឹកសន្ធាប់ ពុំដែលធ្លាប់មានក្នុងប្រវត្តិសាស្រ្តអាមេរិក។ ពន្ធនាគារទាំងអស់នៅគ្រប់បណ្តារដ្ឋសុទ្ធតែបានផ្តល់សេរីភាពអោយអ្នកទោស។ បើយោងតាមការផ្សាយរបស់កាសែតវ៉ាស៊ីងតោនប៉ុស្តិ៍ ក្នុងចំណោមអ្នកទោសទាំងនោះ មានមួយភាគបីជាជនបរទេស។
យោងតាមនីតិវិធី មុននឹងដោះលែងអោយមានសេរីភាពពេញលេញ អ្នកទោសម្នាក់ៗត្រូវបានបញ្ជូនទៅកាន់មណ្ឌលសមាហរណកម្មសង្គមជាមុនសិន ដើម្បីអាចសម្របខ្លួនសន្សឹមៗទៅក្នុងជីវិតសង្គមធម្មតា។ ចំពោះអ្នកទោសជាជនបរទេស គ្មានលិខិតស្នាក់នៅស្របច្បាប់លើទឹកដីអាមេរិក ពួកគេត្រូវបានបញ្ជូនទៅកាន់មណ្ឌលឃុំខ្លួនរដ្ឋបាលជាបណ្តោះអាសន្ន មុននឹងត្រូវបណ្តេញចេញជាស្ថាពរពីទឹកដីអាមេរិក។ សូមបញ្ជាក់ថា ក្នុងចំណោមទណ្ឌិតប្រុស ស្រី ចាស់ ក្មេង ដែលបានដោះលែងនោះ មានមួយចំនួនបានជាប់ឃុំឃាំងអស់រយៈពេលប្រហែលជិត ១០ ឆ្នាំ ឬលើសពីនេះទៅទៀត។ អ្នកខ្លះមានវ័យចំណាស់ទៅហើយ។ ភាគច្រើនសុទ្ធសឹងតែជាអ្នកទោសត្រូវបានចាប់ខ្លួនពីបទជួញដូរ ឬប្រើប្រាស់គ្រឿងញៀនក្នុងទ្រង់ទ្រាយតូចតាច កំប៉ិកកំប៉ុក។
ហេតុអ្វីបានជាអាមេរិកដោះលែងអ្នកទោសច្រើនបែបនេះ?
ការដោះលែងអ្នកទោសទាំងហ្វូងបែបនេះ គឺ ដោយសារមូលហេតុពីរ។ ទីមួយ គឺដោយសារចំនួនអ្នកទោសដ៏ច្រើនសន្ធឹកសន្ធាប់នៅតាមមន្ទីរពន្ធនាគារទូទាំងប្រទេស។ បើយោងតាមការសិក្សាស្រាវជ្រាវដោយអង្គការ Pew Research Center សហរដ្ឋអាមេរិកជាប់ចំណាត់លេខមួយលើលោក ដោយមានអ្នកទោសចំនួន ២,៣ លាននាក់ ស្មើនឹង២៥% នៃចំនួនអ្នកទោសសរុបលើពិភពលោក។ អ្នកទោសអាមេរិកស្បែកខ្មៅ និងអ្នកមានដើមកំណើតអាមេរិកឡាទីន និយាយភាសាអេស៉្បាញ មានរហូតទៅដល់ ៦០%។ ហើយ ក្នុងចំណោមមនុស្សធំពេញវ័យអាមេរិកចំនួន ១០០ នាក់ ក្នុងនោះមានមួយនាក់កំពុងជាប់ពន្ធនាគារ។ បច្ចុប្បន្ន មានក្មេងអាមេរិកមិនទាន់គ្រប់អាយុចំនួន ៧១ ០០០ នាក់ កំពុងចំណាយពេលក្នុងជីវិត ដើម្បីលាងជម្រះទោស។
មូលហេតុទីពីរ គឺរដ្ឋាភិបាលអាមេរិកចង់កាត់បន្ថយការចំណាយថវិកា នៅតាមពន្ធនាគារ។ ដោយសារចំនួនអ្នកទោសច្រើនលើសលប់បែបនេះ ជារៀងរាល់ឆ្នាំ រដ្ឋាភិបាលសហព័ន្ធអាមេរិក និងរដ្ឋាភិបាលតាមបណ្តារដ្ឋនានា បានចំណាយថវិកា រហូតទៅដល់ ៨០ ពាន់លានដុល្លារ។ ហើយជាមធ្យម រដ្ឋាភិបាលអាមេរិកចំណាយថវិការប្រមាណជាង ៣ ម៉ឺនដុល្លារ សំរាប់អ្នកទោសម្នាក់ ក្នុងមួយឆ្នាំ។ សំរាប់រដ្ឋខ្លះ ដូចជា៖ រដ្ឋ Connecticut រដ្ឋ Washington State និងរដ្ឋ New York ជាដើម ការចំណាយអាចកើនឡើងពី ៥ ម៉ឺនទៅដល់ ៦ ម៉ឺនដុល្លារ។
គំនិតផ្តួចផ្តើមរបស់លោកប្រធានាធិបតី បារ៉ាក់ អូបាម៉ា
ក្នុងរយៈពេលជាង ៣០ ឆ្នាំចុងក្រោយនេះ ចំនួនអ្នកទោសនៅសហរដ្ឋអាមេរិកបានកើនឡើងក្នុងកំរិតខ្ពស់បំផុត គឺរហូតដល់កំរិត ៨០០%។ កំណើននេះកើនឡើងហួសប្រមាណ ខណៈពេលដែលកំណើនប្រជាជនអាមេរិកមានតែ៣០% ប៉ុណ្ណោះក្នុងរយៈពេលដូចគ្នា។ កំណើនអ្នកទោសនេះទៀតសោតមិនមែនដោយសារតែការកើនឡើងចំនួនឧក្រិដ្ឋកម្មហឹង្សាធ្ងន់ធ្ងរទេ។ ផ្ទុយទៅវិញ គឺដោយសារតែបទល្មើសតូចតាច និងបទល្មើសជួញដូរគ្រឿងញៀន។
សូមបញ្ជាក់ថា នាដើមទសវត្សរ៍ទី ៨០ រដ្ឋាភិបាលអាមេរិកបានបើកសង្គ្រាមបង្រា្កបការជួញដូរគ្រឿងញៀន។ ច្បាប់ដ៏តឹងរ៉ឹងមួយត្រូវបានសភាទាំងពីរថ្នាក់អនុម័តកាលពីឆ្នាំ១៩៨៦ និង១៩៨៨។ ច្បាប់នេះបានបន្ថែមបទល្មើសចំនួនប្រមាណជាង ២ ពាន់ ចូលទៅក្នុងកំរិតទោសធ្ងន់ធ្ងរ។ បើតាមច្បាប់ប្រឆាំងគ្រឿងញៀននេះ រាល់បទល្មើសគ្រឿងញៀន តូចក្តី ធំក្តី ហឹង្សាឬអហឹង្សា ជនល្មើសត្រូវទទួលទោសធ្ងន់ធ្ងរតែម្តង។ ឧទាហរណ៍ ជនល្មើសណាមានគ្រឿងញៀន ៥ គីឡូក្រាម ជននោះត្រូវជាប់ទោសយ៉ាងហោចណាស់ ១០ ឆ្នាំ។
ដោយយល់ឃើញពីភាពតឹងរ៉ឹងបែបនេះ លោកប្រធានាធិបតី បារ៉ាក់ អូបាម៉ា បានសន្យាធ្វើកំណែទម្រង់ប្រព័ន្ធយុត្តិធម៌។ ច្បាប់ថ្មីមួយហៅថា ច្បាប់ SAFE (Safe, Accountable, Fair and Effective Justice Act) ត្រូវបានអនុម័តកាលពីថ្មីៗនេះ។ ក្នុងន័យការពារច្បាប់នេះ លោក អូបាម៉ា ធ្លាប់បានពន្យល់បកស្រាយថា ប្រព័ន្ធយុត្តិធម៌អាមេរិកមានបញ្ហាវិសមាមាត្រ គឺភាពមិនស៊ីសង្វាក់គ្នារវាងទំហំបទល្មើស និងស្ថានទំងន់ទោស ជាពិសេសករណីជួញដូរគ្រឿងញៀននេះតែម្តង។
កាលពីខែកក្កដា ឆ្នាំ២០១៥ កន្លងមកនេះ លោកប្រធានាធិបតី បារ៉ាក់ អូបាម៉ា បានអញ្ជើញទៅទស្សនកិច្ចនៅមន្ទីរឃុំឃាំង El Reno ក្នុងរដ្ឋ Olkahoma ដោយផ្ទាល់ភែ្នក។ នេះជាលើកតំបូងបង្អស់ក្នុងប្រវត្តិសាស្រ្តអាមេរិក ដែលប្រធានាធិបតីក្នុងអាណត្តិ ចុះទៅពិនិត្យមើលស្ថានភាពជាក់ស្តែងនៅពន្ធនាគារ។ លើសពីនេះ ក្នុងខែកក្កដាដដែល លោក បារ៉ាក អូបាម៉ា បានសំរេចលើកលែងទោសដល់ទណ្ឌិតចំនួន ៤៦ នាក់។ ភាគច្រើននៃទណ្ឌិតទាំងនោះត្រូវគេយល់ថានឹងមិនបង្កបទល្មើសទៀតទេ។
តើការដោះលែងនេះអនុវត្តលើអ្នកទោសប្រភេទណា?
មុននឹងសំរេចដោះលែង ៦ ពាន់នាក់នេះ ក្រសួងយុត្តិធម៌អាមេរិកបានប្រគល់ភារកិច្ចទៅអោយគណៈកម្មការជាតិសិក្សាស្ថានទម្ងន់ទោស។ ក្រុមអ្នកជំនាញរបស់គណៈកម្មការសំរេចបន្ធូរបន្ថយទោស ឬដោះលែងតែ អ្នកទោសណា ដែលបានជាប់ចោទពីបទជួញដូរគ្រឿងញៀន ក្នុងទ្រង់ទ្រាយតូចតាច។ អ្នកទាំងនោះសុទ្ធតែបានចំណាយពេលក្នុងពន្ធនាគារ ជាងពាក់កណ្តាលនៃទោសសរុបរបស់ពួកគេ។
លក្ខខណ្ឌដោះលែងនោះក៏ផ្តោតលើទណ្ឌិតណា ដែលពុំបានប្រើអំពើហឹង្សាពេលចាប់ខ្លួន ពុំបានលក់គ្រឿងញៀនដល់កុមារ ពុំមានកាំភ្លើងជាប់ខ្លួនពេលប្រព្រឹត្តបទល្មើស ពុំមានជាប់ពាក់ព័ន្ធជាមួយក្រុមបងធំ ឬក្រុមឧក្រិដ្ឋជនណាមួយ។ ជាពិសេស ពុំធ្លាប់បានប្រព្រឹត្តបទល្មើសធ្ងន់ធ្ងរកាលពីអតីតកាល។ បើតាមការគ្រោងទុក មានអ្នកទោសជាង ៨ ពាន់ផ្សេងទៀតនឹងត្រូវដោះលែងអោយមានសេរីភាព នាឆ្នាំក្រោយនេះ។ សំរាប់រយៈពេលវែង គណៈកម្មការជាតិសិក្សាស្ថានទម្ងន់ទោសអាមេរិកគ្រោងនឹងសិក្សាលើសំណុំររឿងអ្នកទោសប្រមាណ ៤៦ ០០០ នាក់ផ្សេងទៀត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ