ចំនួននិស្សិតបរទេសចុះឈ្មោះចូលរៀននៅសហរដ្ឋអាមេរិកកំពុងធ្លាក់ចុះ
ចុះផ្សាយនៅថ្ងៃ៖
ស្តាប់ - ០៤:១៤
ចំនួនសិស្ស-និសិ្សតបរទេសដាក់ពាក្យសុំចុះឈ្មោះមករៀននៅសហរដ្ឋអាមេរិកបានធ្លាក់ចុះសំរាប់ឆ្នាំ២០១៧។ នេះជាលទ្ធផលនៃការសិក្សាស្រាជ្រាវរបស់វិទ្យាស្ថានសិក្សាអន្តរជាតិ (Institute of International Education)។ គេកំពុងបារម្ភខ្លាចការធ្លាក់ចុះចំនួនសិស្សបរទេសនេះអាចធ្វើឲ្យស្ថានអប់រំអាមេរិកបាត់បង់ចំណូលថវិកាមួយផែ្នក។ តើមានមូលហេតុអ្វីខ្លះស្ថិតនៅពីក្រោយការធ្លាក់ចុះនេះ?
នេះជាលើកទីមួយក្នុងរយៈពេល ១២ ឆ្នាំចុងក្រោយនេះ ដែលចំនួនការចុះឈ្មោះសិក្សារបស់សិស្ស-និស្សិតបរទេសនៅសហរដ្ឋអាមេរិកបានធ្លាក់ចុះ។ ការកត់សំគាល់នេះ គឺមាននៅរបាយការណ៍នៃការសិក្សាស្រាវជ្រាវប្រចាំឆ្នាំមួយក្រោមឈ្មោះថា Open Doors។ របាយការណ៍នេះត្រូវបានផ្សព្វផ្សាយកាលពីថ្ងៃច័ន្ទ ទី១៣ វិច្ឆិការកន្លងទៅនេះ។ ហើយការសិក្សាស្រាវជ្រាវនេះត្រូវបានរៀបចំដោយវិទ្យាស្ថានសិក្សាអន្តរជាតិ (Institute of International Education)។ ការសិក្សាស្រាវជ្រាវនេះបានផ្តោតលើឆ្នាំសិក្សា២០១៦-២០១៧។
មានគ្រឹះស្ថានអប់រំសិក្សាអាមេរិកចំនួន ៣ ពាន់ស្ថាប័នបានចូលរួមឆ្លើយតបនឹងសំណួរនៅក្នុងការស្រាវជ្រាវនេះ។ សំរាប់ឆ្នាំសិក្សា២០១៦-២០១៧ ការស្រាវជ្រាវនេះបានបង្ហាញឲ្យដឹងថា ស្ថាប័នអប់រំអាមេរិកទាំងអស់បានទទួល សិស្ស-និស្សិតបរទេសឲ្យមកចូលសិក្សាឆ្នាំតំបូងចំនួន ២៩១ ០០០ នាក់។ ចំនួន គឺ ធ្លាក់ចុះ ៣% ស្មើនឹងចំនួនសិស្ស-និស្សិត ១ ម៉ឺននាក់ បើប្រៀបធៀបនឹងការឆ្នាំសិក្សាឆ្នាំកន្លងទៅ។
ក្នុងចំណោមគ្រឹះស្ថានសិក្សាដែលបានចូលរួមឆ្លើយសំណួរស្ទង់មតិ ៤៥% នៃស្ថាប័នទាំងនោះបានរាយការណ៍ថា តួលេខនៃការចុះឈ្មោះសិស្សបរទេសសំរាប់ការសិក្សាឆ្នាំទីមួយពិតជាបានធ្លាក់ចុះ។ ហើយស្ថាប័ន ២០% ទៀតបានកត់សំគាល់ថា សិស្ស-និសិ្សតមួយចំនួន ដែលកំពុងរៀននៅគ្រឹះស្ថានសិក្សារបស់ខ្លួនបានសំរេចឈប់រៀនហើយចាកចេញពីទឹកដីសហរដ្ឋអាមេរិក។ មានហេតុផលជាច្រើនជុំវិញការធ្លាក់ចុះចំនួនសិស្ស-និស្សិតបរទេសធ្វើដំណើរមកសិក្សានៅសហរដ្ឋអាមេរិក។ បើតាមលោក Philip Altbach នាយកមជ្ឈមណ្ឌលសំរាប់ការសិក្សាជាន់ខ្ពស់ប្រចាំ Boston College បានពន្យល់ថា វិធានការណ៍ប្រឆាំងជនអន្តោប្រវេសន៍របស់លោកប្រធានាធិបតី ដូណាល់ ត្រាំ ទំនងជាធ្វើឲ្យសិស្ស-និសិ្សតបរទេសរួញរាពុំហ៊ានដាក់ពាក្យសុំចុះឈ្មោះចូលរៀននៅតាមស្ថានប័នសិក្សាអាមេរិក។
សូមបញ្ជាក់ថា លោកប្រធានាធិបតី ដូណាល់ ត្រាំ បានព្យាយាមម្តងហើយម្តងទៀតហាមឃាត់មិនឲ្យអ្នកកាន់សាសនាឥស្លាមជាន់ជើងចូលទឹកដីសហរដ្ឋអាមេរិក។ ការរឹតបន្តឹងនយោបាយអន្តោប្រវេសន៍បែបនេះធ្វើឲ្យសិស្ស-និសិ្សត និងក្រុមគ្រួសាររបស់ពួកគេមានបញ្ហាលំបាកក្នុងការទទួលបានទិដ្ឋាការចូលសហរដ្ឋអាមេរិក។ ម៉្យាងទៀត អំពើហឹង្សារើសអើងពូជាសាសន៍មួយចំនួននៅតាមសាកលវិទ្យាល័យក៏បានធ្វើឲ្យសិស្សបរទេសភ័យខ្លាចមិនហ៊ានមកសិក្សានៅសហរដ្ឋអាមេរិកផងដែរ។
ប៉ុន្តែ ការធ្លាក់ចុះនេះក៏មិនមែនតែដោយសារតែនយោបាយអន្តប្រវេសន៍ដ៏ចម្រូងចម្រាសរបស់លោកប្រធានាធិបតី ដូណាល់ ត្រាំ តែមួយមុខឡើយ។ តាមពិតទៅ ការធ្លាក់ចុះនេះ គឺបានកើតឡើងមុនពេលលោក ត្រាំ ត្រូវបានជាប់ឆ្នោតជាប្រធានាធិបតីអាមេរិកទៅទៀត។ បាតុភូតនេះទំនងជាអាចបណ្តាលមកពីកត្តាចំនួនបី។ ទីមួយ គឺតម្លៃសិក្សានៅតាមស្ថាប័នអប់រំអាមេរិកបានឡើងខ្ពស់ជាហេតុធ្វើឲ្យសិស្ស-និសិ្សតបរទេសទាំងនោះគ្មានលទ្ធភាពអាចទ្រទ្រង់បាន។ ទីពីរ គឺមានការប្រកួតប្រជែងគុណភាពអប់រំកាន់តែខ្លាំងឡើងនៅតាមប្រទេសដ៏ទៃទៀត។ និយាយរួម ប្រទេសដែលផ្តល់ការអប់រំជាភាសាអង់គ្លេស ហើយមានគុណភាពអប់រំប្រហាក់ប្រហែលអាមេរិកអាចឆ្លៀតឱកាសស្រូបយកនិសិ្សតទាំងនោះឲ្យមកសិក្សានៅប្រទេសខ្លួន។ មានជាអាទិដូចជា ប្រទេសអូស្រ្តាលី និង កាណាដា ជាដើម។ ចំណែកកត្តាទីបី គឺដោយសារតែរដ្ឋាភិបាលអាមេរិកកាត់បន្ថយអាហាររូបករណ៍ដល់សិស្សបរទេស។
លោកស្រី Rajika Bhandari នាយិកាផែ្នកស្រាវជ្រាវនៃវិទ្យាស្ថានសិក្សាអន្តរជាតិបានធ្វើអត្ថាធិប្បាយថា នេះមិនមែនជាការធ្លាក់ចុះដ៏គួរឲ្យព្រួយបារម្ភឡើយ។ ហើយនេះក៏មិនមែនជាវិបត្តិធ្ងន់ធ្ងរឡើយ។ ប៉ុន្តែ នេះជាសញ្ញាប្រកាសអាសន្នមួយ។ បើយោងតាមរបាយការណ៍សិក្សាស្រាវជ្រាវនេះបានឲ្យដឹងថា សព្វថ្ងៃនេះ មានសិស្ស-និស្សិតបរទេសសរុបចំនួន ១ លាន ៨ ម៉ឺននាក់កំពុងសិក្សានៅលើទឹកដីអាមេរិក។ ចំនួននេះ គឺជាបូកបញ្ជូលគ្នារវាងចំនួនសិស្ស-និសិ្សត ដែលកំពុងតែបន្តការសិក្សា និងចំនួនចុះឈ្មោះថ្មីសំរាប់ឆ្នាំសិក្សា ២០១៧ នេះ។
នៅលើតារាងតួលេខ គេឃើញថា សិស្ស-និសិត្សមកពីប្រទេសចិនមានចំនួនច្រើនលើសលប់ជាងគេ ពោល គឺរហូតទៅដល់ជាង ៣៥ ម៉ឺននាក់។ បន្ទាប់គឺជនជាតិឥណ្ឌា ដែលមានចំនួនជិត ២០ ម៉ឺននាក់។ បន្ទាប់មក គឺមានសិស្ស-និសិត្សមកពីប្រទេសកូរ៉េខាងត្បូង អារ៉ាប៊ីសាអ៊ូឌីត កាណាដា វៀតណាម តៃវ៉ាន់ ជប៉ុន ម៉ិចសិក និងប្រេស៊ីល។
ដោយឡែក សិស្ស-និសិ្សតអាមេរិកកាន់តែច្រើនកំពុងតែចាកចេញទៅសិក្សានៅបរទេស។ ទ្វីបអឺរ៉ុបជាគោលដៅទាក់ទាញសិស្ស-និសិ្សតអាមេរិកកាន់តែច្រើន។ កាលពីឆ្នាំ២០១៦កន្លងទៅនេះ មានយុវជន-យុវនារីអាមេរិកចំនួន ៣២៥ ០០០ នាក់បានចេញទៅសិក្សានៅទ្វីបអឺរ៉ុប។ សហរាជាណាចក្រអង់គ្លេស អ៊ីតាលី អេស៉្បាញ និងបារាំងសុទ្ធសឹងតែជាប្រទេសពេញនិយមពីសំណាក់សិស្ស-និសិ្សតជនជាតិអាមេរិក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ