សហរដ្ឋអាមេរិកទាមទារឲ្យក្រុមហ៊ុនអាកាសចរណ៍ចាត់វិធានការណ៍សន្តិសុខបន្ថែមទៀត
ចុះផ្សាយនៅថ្ងៃ៖
ស្តាប់ - ០៣:៥៩
ចាប់ពីសប្តាហ៍នេះតទៅ បណ្តាក្រុមហ៊ុនអាកាសចរណ៍ ដែលភ្ជាប់ជើងហោះហើរត្រង់ឆ្ពោះទៅកាន់សហរដ្ឋអាមេរិកនឹងអនុវត្តវិធានការណ៍សន្តិសុខថ្មី ស្របតាមការទាមទារពីសំណាក់រដ្ឋាភិបាលអាមេរិក។ វិធានការណ៍ថ្មីនេះ គឺការតំរូវឲ្យអ្នកដំណើរម្នាក់ៗឆ្លើយនឹងកម្រងសំណួរពាក់ព័ន្ធនឹងសុវត្ថិភាព។ រាល់អ្នកដំណើរទាំងអស់ចាំបាច់ត្រូវតែឆ្លើយនឹងសំណួរទាំងនោះមុននឹងជាន់ជើងឡើងលើយន្តហោះ។ ទាក់ទងនឹងវិធានការណ៍នេះ ក្រុមហ៊ុនអាកាសចរណ៍និមួយៗមាននិតិវិធីអនុវត្តន៍ខុសៗគ្នា។
វិធានការណ៍សន្តិសុខថ្មីនឹងចាប់ផ្តើមអនុវត្តចាប់ពីសប្តាហ៍នេះ ចំពោះរាល់អ្នកធ្វើដំណើរតាមយន្តហោះមកកាន់សហរដ្ឋអាមេរិក។ សេចក្តីសំរេចនេះត្រូវបានធ្វើឡើងដោយទីភ្នាក់ងារជាតិគ្រប់គ្រងសន្តិសុខដឹកជញ្ជូនអាមេរិក (Transportation Security Administration, TSA) កាលពីថ្ងៃព្រហស្បត្តិ ទី២៦ ខែតុលាកន្លងទៅនេះ។ តាមរយៈសេចក្តីសំរេចនេះ អាជ្ញាធរអាមេរិកបានស្នើទាមទារសុំឲ្យក្រុមអាកាសចរណ៍ទាំងអស់ចាំបាច់ត្រូវតែរឹតបន្តឹងសន្តិសុខបន្ថែមទៀត មុននឹងអនុញ្ញាតឲ្យអ្នកដំណើរណាម្នាក់ឡើងជិះយន្តហោះមកកាន់សហរដ្ឋអាមេរិក។
វិធានការណ៍នេះនឹងអនុវត្តចំពោះតែក្រុមហ៊ុនអាកាចរណ៍ណា ដែលមានជើងហោះហើរត្រង់ឆ្ពោះទៅកាន់សហរដ្ឋអាមេរិកតែប៉ុណ្ណោះ។ ក្រោយពីវិធានការណ៍នេះបានចូលជាធរមាន ក្រុមអាកាសចរណ៍ធំៗ តួយ៉ាងដូចជា Air France, Lufthansa, Norwegian, Cathay Pacific, EgyptAir, Fly Emirates និង Jordanian ជាដើម សុទ្ធតែបានចេញសេចក្តីប្រកាសព័ត៌មានផ្សព្វផ្សាយដល់អតិថិជនរបស់ខ្លួន។ ដើម្បីចៀសវាងកុំឲ្យមានភាពរំជើបរំជួល ក្រុមហ៊ុនអាកាសចរណ៍ទាំងអស់សុទ្ធតែបានបញ្ជាក់ថា ការអនុវត្តន៍វិធានការណ៍នេះ គឺស្របទៅការទាមទាររបស់រដ្ឋាភិបាលអាមេរិកតែប៉ុណ្ណោះ។
ក្រុមហ៊ុន Air France បានបញ្ជាក់ថា ក្រុមហ៊ុនខ្លួននឹងបង្កើតបញ្ជីសំណួរមួយ ដើម្បីសម្ភាសសួរនាំបន្ថែមដល់អ្នកដំណើរ។ មុននឹងឡើងយន្តហោះ បុគ្គលិកក្រុមហ៊ុន Air France នឹងចែកកម្រងសំណួរមួយ ដើម្បីឲ្យអ្នកដំណើរបំពេញ។ ហើយបុគ្គលិកនៅកន្លែងចុះឈ្មោះ និងឥវ៉ាន់ គឺជាអ្នកសួរនាំអ្នកដំណើរម្នាក់ៗ។ ក្រុមហ៊ុន Air France គ្រាន់តែប្រាប់ថា សំណួរទាំងនោះ គឺពាក់ព័ន្ធនឹងសុវត្ថិភាព។ ប៉ុន្តែ មកដល់ពេលនេះ គេនៅមិនទាន់ដឹងពីភាពលំអិតនៃសំណួរទាំងនោះឡើយ។
ចំណែកក្រុមហ៊ុនអាកាសចរណ៍ Norwegian ក៏បានប្រកាសផងដែរថា ក្រុមហ៊ុននឹងផ្ញើរ SMS ទៅកាន់ទូរស័ព្ទដៃរបស់អ្នកដំណើរ។ ហើយទីកន្លែងចុះឈ្មោះ និងឥវ៉ាន់អ្នកដំណើរនៅព្រលានយន្តហោះនឹងត្រូវបើក ៤ ម៉ោងមុនពេលយន្តហោះចេញដំណើរ។ តាមរយៈនេះ អ្នកដំណើរអាចមានពេលគ្រប់គ្រាន់ក្នុងការដាក់ថ្លឹងឥវ៉ាន់ផង និងចំណាយពេលវេលាបំពេញកម្រងសំណួរសុវត្ថិភាពផង។
ចំពោះក្រុមហ៊ុនអាកាចរណ៍ Fly Emirates វិញ ក្រុមហ៊ុននេះគ្រោងនឹងសួរសំណួរផ្ទាល់មាត់តែម្តងនៅកន្លែងចុះឈ្មោះ និងផ្ញើឥវ៉ាន់។ រីឯក្រុមហ៊ុន Cathay Pacific វិញបានប្រកាសថា សំរាប់អ្នកធ្វើដំណើរទៅសហរដ្ឋអាមេរិកតាមជើងយន្តហោះរបស់ខ្លួន ក្រុមហ៊ុននឹងលែងអនុញ្ញាតឲ្យអ្នកដំណើរចុះឈ្មោះផ្ញើឥវ៉ាន់ពីផ្ទះ ឬពីទីកន្លែងផ្សេងទៀតហើយ។ មានតែព្រលានយន្តហោះប៉ុណ្ណោះ គឺជាកន្លែងផ្ញើវ៉ាលីសបិទជិត។ សូមបញ្ជាក់ថា កន្លងមកក្រុមហ៊ុន Cathay Pacific ផ្តល់សេវាកម្មពិសេសមួយ ដោយអនុញ្ញាតឲ្យអ្នកដំណើរចុះឈ្មោះ និងផ្ញើឥវ៉ាន់ ឬវ៉ាលីសបិទជិតឲ្យហើយ ដោយពុំចាំបាច់រង់ចាំធ្វើនៅព្រលានយន្តហោះឡើយ។ ទាក់ទងនឹងវិធានការណ៍ថ្មីបស់អាជ្ញាធរអាមេរិកវិញ ក្រុមហ៊ុន Cathay Pacific គ្រោងនឹងសួរសំណួរសុវិត្ថិភាពទៅកាន់អ្នកដំណើរនៅបន្ទប់រង់ចាំមុនឡើងយន្តហោះ។
តាមរយៈវិធានការណ៍ថ្មីនេះ គ្រប់ក្រុមហ៊ុនអាកាសចរណ៍ទាំងអស់បានឲ្យអ្នកដំណើរទាំងអស់ត្រូវមកដល់ព្រលានយន្តហោះឲ្យបានមុនម៉ោង។ ពោល គឺឲ្យបានច្រើនម៉ោងលើសពីពេលធម្មតា។ ក្រៅពីបញ្ជីសំណួរដល់អ្នកដំណើរ អាជ្ញាធរអាមេរិកក៏បង្គាប់ឲ្យក្រុមហ៊ុនអាកាសចរណ៍ទាំងអស់ត្រូវផ្តល់ព័ត៌មានសុវត្តិភាពបន្ថែមទៀត ក្នុងនោះមានដូចជា៖ ស្ថានភាពយន្តហោះ ស្ថានភាពកាប៊ីនដាក់ឥវ៉ាន់ជាប់ខ្លួនរបស់អ្នកដំណើរ និងស្ថានភាពពោះផែ្នកខាងក្រោមយន្តហោះសំរាប់ផ្ទុកវ៉ាលីសបិទជិតរបស់អ្នកដំណើរ។ ក្រុមហ៊ុនអាកាសចរណ៍ត្រូវផ្តល់ព័ត៌មានទាំងនេះដល់អាជ្ញាធរអាមេរិកមុននឹងអនុញ្ញាតឲ្យយន្តហោះចេញដំណើរ។
សូមរំលឹកផងដែរថា វិធានការណ៍សន្តិសុខថ្មីនេះ គឺបន្ថែមពីលើសេចក្តីសំរេចមួយ ដែលរដ្ឋាភិបាលអាមេរិកបានបង្គាប់ឲ្យអនុវត្តកាលពីប៉ុន្មានខែមុននេះ។ វិធានការណ៍នោះ គឺហាមឃាត់មិនឲ្យអ្នកធ្វើដំណើរយកឧបករណ៍អេឡិចត្រូនិចតាមខ្លួន ក្រៅពីទូរស័ព្ទដៃតែប៉ុណ្ណោះ។ គ្រឿងអេឡិចត្រូនិចដែលហាមឃាត់ និងមានទំហំធំជាងទូរស័ព្ទដៃមានដូចជា៖ កុំព្យូទ័រយួរដៃ ថាបឡែត ម៉ាស៊ីនថតរូប ក្តារអានសៀវភៅអេឡិចត្រូនិច ឧបករណ៍លេងហ្គេមតាមខ្លួន និងឧបករណ៍ចាក់ឌីវីឌីតាមខ្លួនជាដើម។ ឧបករណ៍ហាមឃាត់ទាំងនោះតម្រូវឲ្យដាក់នៅក្នុងវ៉ាលីសបិទជិត ដើម្បីទុកនៅបាតយន្តហោះ។ បំរាមពិសេសនេះ គឺពាក់ព័ន្ធនឹងការហោះហើរចេញមកពីអាកាសយានដ្ឋានចំនួន ១០ នៃប្រទេសចំនួន ៩។ ក្នុងនោះមានដូចជា៖ ហ្សកដានី អេហ្សីប តួកគី អារ៉ាប៊ីសាអ៊ូឌីត កូវ៉ែត កាតា សហភាពអារ៉ាប់រួម និងម៉ារ៉ុក។
រដ្ឋាភិបាលអាមេរិកតាមរយៈសេតវិមានបានអះអាងថា សេចក្តីសំរេចទាំងប៉ុន្មាន នេះ គឺក្នុងគោលបំណងទប់ស្កាត់សកម្មភាពភេរវកម្មណាមួយ ដែលអាចកើតឡើងជាយថាហេតុនៅលើទឹកដីអាមេរិក។ ទន្ទឹមគ្នានេះផងដែរ សំលេងតវ៉ាប្រឆាំងពីសំណាក់មជ្ឈដ្ឋាននានាក៏កំពុងតែពុះកញ្ជ្រោលផងដែរ។ ក្រុមអ្នកតវ៉ាចាត់ទុកវិធានការណ៍សន្តិសុខរបស់រដ្ឋាភិបាលអាមេរិកថាជាទង្វើរើសអើងប្រឆាំងពូជសាសន៍។ ជាពិសេស គឺប្រឆាំងអ្នកកាន់សាសនាឥស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ