តើ «Super Tuesday» មានសារៈសំខាន់បែបណាក្នុងការបោះឆ្នោតនៅអាមេរិក?
ចុះផ្សាយនៅថ្ងៃ៖
ស្តាប់ - ០៣:៤៩
ការបោះឆ្នោតជ្រើសរើសបេក្ខជនតំណាងគណបក្សគឺ ជាដំណើរផ្លូវដ៏វែងឆ្ងាយសំរាប់អ្នកនយោបាយអាមេរិក។ ដំណើរការបោះឆ្នោតនេះបានចាប់ផ្តើមឡើងតាំងពីដើមខែកុម្ភៈមកម្ល៉េះ ហើយវានឹងត្រូវបញ្ចប់នៅខែមិថុនា។ គិតមកដល់ពេលនេះ មានរដ្ឋចំនួនបួនហើយដែលបានបោះឆ្នោត។ «Super Tuesday» ឬ «ថ្ងៃអង្គារអស្ចារ្យ» នឹងចាប់ផ្តើមនៅថ្ងៃអង្គារ ទី១ ខែមិនានេះហើយ! នេះគឺជាព្រឹត្តិការណ៍ពិសេស ខណៈពេលដែលបណ្តារដ្ឋជាច្រើនបោះឆ្នោតក្នុងពេលតែមួយ។ សំរាប់បេក្ខជនទាំងអស់ ទោះបីនៅខាងគណបក្សប្រជាធិបតេយ្យ ឬគណបក្សសាធារណរដ្ឋ «ថ្ងៃអង្គារអស្ចារ្យ» គឺជាដំណាក់កាលសំខាន់ ដែលអាចកំណត់ជោគវាសនារបស់ពួកគេក្នុងដំណើរការប្រកួតប្រជែងក្នុងបក្ស។
ការបោះឆ្នោតជ្រើសរើសបេក្ខជនតំណាងគណបក្សនៅសហរដ្ឋអាមេរិកកំពុងស្ថិតក្នុងដំណាក់កាលសំខាន់ហើយ! ក្រោយពីរដ្ឋចំនួនបួន ដូចជារដ្ឋ Iowa, New Hamsphire, Nevada និង South Carolina បានបោះឆ្នោតជាបន្តបន្ទាប់គ្នាមក ឥឡូវនេះរដ្ឋចំនួន១១នឹងរៀបចំការបោះឆ្នោតព្រមគ្នាក្នុងថ្ងៃតែមួយតែម្តង។ ព្រឹត្តិការណ៍ដ៏ពិសេស និងគួរអោយជក់ចិត្តនេះត្រូវបានគេហៅថា«ថ្ងៃអង្គារអស្ចារ្យ» ឬ«Super Tuesday»។
ព្រឹត្តិការណ៍នេះនឹងប្រព្រឹត្តទៅនាថ្ងៃអង្គារស្អែកនេះ គឺថ្ងៃអង្គារ ទី១ មិនា។ ដូចយើងបានដឹងរួចមកហើយ មានតែគណបក្សធំចំនួនពីរប៉ុណ្ណោះ គឺគណបក្សប្រជាធិបតេយ្យ និងគណបក្សសាធារណរដ្ឋ ដែលរៀបចំការបោះឆ្នោតជ្រើសរើសបេក្ខជនតំណាងអោយបក្សរបស់ខ្លួន។
តើ«ថ្ងៃអង្គារអស្ចារ្យ»ចាប់កំណើតពេលណា?
ព្រឹត្តិការណ៍«ថ្ងៃអង្គារអស្ចារ្យ»នេះត្រូវបានបង្កើតឡើងកាលពីឆ្នាំ១៩៨៨ ខណៈពេលដែលបណ្តារដ្ឋជាច្រើននៅភាគខាងត្បូងសហរដ្ឋអាមេរិកបានសំរេចចិត្តរៀបចំការបោះឆ្នោតព្រមគ្នាតែម្តង។ មូលហេតុដែលគេធ្វើបែបនេះ គឺដើម្បីចង់ផ្តល់សន្ទុះបន្ថែមទៀតដល់បេក្ខជនម្នាក់ៗ ក្នុងដំណើរការឃោសនារបស់ពួកគេ។ ជាពិសេសទៅទៀតនោះគឺ គេអាចសំរាំងយកបេក្ខជនដែលមានសំលេងគាំទ្រប្រគៀកគ្នា។ ពេលខ្លះ បេក្ខជនដែលពុំសូវមានសំឡេងគាំទ្រអាចលើកទង់ជ័យ-សបោះបង់ចោលការប្រកួតតែម្តង។ ចាប់តាំងពីពេលនោះមក ប្រពៃណី«ថ្ងៃអង្គារអស្ចារ្យ»នេះត្រូវបានបង្កើតឡើងនិងយកទៅអនុវត្ត នៅក្នុងការបោះឆ្នោតជ្រើសរើសតំណាងបក្សនាឆ្នាំបន្តបន្ទាប់។
តើ«ថ្ងៃអង្គារអស្ចារ្យ»នេះមានសារៈសំខាន់បែបណា?
រាល់ពេលបោះឆ្នោតបួនឆ្នាំម្តង ចំនួនរដ្ឋចូលរួមក្នុងព្រឹត្តិការណ៍នេះតែងតែប្រែប្រួលជានិច្ច។ សំរាប់ឆ្នាំ២០១៦នេះ មានរដ្ឋចំនួន១១នឹងរៀបចំបោះឆ្នោតក្នុងពេលតែមួយ។ ហើយចំនួនប្រតិភូនៃរដ្ឋទាំង១១នោះស្មើនឹង ១១% នៃចំនួនប្រតិភូសរុបទូទាំងប្រទេស សំរាប់គណបក្សនិមួយៗ។ សូមបញ្ជាក់ថា ការបោះឆ្នោតក្នុងខែកុម្ភៈនេះនៅរដ្ឋចំនួនបួន គឺហាក់ដូចជាការធ្វើតេស្តសាកល្បងសំរាប់បេក្ខជនម្នាក់ៗ។ ព្រោះចំនួនប្រតិភូសរុបនៃរដ្ឋទាំងបួននោះមានប្រហែលតែ ៥% ប៉ុណ្ណោះ។ ដូចនេះ វាជាដំណាក់កាលសំខាន់សំរាប់បេក្ខជនម្នាក់ៗ ដែលត្រូវចាប់យកឱកាសនេះ។
ប៉ុន្តែសូមកុំភ្លេចថា បេក្ខជនណាដែលបានទទួលបានប្រតិភូច្រើនជាងគេ ឬឈ្នះនៅថ្ងៃអង្គារនេះ មិនប្រាកដថាអាចក្លាយជាបេក្ខជនតំណាងបក្សរបស់ខ្លួនជាស្វ័យប្រវត្តិឡើយ។ ព្រោះដំណើរការបោះឆ្នោតចំរាញ់យកបេក្ខជនតំណាងបក្សនៅវែងឆ្ងាយទៀត។ ក្រៅពីថ្ងៃអង្គារ ទី១ មិនានេះ ក៏នៅមានថ្ងៃអង្គារ ទី១៥ មិនា និងទី២៦ មេសាផងដែរ ដែលគេចាត់ជា«ថ្ងៃអង្គារអស្ចារ្យ»។ នៅពេលនោះ បណ្តារដ្ឋធំៗដែលមានចំនួនប្រតិភូច្រើនជាងនេះនឹងរៀបចំបោះឆ្នោតក្នុងថ្ងៃតែមួយ។
ដើម្បីរក្សាក្តីសង្ឃឹមអាចឈ្នះការតែងតាំងបេក្ខជនផ្លូវការប្រចាំបក្ស ចង់មិនចង់ រាល់បេក្ខជនទាំងអស់ក៏ត្រូវការឈ្នះក្នុង«ថ្ងៃអង្គារអស្ចារ្យ»នេះផងដែរ ។ សូមរំលឹកថា នេះគឺយុទ្ធនាការបោះឆ្នោតជ្រើសរើសបេក្ខជនប្រចាំបក្ស។ គណបក្សនិមួយៗត្រូវសំរាំងយកតែបេក្ខជនម្នាក់គត់ តំណាងអោយគណបក្សរបស់ខ្លួន ដើម្បីយកទៅប្រកួតប្រជែងការបោះឆ្នោតប្រធានាធីបតីអាមេរិក នាថ្ងៃទី៨ ខែវិច្ឆិការខាងមុខនេះ។
បច្ចុប្បន្ននេះ ដំណើរការឃោសនា ក្នុងក្របខ័ណ្ឌនៃការបោះឆ្នោតជ្រើសរើសបេក្ខជនតំណាងបក្សកំពុងធ្វើឡើងនៅគ្រប់បណ្តារដ្ឋទាំងអស់ក្នុងសហរដ្ឋអាមេរិក។ ប៉ុន្តែ រដ្ឋនិមួយៗមានកាលបរិច្ឆេទបោះឆ្នោតខុសៗគ្នា។ ចំណែក របៀបបោះឆ្នោត និងការគណនាលទ្ធផលនៅតាមរដ្ឋមួយចំនួនក៏មិនដូចគ្នាដែរ។ គិតមកដល់ពេលនេះ នៅសល់តែបេក្ខជនចំនួនប្រាំនាក់ប៉ុណ្ណោះ ដែលនៅបន្តប្រកួតប្រជែងគ្នាក្នុងជួរគណបក្សសាធារណរដ្ឋ។ រីឯខាងគណបក្សប្រជាធិបតេយ្យ ចំនួនបេក្ខជននៅសល់តែពីរនាក់ប៉ុណ្ណោះ។
តើការស្ទង់មតិផ្តល់តំរុយដល់បេក្ខជនណាខ្លះសំរាប់«ថ្ងៃអង្គារអស្ចារ្យ»នេះ?
សំរាប់គណបក្សសាធារណរដ្ឋ លោក Donald Trump ត្រូវបានគេប៉ាន់ស្មានថាអាចយកឈ្នះបាន ៩ រដ្ឋ។ ចំណែក លោក Ted Cruz អាចដឹកមុខចំនួន ២ រដ្ឋ។ រីឯលោក Ben Carson វិញត្រូវបានគិតថាអាចឈ្នះបាន ១ រដ្ឋ។ សំរាប់គណបក្សប្រជាធិបតេយ្យវិញ គេបានប៉ានស្មានថាលោកស្រី Hillary Clintonអាចឈ្នះបានចំនួន ៩ រដ្ឋ ខណៈពេលដែលលោក Bernie Sanders អាចឈ្នះចំនួន ២ រដ្ឋ។ ប៉ុន្តែ នេះគឺគ្រាន់តែជាការប៉ាន់ស្មានតាមរយៈការស្ទាប់ស្ទង់មតិតែប៉ុណ្ណោះ។
បើយើងសរុបលទ្ធផលបណ្តោះអាសន្ន តាមរយៈការបោះឆ្នោតចំនួនបួនរដ្ឋ ខាងគណបក្សប្រជាធិបតេយ្យ លោ កស្រី Hillary Clinton បានឈ្នះចំនួន ៣ រដ្ឋ ខណៈពេលដែលគូប្រជែង គឺលោក Bernie Sanders បានឈ្នះចំនួន ១ រដ្ឋ។ ងាកមកខាងគណបក្សសាធារណរដ្ឋវិញម្តង លោក Donald Trump បានទទួលជ័យជំនះនៅក្នុងរដ្ឋចំនួន ៣ នៅពេលដែលលោក Ted Cruz បានឈ្នះក្នុងរដ្ឋចំនួនមួយតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ