អាល់ហ្សេរី៖ ប្រធានាធិបតីថ្មី តែងតាំងគណៈរដ្ឋមន្ត្រីថ្មី មនុស្ស១ភាគ៣មុខដដែលៗ បាតុករផ្ទុះកំហឹងជាថ្មី
ឡើងកាន់អំណាចតាមការបោះឆ្នោត ទើបបាន២សប្តាហ៍ លោក ធេបប៊ូន ប្រធានាធិបតីថ្មីរបស់អាល់ហ្សេរី បានសម្រេចចាត់តាំងនាយករដ្ឋមន្ត្រីថ្មី ឱ្យរៀបចំរដ្ឋាភិបាល ដែលមានសមាសភាពគណៈរដ្ឋមន្ត្រី ចំនួន២៩រូប។ ក៏ប៉ុន្តែ ចលនាក្រុមបាតុករអាល់ហ្សេរី ដែលធ្វើបាតុកម្មជិតមួយឆ្នាំពេញមកនេះ គឺនៅតែមិនសប្បាញចិត្ត។ មិនពេញចិត្ត ពីព្រោះថា ក្នុងចំណោមសមាសភាពគណៈរដ្ឋមន្ត្រីថ្មី មានរដ្ឋមន្ត្រី១១រូប គឺស្មើប្រមាណ១ភាគ៣ ជារដ្ឋមន្ត្រីក្នុងអាណត្តិចាស់ មុខដដែលៗ ហើយក្នុងចំណោមអ្នកទាំងនោះទៀតសោត គឺអ្នកខ្លះ កាន់តំណែងរដ្ឋមន្ត្រី ២០ឆ្នាំមកហើយ។ ចំពោះយុវបាតុករវ័យក្មេង គឺពួកគេចង់ឃើញប្រព័ន្ធដឹងនាំនយោបាយជាតិថ្មី ដែលមានការចូលរួមពីយុវជនច្រើន ហើយថ្មីសុទ្ធតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
នាយករដ្ឋមន្ត្រីថ្មី របស់អាល់ហ្សេរី គឺ លោក អាប់ដែលឡាស៊ីស ឌ្យេរ៉ាដ (Abdelaziz Djerad) ដែលត្រូវជ្រើសតាំង ជាមួយនឹងសមាជិកគណៈរដ្ឋមន្ត្រី ចំនួន២៨រូប។ ហើយក៏មានប្រតិភូអមរដ្ឋមន្ត្រី ចំនួន៧ និងរដ្ឋលេខា៤នាក់ ក្នុងនោះ គឺមានសមាសភាព នារី៥នាក់ផង។ តាមការកត់សម្គាល់របស់កាសែតក្នុងស្រុក, ក្បាលម៉ាស៊ីនថ្នាក់ដឹកនាំថ្មីនេះ ភាគច្រើន មានប្រវត្តិរូបជាបញ្ញវន្ត ជាសាស្ត្រាចារ្យ សេដ្ឋវិទូ គ្រូពេទ្យ វិស្វករ... សូម្បីតែនាយករដ្ឋមន្ត្រី ក៏ធ្លាប់ជាគ្រូបង្រៀនមហាវិទ្យាល័យដែរ។ ថែមពីនេះ នៅលើវិស័យកំណែទម្រង់សេដ្ឋកិច្ចវិញ មានបង្កើតក្រសួងថ្មី គឺផ្នែកសេដ្ឋកិច្ចសហគ្រាសខ្នាតតូច ទទួលបន្ទុកជំនួញខ្នាតតូច។
ចំពោះចលនាបាតុករ ការកែប្រែខ្លះៗប៉ុណ្ណេះ គឺមិនដូចអ្វីដែលពួកគេចង់បាននោះទេ។ បាតុកម្មផ្ទុះឡើងជាថ្មី នៅថ្ងៃសុក្រ ទី៣មករា គឺបន្ទាប់ពីទូរទស្សន៍ជាតិប្រកាសពីសមាសភាពគណរដ្ឋមន្ត្រី។ នៅក្នុងនោះ គេឃើញមានរដ្ឋមន្ត្រីការបរទេស, មហាផ្ទៃ, យុត្តិធម៌, ហិរញ្ញាវត្ថុ និងថាមពល ជារដ្ឋមន្ត្រីមុខចាស់ដដែល។ ហើយរដ្ឋមន្ត្រីខាងនេសាទ, លំនៅដ្ឋាន, ទេសចរណ៍ ជាដើម ជាមនុស្សរបស់អតីតប្រធានាធិបតី លោក ប៊ូតេហ្វ្លីកា ដែលពួកយុវបាតុករទាមទារទម្លាក់ចេញពីតំណែង កាលពីឆ្នាំមុន ក្នុងខែមេសា គឺប្រមាណជាជាង២ខែ ក្រោយផ្ទុះចលនាបាតុកម្មរបស់មហាជន។ សម្រាប់យុវជននិងបាតុកររាប់លាននាក់នៅពេញផ្ទៃប្រទេស ពួកគេចង់បាន«សាធារណរដ្ឋអាល់ហ្សេរី ថ្មីមួយ ដែលមានប្រព័ន្ធដឹកនាំថ្មី សុទ្ធសាធាតែម្តង ហើយមានពេញកម្លាំងដោយយុវជន»។
ដើម្បីសម្រន់ទឹកចិត្តបាតុករ ប្រធានាធិបតីថ្មីអាល់ហ្សេរី លោក អាប់ឌែលម៉ាឌជីដ ធេបប៊ូន (Abdelmadjid Tebboune) និងអាជ្ញាធរពន្ធនាគារ បានសម្រេចដោះលែងបាតុករ ចំនួន៧៦នាក់ដែលចាប់ឃុំតាំងពីពេលផ្តើមធ្វើបាតុកម្ម ខែកុម្ភៈ២០១៩មក។ បាតុកម្មរៀងរៀលថ្ងៃសុក្រ គម្រប់៤៦សប្តាហ៍មកហើយ។ ការរំដោះបាតុករឱ្យមានសេរីភាពពេលនេះ ក៏មិនទាន់អាចធ្វើឱ្យកំហឹងមហាជនអាល់ហ្សេរី បានស្ងប់ភ្លាមភ្លែតនោះដែរ។ គេប្រមើលមើលថា នៅពេលដែលគណៈរដ្ឋមន្ត្រីថ្មី ជួបប្រជុំគ្នាលើកទី១ នៅថ្ងៃអាទិត្យ ទី៥មករា ច្បាស់អាចមានផ្ទុះការតវ៉ាថ្មីទៀត ជាក់ជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ