ទស្សនកិច្ចប្រធានរដ្ឋវៀតណាម ដើម្បីទំនាក់ទំនងកាន់តែប្រសើរ
ប្រធានរដ្ឋនៃសាធារណរដ្ឋសង្គមនិយមវៀតណាមលោក ង្វៀន ម៉ិញត្រៀត បានមកដល់ព្រលានយន្តហោះអន្តរជាតិភ្នំពេញហើយកាលពីរសៀលថ្ងៃព្រហស្បតិ៍នេះ ដើម្បីផ្តើមទស្សនកិច្ចផ្លូវរដ្ឋរយៈពេល៣ថ្ងៃ។ អ្នកនាំពាក្យក្រសួងការបរទេសកម្ពុជាថ្លែងថា ទស្សនកិច្ចមានគោលដៅពង្រឹងមិត្តភាព និងសហប្រតិបត្តិការរវាងកម្ពុជា និងវៀតណាម។
ចុះផ្សាយនៅថ្ងៃ៖
បទអន្តរាគមន៍របស់ លាង ដឺលុច
គោលដៅ គឺគ្មានអ្វីក្រៅតែពីការពង្រឹងចំណងមិត្តភាព និងកិច្ចសហប្រតិបត្តិការនៃប្រទេសជិតខាងទាំងពីរកម្ពុជាវៀតណាមនោះទេ។ អ្នកនាំពាក្យក្រសួងការបរទេសកម្ពុជា បានបញ្ជាក់ថា នេះគឺជាការផ្លាស់ប្តូរដំណើរទស្សនកិច្ចផ្លូវរដ្ឋ ដោយសារតែកាលពីខែមិថុនាកន្លងទៅ ព្រះមហាក្សត្រព្រះបាទព្រះបរមនាថ នរោត្តម សីហមុនី ព្រមទាំងសម្តេចឪ សម្តេចម៉ែផង ទាំងបីព្រះអង្គបានយាងទៅបំពេញទស្សនកិច្ចនៅប្រទេសវៀតណាម។
បើតាមមន្ត្រីរដ្ឋាភិបាលកម្ពុជា ការផ្លាស់ប្តូរដំណើរទស្សនកិច្ចនៃថ្នាក់ដឹកនាំកំពូលនេះ ដើម្បីធ្វើអោយកាន់តែប្រសើរឡើងទំនាក់ទំនងនៃប្រទេសទាំងពីរ។
យោងតាមសេចក្តីប្រកាសព័ត៌មានរបស់ក្រសួងការបរទេស លោក ង្វៀន ម៉ិញត្រៀត នឹងចូលគាល់ព្រះមហាក្សត្រខ្មែរ ព្រះបរមនាថ នរោត្តម សីហមុនី ជួបសវនាការជាមួយថ្នាក់ដឹកនាំកំពូល រួមមានប្រធានព្រឹទ្ធសភាលោក ជា ស៊ីម ប្រធានរដ្ឋសភាលោក ហេង សំរិន និងប្រមុខរដ្ឋាភិបាលលោក ហ៊ុន សែន។ ក្រៅពីជួបពិភាក្សាជាមួយថ្នាក់ដឹកនាំហើយ លោកប្រធានរដ្ឋវៀតណាមក៏នឹងចូលរួមសម្ពោធការិយាល័យតំណាងវិទ្យុសំឡេងវៀតណាមដែលទទួលបានការអនុញ្ញាតអោយបើកនៅកម្ពុជា។ ពិធីសម្ពោធនឹងប្រព្រឹត្តទៅនៅថ្ងៃស្អែកទី២៧សីហាស្អែកនេះ។
ប្រធានការិយាល័យតំណាងនៃវិទ្យុសំឡេងវៀតណាមបានប្រាប់អោយដឹងថា ការបង្កើតការិយាល័យតំណាងនៅកម្ពុជានេះ គឺជាមធ្យោបាយមួយដើម្បីបង្ហាញអោយពលរដ្ឋវៀតណាមបានដឹងអំពីការរីកចម្រើននៅកម្ពុជា តាមរយៈការឆ្លើយឆ្លងព័ត៌មាន។
វិទ្យុសំឡេងវៀតណាមនេះត្រូវបានបង្កើតតាំងពីឆ្នាំ១៩៤៥ មាន១២ភាសាបរទេស និង១២ភាសាជនជាតិ។ ការិយាល័យតំណាងនៅភ្នំពេញនេះ គឺជាការិយាល័យតំណាងទី៧នៅបរទេស ដែលវិទ្យុសំឡេងវៀតណាមបានបង្កើត។ ការិយាល័យតំណាងនៅប្រទេស៦ផ្សេងទៀតនោះមាននៅប្រទេស បារាំង ឡាវ រុស្ស៊ី អេហ្ស៊ីប សហរដ្ឋអាមេរិក និងប្រទេសថៃ។
ជាប្រតិកម្មអ្វីនោះ គឺមិនមានទេ។ គឺមានតែលោក ថាច់ សេដ្ឋា ដែលជានាយកប្រតិបត្តិការនៃសហគមន៍ខ្មែរកម្ពុជាក្រោម ដែលបានធ្វើលិខិតមួយផ្ញើថ្វាយព្រះមហាក្សត្រ ដោយស្នើអោយព្រះមហាក្សត្រ ព្រះអង្គលើកបញ្ហាការរស់នៅរបស់ប្រជាពលរដ្ឋខ្មែរ នៅកម្ពុជាក្រោម ជាមួយលោកប្រធានរដ្ឋវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ